16:1, 16:2,3, 16:4, 16:5, 16:6, 16:7,8, 16:9, 16:10, 16:11,12, 16:13, 16:14, 16:15,16

ఆదికాండము‌ 16:1 అబ్రాము భార్యయైన శారయి అతనికి పిల్లలు కనలేదు. ఆమెకు హాగరు అను ఐగుప్తీయురాలైన దాసియుండెను.

ఈ వచనంలో హాగరు అనే దాసి పరిచయం చెయ్యబడడం మనం చూస్తాం. ఫరో అబ్రాహామునూ శారానూ ఐగుప్తు నుండి పంపివేసినప్పుడు వారికి బహుమానంగా కొంతమంది దాసులనూ దాసీలను కూడా ఇవ్వడం జరిగింది (ఆదికాండము 12:16). అలా ఇవ్వబడిన దాసిలలో ఈ హాగరు అనే స్త్రీ ఒకరు.

ఆదికాండము 16:2,3‌ కాగా శారయి ఇదిగో నేను పిల్లలు కనకుండ యెహోవా చేసి యున్నాడు. నీవు దయచేసి నా దాసితో పొమ్ము. ఒకవేళ ఆమెవలన నాకు సంతానము కలుగవచ్చునని అబ్రాముతో చెప్పెను. అబ్రాము శారయి మాట వినెను. కాబట్టి అబ్రాము కనాను దేశములో పదియేండ్లు కాపురమున్న తరువాత అబ్రాము భార్యయైన శారయి తన దాసియైన హాగరను ఐగుప్తీయు రాలిని తీసికొని తన పెనిమిటియైన అబ్రామునకు భార్యగా ఉండునట్లు అతనికిచ్చెను.

ఈ వచనాలలో శారయి హాగరు ద్వారా సంతానం పొందుకోవడానికి ప్రయత్నించడం, దానికి‌ అబ్రాహాము కూడా సమ్మతించడం‌ మనం చూస్తాం. ప్రాచీనకాలంలో ఇలాంటి ప్రత్యమ్నాయాలు సాధారణంగానే మనకు కనిపిస్తుంటాయి. ఉదాహరణకు యాకోబు భార్యలు కూడా తమ దాసీల ద్వారా సంతానాన్ని పొందుకున్నారు (ఆదికాండము 30:3-5, 30:9-11).

అయితే ఇలాంటి ప్రత్యామ్నాయాలు మానవులు కల్పించుకున్నవే తప్ప దేవుడు నియమించినవి కావు. ఎందుకంటే ఆయన ఆదాముకు ఒకే భార్యను చేసిచ్చాడు. కానీ శారయి సంతానం కోసం దేవునిపై ఆధారపడకుండా అప్పటి సాంప్రదాయాలను అనుసరించింది. అందుకే‌ ఆమె ఆదే హాగరు వల్ల ఇబ్బందికి గురైంది. అబ్రాహాము కూడా దానికి సమ్మతించడం వల్ల నిందించబడ్డాడు (5వ). అలానే ఆమెవల్ల జన్మించిన ఇష్మాయేలు దూరమయ్యేటప్పుడు బాధపడ్డాడు (ఆదికాండము 21:10,11). కాబట్టి విశ్వాసులు తమ జీవితానికి సంబంధించిన నిర్ణయాలను పూర్వీకుల నుంచి సంక్రమించిన సాంప్రదాయాలను బట్టి కాకుండా దేవుని వాక్యాన్ని బట్టి తీసుకోవాలి. ఎందుకంటే దేవుని వాక్యం మాత్రమే మనం సరైన నిర్ణయాలు తీసుకునేలా ప్రేరేపిస్తుంది (యెషయా 8:20, 2 థెస్సలొనిక 2:15).

యిర్మియా 10:3 జనముల ఆచారములు వ్యర్థములు అడవిలో నొకడు చెట్టు నరకునట్లు అది నరకబడును అది పనివాడు గొడ్డలితో చేసినపని.

ఆదికాండము 16:4 అతడు హాగరుతో పోయినప్పుడు అది గర్భవతి ఆయెను. అది తాను గర్భవతినైతినని తెలిసికొనినప్పుడు దాని యజమానురాలు దానిదృష్టికి నీచమైనదాయెను.

ఈ వచనంలో హాగరు గర్భవతి అయ్యాక శారయి పట్ల చులకనగా ప్రవర్తించినట్టు మనం చూస్తాం. అంటే ఇప్పుడు ఈమెవల్లనే అబ్రాహాముకు సంతానం కలుగబోతుంది కాబట్టి, సంతానం లేని శారయికి నేను లోబడడం ఏంటని ఆమె ఆలోచించింది. కానీ దీనంతటికీ కారణం ఆ శారయినే అని ఆమె మర్చిపోయింది. ఇది మానవుల్లోని పతనస్వభావానికి ఒకానొక నిదర్శనం. అదేవిధంగా తొందరపాటు నిర్ణయం తీసుకున్న శారయికి కూడా ఇది ఒక గుణపాఠంగా ఉంది.

ఆదికాండము 16:5 అప్పుడు శారయి నా ఉసురు నీకు తగులును. నేనే నా దాసిని నీ కౌగిటి కిచ్చిన తరువాత తాను గర్భవతినైతినని తెలిసికొనినప్పుడు నేను దానిదృష్టికి నీచమైనదాననైతిని. నాకును నీకును యెహోవా న్యాయము తీర్చునుగాక అని అబ్రాముతో అనెను.

ఈ వచనంలో శారా అబ్రాహాముతో పలుకుతున్న మాటలు BSI తెలుగు తర్జుమాలో కంటే ఇంగ్లీషు తర్జుమాలో అర్ధవంతంగా ఉన్నాయి.

And Sarai said unto Abram, My wrong be upon thee: I have given my maid into thy bosom; and when she saw that she had conceived, I was despised in her eyes: the LORD judge between me and thee.

ఈ తర్జుమా ప్రకారం; శారయి అబ్రాహాముతో హాగరు విషయంలో నేను చేసిన తప్పు నీపై కూడా మోపబడుతుందని నిందిస్తుంది. కానీ తెలుగులో అక్కడ "ఉసురు" అని తర్జుమా చేసారు. ఆమె ఉద్దేశంలో ఆమె‌ చేసిన తప్పుకు అబ్రాహాము‌ కూడా సానుకూలంగా స్పందించాడు కాబట్టి అందులో అతను కూడా భాగస్తుడే అని భావిస్తుంది. కాబట్టి మనం ఇతరులు చేస్తున్న పొరపాట్లలో పాలివారమై ఉండకుండా చూసుకోవాలి. వారు మన కుటుంబసభ్యులైనా సరే సానుకూలంగా స్పందించకూడదు. లేకుంటే అబ్రాహాములా మనం కూడా నిందను‌ ఎదుర్కోవలసి వస్తుంది. ఒకవేళ అతను శారయి తీసుకువచ్చిన ప్రత్యామ్నాయాన్ని వ్యతిరేకించియుంటే అతనిపైనా నిందపడేది కాదు అలానే శారయి కూడా బాధపడేది కాదు. అందుకే పౌలు తిమోతీని "పరుల పాపములలో పాలివాడవై యుండకుము. నీవు పవిత్రుడవుగా ఉండునట్లు చూచుకొనుము" (1తిమోతికి 5: 22) అని హెచ్చరిస్తున్నాడు.

అయితే ఇక్కడ మరొకకోణం కూడా ఆలోచించాలి; దేవుడు అతనికి సంతానం గురించి వాగ్దానం చేసినప్పటికీ ఆ సంతానం శారయి మూలంగానే కలుగుతుందనే స్పష్టత ఇప్పటివరకూ అతనికి లేదు. ఎందుకంటే ఆమె గొడ్రాలు. ఆ స్పష్టత అతనికి 17వ అధ్యాయంలో లభిస్తుంది (ఆదికాండము 17:15,16). అందుకే ఆ సంతానం హాగరు మూలంగా కలుగుతుందని కూడా అతను దానికి అంగీకరించియుండొచ్చు. ఎందుకంటే అప్పట్లో ఇలాంటి ప్రత్యామ్నాయాలు సాధారణమని ఇప్పటికే మాట్లాడుకున్నాం. అయినప్పటికీ ఆ విషయంలో ఒకసారి దేవుణ్ణి సంప్రదించియుంటే సరిపోయేది. కానీ తొందరపడ్డాడు.

ఆదికాండము 16:6 అందుకు అబ్రాము ఇదిగో నీ దాసి నీ చేతిలో ఉన్నది; నీ మనస్సు వచ్చినట్లు దాని చేయుమని శారయితో చెప్పెను. శారయి దాని శ్రమ పెట్టినందున ఆమె యొద్దనుండి అది పారిపోగా-

ఈ వచనంలో శారాకు కలిగిన బాధను గుర్తించిన అబ్రాహాము ఆమెకు సానుకూలంగా స్పందిస్తున్నట్టు మనం చూస్తాం. కొందరు బైబిల్ విమర్శకులు; శారయి గర్భవతిగా ఉన్న స్త్రీని శ్రమపెట్టినందుకు ఆమెనూ దానికి అంగీకరించిన అబ్రాహామునూ తప్పుపడుతుంటారు. కానీ అక్కడ హాగరు తన యజమానురాలి పట్ల చేసినదానిని మనం మరింత అపరాధంగా భావించాలి. ఉదాహరణకు ఈరోజుల్లో ఎవరైనా గర్భవతి నేరం చేస్తే చట్టం ఆమెను శిక్షిస్తుందా లేక గర్భవతి అని వదిలేస్తుందా?.

అలానే శారయి ఆమెను శ్రమపెట్టిందంటే విశ్వాసురాలైన శారయి ఆమెను చిత్రహింసలు పెట్టిందని భావించకూడదు. అబ్రాహాము భార్యగా ఆమెకు కల్పించిన ఘనతను దూరంచేసి ఒకప్పటిలానే ఆమెచేత పని చేయించియుండొచ్చు. కొంచెం కఠినంగా ప్రవర్తించియుండొచ్చు, ఉన్నపాటుగా ఆ అవమానాన్ని సహించలేని ఆమె అక్కడినుండి పారిపోయింది.

ఆదికాండము 16:7,8 యెహోవా దూత అరణ్యములో నీటిబుగ్గయొద్ద, అనగా షూరు మార్గములో బుగ్గ యొద్ద, ఆమెను కనుగొని శారయి దాసివైన హాగరూ, ఎక్కడనుండి వచ్చితివి, ఎక్కడికి వెళ్ళుచున్నావని అడిగి నందుకు అదినా యజమానురాలైన శారయియొద్దనుండి పారిపోవుచున్నాననెను.

ఈ వచనాలలో అరణ్యంలోకి పారిపోయిన హాగరుకు యెహోవా దూత ప్రత్యక్షమై ఆమెతో మాట్లాడుతున్నట్టు మనం చూస్తాం. కొందరు అపార్థం చేసుకుంటున్నట్టుగా ఈ యెహోవా దూత దేవదూత కాదు. ఎందుకంటే ఈ క్రిందివచనాలలో ఆయన దేవునివలే హాగరు సంతానాన్ని దీవిస్తున్నట్టు, హాగరు కూడా ఆయనను దేవునిగా గుర్తించినట్టు రాయబడింది. ఇక్కడే కాదు ఈయన ప్రత్యక్షమైన ప్రతీ సందర్భంలోనూ ఇలాంటి పరిస్థితినే మనం చూస్తుంటాం. ఆ సందర్భాలు ఏంటో ఇంతకూ ఆయన ఎవరో వివరంగా తెలుసుకోవడానికి ఈ వ్యాసం చదవండి.

యెహోవా దూత ఎవరు?

ఆదికాండము 16:9 అప్పుడు యెహోవా దూత నీ యజమానురాలి యొద్దకు తిరిగి వెళ్లి ఆమె చేతి క్రింద అణిగియుండుమని దానితో చెప్పెను.

ఈ వచనంలో యెహోవా దూత హాగరుతో నీ యజమానురాలి దగ్గరకు తిరిగివెళ్ళి ఆమె చేతిక్రింద అణిగియుండమనడం మనం చూస్తాం. "అణిగియుండమంటే" ఆమెపట్ల గౌరవంగా మసలుకోమని అర్థం. ఎందుకంటే ఆమెకు కలిగిన ఘనత అంతా శారయి మూలంగా కలిగిందే. అందుకు కృతజ్ఞతగా ఆమెకు లోబడియుండడం న్యాయమే.

గమనించండి; ఆమె చేసిన పొరపాటు విషయంలో అబ్రాహాము శారాలు జాలి చూపకపోయినా జాలిగల దేవుడు మాత్రం ఆమెను విడిచిపెట్టలేదు. అందుకే శారయి పట్ల ఆమె చేసిన పొరపాటును సరిచేసుకునే అవకాశం ఇస్తున్నాడు. ఇది మనిషి యోగ్యుడు కానప్పటికీ దేవుడు అతనిపై కృప చూపించి, తన తప్పులు సరిచేసుకునే అవకాశం ఇస్తాడనడానికి మంచి ఉదాహరణ.

ఆదికాండము 16:10 మరియు యెహోవా దూత నీ సంతానమును నిశ్చయముగా విస్త రింపజేసెదను. అది లెక్కింప వీలులేనంతగా విస్తారమవునని దానితో చెప్పెను.

ఈ వచనంలో యెహోవా దూత నీ సంతానాన్ని విస్తరింపచేస్తానని హాగరుకు వాగ్దానం చెయ్యడం మనం చూస్తాం. ఇది అబ్రాహామును బట్టి కలిగిన ఆశీర్వాదంగా మనం భావించాలి. ఆ ఆశీర్వాద ఫలితంగా ఈమె కుమారుడైన ఇష్మాయేలు నుండి అరబ్బు తెగలు ఉద్భవించాయి. అయితే కాలక్రమేణా వీరంతా అబ్రాహాము సేవించిన దేవుణ్ణి విడిచి స్వంత దేవుళ్ళను కల్పించుకున్నారు. క్రీస్తుశకం 5/6 శతాబ్దాలలో మహమ్మద్ అనే వ్యక్తి ఈ తెగల్లోనే జన్మించి ఇస్లాం మతాన్ని స్థాపించాడు. బైబిల్ పాత్రలను దొంగిలిస్తూ తమ జాతికి తగినట్టుగా వక్రీకరిస్తూ ఆ మతానికి మతగ్రంథాలు కూడా రాయబడ్డాయి. ప్రస్తుతం వాటిగురించి లోతుగా పోనవసరం లేదు కాబట్టి ఈ విషయం విడిచిపెడుతున్నాను.

ఆదికాండము 16:11,12 మరియు యెహోవా దూత ఇదిగో యెహోవా నీ మొరను వినెను. నీవు గర్భవతివై యున్నావు; నీవు కుమారుని కని అతనికి ఇష్మాయేలు అను పేరు పెట్టుదువు. అతడు అడవిగాడిదవంటి మనుష్యుడు. అతని చెయ్యి అందరికిని అందరి చేతులు అతనికిని విరోధముగా ఉండును. అతడు తన సహోదరులందరి యెదుట నివసించునని దానితో చెప్పగా-

ఈ వచనాలలో యెహోవా దూత హాగరుకు జన్మించే కుమారుడి గురించీ అతని సంతానం గురించీ వివరించడం మనం చూస్తాం. ఇష్మాయేలు అనే పేరుకు "దేవుడు‌ మొరవినెను" అనే అర్థం వస్తుంది. ఇక అతని గురించి చెప్పబడిన అడవిగాడిద వంటి మనుష్యుడు, అతని చేతులు అందరికీ అందరి చేతులు అతనికి విరోధంగా ఉంటాయన్న మాటలు అతనికీ (సంతానం) మిగిలిన ప్రజలకూ మధ్య ఉండే వైరాన్ని సూచిస్తున్నాయి. ప్రపంచ చరిత్రలో దీనికి ఎన్నో నిదర్శనాలు ఉన్నాయి. ఇప్పటికీ వాటిని చూస్తూనే ఉన్నాం.

ఆదికాండము 16:13 అది చూచుచున్న దేవుడవు నీవే అను పేరు తనతో మాటలాడిన యెహోవాకు పెట్టెను ఏలయనగా నన్ను చూచినవాని నేనిక్కడ చూచితిని గదా అని అనుకొనెను.

ఈ వచనాలలో హాగరు యెహోవా దూత చెప్పిన మాటలకు స్పందిస్తూ ఆయనను దేవునిగా గుర్తించడం మనం చూస్తాం. ఎందుకంటే ఆయన దేవుడు. దీనిగురించి నేను ప్రస్తావించిన వ్యాసంలో ఆధారాలతో తెలియచేసాను.

ఆదికాండము 16:14 అందుచేత ఆ నీటిబుగ్గకు బెయేర్‌ లహాయిరోయి అను పేరు పెట్టబడెను. అది కాదేషుకును బెరెదుకును మధ్య నున్నది.

ఈ వచనంలో యెహోవా దూత మాట్లాడిన ప్రదేశంలో ఉన్న నీటిబుగ్గకు "బెయేర్‌ లహాయిరోయి" అనే పేరు పెట్టబడడం మనం చూస్తాం. దీనికి సజీవుడైన దేవుని బావి అని అర్థం.

ఆదికాండము 16:15,16 తరువాత హాగరు అబ్రామునకు కుమారుని కనెను. అబ్రాము హాగరు కనిన తన కుమారునికి ఇష్మా యేలను పేరు పెట్టెను. హాగరు అబ్రామునకు ఇష్మాయేలును కనినప్పుడు అబ్రాము ఎనుబదియారు ఏండ్ల వాడు.

ఈ వచనాలలో హాగరు యెహోవా దూత మాటలకు విధేయత చూపిస్తూ అబ్రాహాము దగ్గరకు తిరిగివెళ్ళి ఇష్మాయేలును కన్నట్టు మనం చూస్తాం. ఇతను దేవుని వాగ్దానాన్ని బట్టి కాకుండా శరీరాన్ని బట్టి మాత్రమే పుట్టినవాడు.