24:1, 24:2-4, 24:5, 24:6-8, 24:9, 24:10-14, 24:15,16, 24:17-27, 24:28-32, 24:33, 24:34-49, 24:50,51, 24:52, 24:53, 24:54-61, 24:62-66, 24:67

ఆదికాండము‌ 24:1 అబ్రాహాము బహు కాలము గడిచిన వృద్ధుడైయుండెను. అన్ని విషయములలోను యెహోవా అబ్రాహామును ఆశీర్వదించెను.

ఈ వచనంలో‌ అబ్రాహాము వృద్ధాప్యపు పరిస్థితి గురించి మనం చూస్తాం. వాగ్దానపుత్రుడైన ఇస్సాకు జననంతో సహా "అన్ని విషయములలోను అనగా ఆస్తిపరంగా కూడా యెహోవా అబ్రాహామును ఆశీర్వదించెను"

ఆదికాండము 24:2-4 అప్పుడు అబ్రాహాము తనకు కలిగిన సమస్తమును ఏలుచుండిన తన యింటి పెద్దదాసునితో నీ చెయ్యి నా తొడ క్రింద పెట్టుము. నేను ఎవరి మధ్య కాపురమున్నానో ఆ కనానీయుల కుమార్తెలలో ఒకదానిని నా కుమారునికి పెండ్లి చేయక నా స్వదేశమందున్న నా బంధువుల యొద్దకు వెళ్లి ఇస్సాకను నా కుమారునికి భార్యను తెచ్చునట్లు ఆకాశము యొక్క దేవుడును భూమియొక్క దేవుడునైన యెహోవా తోడని నీ చేత ప్రమాణము చేయించెదననెను.

ఈ వచనాలలో అబ్రాహాము ఇస్సాకు వివాహ విషయమై తన పెద్దదాసుని ప్రమాణం కోరడం మనం చూస్తాం. ఆ దాసుని పేరు ఇక్కడ ప్రస్తావించబడనప్పటికీ గతంలో ఈ అబ్రాహాము "నేను సంతానము లేనివాడనై పోవుచున్నానే; దమస్కు ఎలీయెజెరే నా యింటి ఆస్తి కర్తయగును" (ఆదికాండము 15:2) అని దేవునితో పలకడాన్ని బట్టి ఆ పెద్దదాసుడు దమస్కు ఎలీయెజెరే అయ్యుండాలి. ఎందుకంటే ఆకాలపు సాంప్రదాయం ప్రకారం యజమానుడు సంతానం లేకుండా చనిపోతే అతని ఆస్తి అంతటికీ పెద్దదాసుడే హక్కుదారుడయ్యేవాడు.

ఇక్కడ కొన్ని ప్రాముఖ్యమైన విషయాలు మనం గమనించాలి.

1. ప్రస్తుతం అబ్రాహాము బాగా వృద్ధుడై అతని మరణ దినమెప్పుడో తెలియనివాడిగా ఉన్నాడు కాబట్టి తండ్రిగా తన బాధ్యతను నెరవేర్చడానికి అతను త్వరపడుతున్నాడు. అనగా ఇస్సాకు వివాహ విషయమై సన్నహాలు చేస్తున్నాడు. కాబట్టి విశ్వాసులైన తల్లితండ్రులు తమకు సమయం ఉండగానే పిల్లలపట్ల తమ బాధ్యతలు నెరవేర్చడానికి ప్రయాసపడాలి.

2. అతను ఇస్సాకుకు భార్యగా కనానీయుల కుమార్తెను కాకుండా తన బంధువుల స్త్రీనే ఎందుకు కోరుకుంటున్నాడంటే ఆదికాండము 9:25 ప్రకారం; కనానీయులు శపించబడిన ప్రజలు. వాగ్దాన పుత్రుడైన ఇస్సాకు సంతానం వారికి చెందిన స్త్రీ ద్వారా విస్తరించడం దేవుని చిత్తం కాదు. భవిష్యత్తులో ఆయన ఈ ప్రజలకు ఈ ఇస్సాకు సంతానం ద్వారానే తీర్పు కూడా నిర్ణయించాడు. పైగా అతను కనానీయుల కుమార్తెను వివాహం చేసుకుంటే ఆమె ద్వారా కలుషితమయ్యే అవకాశం ఎంతైనా ఉంది. అందుకే అబ్రాహాము ఇలాంటి జాగ్రత్త తీసుకుంటున్నాడు. దీనినిబట్టి విశ్వాసులైన తల్లితండ్రులు తమ పిల్లలు దేవునిచిత్తానికి వ్యతిరేకమార్గంలో పయనించకుండా వారి వివాహ విషయంలోనూ ఇతర కార్యక్రమాల విషయంలోనూ జాగ్రత్తలు తీసుకోవాలి.

అదేవిధంగా ఇక్కడ అబ్రాహాము ఎలీయెజెరును తన తొడ క్రింద చెయ్యి పెట్టడం ద్వారా ప్రమాణం చెయ్యమనడం మనం చూస్తాం. దీని గురించి 9వ వచనంలో వివరంగా తెలియచేస్తాను.

ఆదికాండము 24:5‌ ఆ దాసుడు ఈ దేశమునకు నా వెంట వచ్చుటకు ఒకవేళ ఆ స్త్రీ ఇష్టపడని యెడల నీవు బయలుదేరి వచ్చిన ఆ దేశమునకు నేను నీ కుమారుని తీసికొని పోవలెనా అని అడుగగా-

ఈ వచనంలో ఎలీయెజెరు అబ్రాహాము ప్రమాణం చెయ్యమనగానే తొందరపడకుండా ఆ స్త్రీ నాతో రాకపోతే నేను ఇస్సాకును అక్కడికి తీసుకువెళ్ళాలా అని ప్రశ్నించడం మనం చూస్తాం. అతను ఎంతో జాగ్రత్తతో ఈమాటలు పలుకుతున్నాడు. ఈవిషయాలు ఏమీ చర్చించకుండా ప్రమాణం చేసేస్తే తీరా ఆ స్త్రీ అతనితో రాకపోతే చేసిన ప్రమాణాన్ని నెరవేర్చని దోషిగా అతను పరిగణించబడతాడు. అందుకే ఆ ప్రమాణం‌ విషయంలోని మినహాయింపులు, ఇతర కోణాలను కూడా ప్రస్తావిస్తున్నాడు. కాబట్టి విశ్వాసులమైన మనం ఎవరికైనా ప్రమాణం చేసేముందు/మాట ఇచ్చేముందు తగిన మెలకువలు పాటిస్తూ మసలుకోవాలి. ఎందుకంటే మనుష్యుడు చేసే ప్రతీ ప్రమాణానికీ/మాటకూ దేవుడే సాక్షిగా ఉంటాడు.

ఆదికాండము 24:6-8 అబ్రాహాము అక్కడికి నా కుమారుని తీసికొని పోకూడదు సుమీ. నా తండ్రి యింటనుండియు నేను పుట్టిన దేశము నుండియు నన్ను తెచ్చి నాతో మాటలాడినీ సంతానమునకు ఈ దేశము నిచ్చెదనని ప్రమాణము చేసి నాతో చెప్పిన పరలోకపు దేవుడగు యెహోవా తన దూతను నీకు ముందుగా పంపును. అక్కడనుండి నీవు నా కుమారునికి భార్యను తీసికొనివచ్చెదవు. అయితే నీ వెంట వచ్చుటకు ఆ స్త్రీ ఇష్టపడని యెడల ఈ ప్రమాణము నుండి విడుదల పొందెదవు గాని నీవు నా కుమారుని అక్కడికి తీసికొని పోకూడదని అతనితో చెప్పెను.

ఈ వచనాలలో ఎలీయెజెరు సందేహాలకు అబ్రాహాము ఇస్తున్న సమాధానం మనం చూస్తాం. దేవుడు తన దూతను పంపి ఆ స్త్రీ ఇతనితో వచ్చేలా సహాయం చేస్తాడు. ఒకవేళ అలా జరక్కున్నా ఇస్సాకును మాత్రం అక్కడికి తీసుకెళ్ళకూడదు. ఎందుకంటే దేవుడు అబ్రాహామును కనానుకు పిలచినప్పుడు, ఆ దేశం నీ సంతానానికి ఇస్తానని, కాబట్టి నీవు ఆ దేశమంతటిలో సంచరించమని ఆజ్ఞాపించాడు (ఆదికాండము 13:17) ఇస్సాకు కూడా ఈ ఆజ్ఞ పరిధిలోకి వస్తాడు. కానీ ఎలీయెజెరు ఇస్సాకును ఆ స్త్రీ దగ్గరకు తీసుకువెళ్తే ఆమెపై ఇస్సాకుకు కలిగిన ప్రేమను బట్తైనా లేక ఆమె బలవంతం చొప్పునైనా అతను అక్కడే ఉండిపోయే అవకాశం ఉంది. అది కనాను దేశంలో సంచరించాలన్న దేవుని ఆజ్ఞకు విరుద్ధంగా ప్రవర్తించడం ఔతుంది. ఇస్సాకు అలాంటి పాపంలో చిక్కుకోకూడదనే అబ్రాహాము ఈ హెచ్చరికను చేస్తున్నాడు.‌

తమ పిల్లల విషయంలో ఇలాంటి జాగ్రత్తలు తీసుకోకుండా పైగా వారు దైవాజ్ఞలను మీరేలా అవకాశాలు కూడా కల్పిస్తున్న తల్లితండ్రులంతా ఈ సంఘటనను బట్టి బుద్ధితెచ్చుకోవాలి. ప్రస్తుత సినిమాలూ సోషల్ మీడియా స్నేహితులతో హద్దులు లేని షికార్లు తమ పిల్లలను దేవుని ఆజ్ఞలకు ఎంతో విరుద్ధంగా నడిపిస్తున్నాయని తెలిసినా ఎంతమంది తల్లితండ్రులు తమ‌ పిల్లలను నియంత్రిస్తున్నారు?. కొన్నిసార్లు వీరు కూడా వాటిలో పాలిభాగస్తులౌతున్నారు కదా!

ఆదికాండము 24:9 ఆ దాసుడు తన యజమానుడగు అబ్రాహాము తొడక్రింద తన చెయ్యి పెట్టి యీ సంగతి విషయమై ప్రమాణము చేసెను.

ఈ వచనంలో ఎలీయెజెరు అబ్రాహాము తొడక్రింద చెయ్యిపెట్టి ప్రమాణం చెయ్యడం మనం చూస్తాం. ఇలాంటి ప్రమాణం మనకు యాకోబు విషయంలో కూడా కనిపిస్తుంది (ఆదికాండము 47:29). దీని గురించి మనం "Ancient Near Eastern and Middle Eastern" ప్రజల ఆచారాలను అధ్యయనం చేస్తే వారు ప్రమాణం చేసేటప్పుడు అవతలి వ్యక్తి యొక్క మర్మాంగం (Testicles) క్రింద చేతిని పెట్టేవారు. దానికి ప్రమాణం చేసిన వ్యక్తి ఆ విషయంలో తప్పిపోతే అతని సంతానాన్ని ప్రమాణం చేయించుకున్న వ్యక్తి చంపవచ్చని అర్థం వస్తుంది. ఎందుకంటే సంతానం విషయంలో Testicles ప్రధానపాత్రను పోషిస్తాయి కాబట్టి ప్రమాణాల విషయంలో వారు ఇలాంటి ఆచారాన్ని అనుసరించేవారు. ఇది మనకు కొంచెం ఇబ్బందిగా అనిపించినా అప్పటిప్రజలకు ఇందులో అలాంటిదేమీ లేదు. అంతెందుకు ప్రస్తుతం మనం ఇంగ్లీష్ బాషలో ఉపయోగిస్తున్న Testimony, Testify (సాక్ష్యం) అనేపదాలు Testis అనే లాటిన్ పదం నుండే వచ్చాయి. లాటిన్ లో Testis అంటే సాక్షి అని అర్థం. దీనికి మరొక అర్థం కూడా ఉంది. Male Reproductive Cells ను Produce చేసే అవయవాన్ని Testis లేదా Testicles అంటారు. బయాలజీ సబ్జెక్ట్ ను ఇంగ్లీష్ మీడియంలో చదివినవారందరికీ అది తెలుసు.

అయితే ఈ ప్రమాణాన్ని మోషే "తొడక్రింద చెయ్యిపెట్టి" అని ఎందుకు రాసాడనే సందేహం కొందరికి కలగొచ్చు. బైబిల్ గ్రంథకర్తలు పరిశుద్ధాత్మ ప్రేరణతోనే లేఖనాలను రచిస్తున్నప్పటికీ ఆ రచనలు వారి బాషకూ భావనలకూ అతీతంగా ఉండవనే విషయాన్ని మనం గుర్తుంచుకోవాలి. అందుకే వారు అసౌకర్యంగా ఉన్న పదాలను స్పష్టంగా రాయకుండా Euphemism అనే పద్ధతిని అనుసరించారు. Euphemism అంటే అసౌకర్యంగా అనిపించే పదాలను వేరే పదాలతో వర్ణించడం. ఉదాహరణకు ఇదే మోషే "మీలో ఎవరును తమ రక్తసంబంధుల మానాచ్ఛాదనమును తీయుటకు వారిని సమీపింపకూడదు" (లేవీయకాండము 18:6) అని రాస్తున్నాడు. ఇంగ్లీష్ బైబిల్ లో ఈ మాటలు చదివితే వారిని నగ్నంగా చూడకూడదన్న అర్థం వస్తుంది. అయితే ఈ మాటలకు వారిని నగ్నంగా చూడకూడదని కాదు కానీ వారితో లైంగికసంబంధం పెట్టుకోవద్దని భావం. కానీ అతను ఆ పదం వాడకుండా Euphemism‌ పద్ధతిలో మానాచ్ఛాదనం అనే పదం ఉపయోగించాడు. ఇదే పద్ధతిని ఆ అధ్యాయం అంతటిలోనూ మనం చూస్తాం. 

అదేవిధంగా నూతననిబంధన కాలంలో యూదులు యెహోవా అనే పేరు పలకడానికి భయపడి (అసౌకర్యంగా భావించి) అదోనాయ్, ఎలోహీమ్ (ప్రభువు) అనేవారు. నూతననిబంధన గ్రంథకర్తలంతా తమ పుస్తకాలలో యెహోవా అనే పేరుకు బదులు ఇవే పదాలను (ప్రభువు) ఉపయోగించారు. కాబట్టి‌ మోషే ఆ ప్రమాణం విషయంలో "తొడ" అనే పదాన్ని ఉపయోగించడంలో ఎలాంటి అభ్యంతరం లేదు. పైగా ఆ ప్రదేశానికి తొడక్రింద నుండే చెయ్యి పెట్టేవారేమో.

ఆదికాండము 24:10-14 అతడు తన యజమానుని ఒంటెలలో పది ఒంటెలను తన యజమా నుని ఆస్తిలో శ్రేష్టమైన నానా విధములగు వస్తువులను తీసికొని పోయెను. అతడు లేచి అరామ్నహరాయిము లోనున్న నాహోరు పట్టణము చేరి సాయంకాలమందు స్త్రీలు నీళ్లు చేదుకొనవచ్చు వేళకు ఆ ఊరి బయటనున్న నీళ్లబావియొద్ద తన ఒంటెలను మోక రింపచేసి యిట్లనెను నా యజమానుడగు అబ్రాహాము దేవుడవైన యెహోవా, నేనువచ్చిన కార్యమును త్వరలో సఫలముచేసి నా యజమానుడగు అబ్రాహాము మీద అనుగ్రహము చూపుము. చిత్త గించుము, నేను ఈ నీళ్ల ఊటయొద్ద నిలుచు చున్నాను. ఈ ఊరివారి పిల్లలు నీళ్లు చేదుకొనుటకు వచ్చుచున్నారు. కాబట్టి నేను త్రాగునట్లు నీవు దయచేసి నీ కడవను వంచుమని నేను చెప్పగానీవు త్రాగుము నీ ఒంటెలకును నీళ్లు పెట్టెదనని యే చిన్నది చెప్పునో ఆమెయే నీ సేవకుడైన ఇస్సాకుకొరకు నీవు నియమించినదై యుండును గాక, అందువలన నీవు నా యజమానునిమీద అనుగ్రహము చూపితివని తెలిసికొందుననెను.

ఈ వచనాలలో అబ్రాహాము చెప్పిన ప్రదేశానికి వెళ్ళిన ఎలీయెజెరు, బావిదగ్గర నిలచి ఆ స్త్రీ విషయమై దేవుణ్ణి సూచన కోరడం మనం చూస్తాం. చాలామంది ఈ సంఘటనను ఆధారం చేసుకుని వివాహం విషయంలోనూ ఇతర కార్యాల‌ విషయంలోనూ దేవుణ్ణి సూచనలు అడుగుతుంటారు. కానీ ప్రస్తుతం ఆ విధంగా దేవుణ్ణి సూచనలు అడగమని బైబిల్ బోధించడం లేదు. ఎందుకంటే; ఈ సందర్భమంతా వాక్య ప్రత్యక్షత లేని సమయంలో దేవుడే స్వయంగా తన భక్తులకు ప్రత్యక్షమై వారిని నడిపించే కాలానికి సంబంధించింది. కాబట్టి ఆయన అలాంటి సూచనలే ఇప్పుడూ అనుగ్రహిస్తాడని భావించకుండా వాక్య ప్రత్యక్షతను ‌బట్టి ఏది చెయ్యాలో ఏది చెయ్యకూడదో నిర్ణయించుకోవాలి.

ఒకవేళ ఎలీయెజెరులా మనం కూడా దేవుని చిత్తం కోసం సూచనలు అడిగినప్పటికీ అతను నిర్థారించుకున్నట్టుగా మనం నిర్థారించుకోలేము. ఎందుకంటే; ఎలీయెజెరు తన యజమానుడికి కాబోయే భార్య ఎలా ఉండాలో సూచన అడిగినప్పటికీ క్రిందివచనాల ప్రకారం; అది నెరవేరాక కూడా ఆమెను వ్యక్తిగత వివరాలు అడుగుతున్నాడు. కారణం; అతను అబ్రాహాముతో చేసిన ప్రమాణం ప్రకారం, ఇస్సాకుకు కాబోయే భార్య అబ్రాహాము బంధువుల కుమార్తెయై ఉండాలి. అందుకే ఎలీయెజరు అడిగిన సూచన నెరవేరినప్పటికీ అది దేవుడే నెరవేర్చాడో లేక సాధారణంగానే అలా జరిగిందో తెలుసుకునేందుకు ఆమె‌ను మళ్ళీ తన తండ్రి ఇంటి వివరాలు అడుగుతున్నాడు. చివరికి ఆమె అబ్రాహాము బంధువుల కుమార్తెయే అని తెలుసుకుని ఆయనకు కృతజ్ఞతలు చెల్లిస్తున్నాడు.

కాబట్టి మనం ఇలాంటి సూచనే దేవుణ్ణి అడిగినప్పటికీ ఎలీయెజెరు ముందున్న ప్రమాణం (అబ్రాహాము బంధువుల కుమార్తె) మనకేదీ లేదు కాబట్టి ఆ విధంగా నిర్థారించుకోలేము. ఒకవేళ వాక్యప్రకారం; అవివాహితులైన విశ్వాసులను వివాహం చేసుకోవాలన్నది ప్రమాణంగా పెట్టుకున్నా అలాంటివారు చాలామందే మనకు కనిపిస్తారు. వారిలో మనం కోరిన ఆ సూచన నెరవేరినా అది దేవుడే నెరవేర్చాడో లేక సాధారణంగానే అలా జరిగిందో ఎలా తెలుసుకుంటాం? ఈరోజు వివాహం విషయంలోనూ చదువులు వ్యాపారాల విషయంలోనూ సూచనలు అడిగేవారు, గిద్యోనులా సఫలులు అవ్వగలరా? (న్యాయాధిపతులు 6:11-21, 37-40) ఏలియాలా ఆకాశం నుండి‌ అగ్నిని‌ దింపి యెహోవాయే దేవుడని రుజువు చెయ్యగలరా? (1 రాజులు 21:18-40). కాబట్టి మనం దేవుని వాక్యాన్ని ప్రామాణికంగా పెట్టుకుని ఆయన మనకిచ్చిన జ్ఞానంతో నిర్ణయాలు తీసుకోవాలే తప్ప సూచనలపై ఆధారపడి కాదు.

ఆదికాండము 24:15,16 అతడు మాటలాడుట చాలింపకముందే అబ్రాహాము సహోదరుడైన నాహోరు భార్యయగు మిల్కా కుమారుడైన బెతూయేలుకు పుట్టిన రిబ్కా కడవ భుజము మీద పెట్టుకొనివచ్చెను. ఆ చిన్నది మిక్కిలి చక్కనిది. ఆమె కన్యక, ఏ పురుషుడును ఆమెను కూడలేదు. ఆమె ఆ బావిలోనికి దిగిపోయి కడవను నీళ్లతో నింపుకొనియెక్కి రాగా-

ఈ వచనాలలో రిబ్కా ఎలీయెజెరు నిలిచిన బావియొద్దకు రావడం మనం చూస్తాం. ఆమె‌కు ఇంటి పనిచేసే దాసులూ దాసురాళ్ళూ ఉన్నప్పటికీ నీటికోసం ఆమెనే బావిదగ్గరకు రావడాన్ని బట్టి ఆమె కుటుంబానికి అవసరమైన వాటి విషయంలో పనిమంతురాలిగా మనకు కనిపిస్తుంది. కాబట్టి విశ్వాసురాళ్ళైన స్త్రీలు బద్ధకస్తురాళ్ళుగా కాకుండా తమ‌ కుటుంబానికి కావలసిన ఆహార పానీయాల విషయంలో పనిచేసేవారిగా ఉండాలి. అందుకే యెహోవా యందు భయభక్తులు కలిగిన గుణవంతురాలైన భార్య గురించి "ఆమె చీకటితోనే లేచి, తన యింటివారికి భోజనము సిద్ధపరచును తన పనికత్తెలకు బత్తెము ఏర్పరచును" (సామెతలు 31:15) అని రాయబడింది.

ఆదికాండము 24:17-27 ఆ సేవకుడు ఆమెను ఎదుర్కొనుటకు పరుగెత్తి నీ కడవలో నీళ్లు కొంచెము దయచేసి నన్ను త్రాగ నిమ్మని అడిగెను. అందుకామె అయ్యా త్రాగు మని చెప్పి త్వరగా తన కడవను చేతిమీదికి దించుకొని అతనికి దాహమిచ్చెను. మరియు ఆమె అతనికి దాహ మిచ్చిన తరువాతనీ ఒంటెలు త్రాగుమట్టుకు వాటికిని నీళ్లు చేదిపోయుదునని చెప్పి త్వరగా గాడిలో తన కడవ కుమ్మరించి తిరిగి చేదుటకు ఆ బావికి పరుగెత్తు కొని పోయి అతని ఒంటెలన్నిటికి నీళ్లు చేదిపోసెను. ఆ మనుష్యుడు ఆమెను తేరి చూచి తన ప్రయాణమును యెహోవా సఫలముచేసెనో లేదో తెలిసికొనవ లెనని ఊరకుండెను. ఒంటెలు త్రాగుటయైన తరువాత ఆ మనుష్యుడు అరతులము ఎత్తుగల బంగారపు ముక్కు కమ్మిని, ఆమె చేతులకు పది తులముల ఎత్తు గల రెండు బంగారు కడియములను తీసి నీవు ఎవరి కుమార్తెవు? దయచేసి నాతో చెప్పుము; నీ తండ్రి యింట మేము ఈ రాత్రి బసచేయుటకు స్థలమున్నదా అని అడిగెను. అందుకామె నేను నాహోరుకు మిల్కాకనిన కుమారుడగు బెతూయేలు కుమార్తెననెను. మరియు ఆమెమా యొద్ద చాలా గడ్డియు మేతయు రాత్రి బసచేయుటకు స్థలమును ఉన్న వనగా ఆ మనుష్యుడు తన తలవంచి యెహోవాకు మ్రొక్కి అబ్రాహామను నా యాజమానుని దేవుడైన యెహోవా స్తుతింపబడునుగాక. ఆయన నా యజమానునికి తన కృపను తన సత్యమును చూపుట మానలేదు. నేను త్రోవలో నుండగానే యెహోవా నా యజమానుని బంధువులు ఇంటికి నన్ను నడిపించెననెను.

ఈ వచనాలలో ఎలీయెజెరు దేవుడు తన సూచనను నెరవేర్చాడో లేదో తెలుసుకునేందుకు, ఆమెను నీటికోసం సహాయం అడిగాక ఆమె‌‌ ఇంటి వివరాలు తెలుసుకోవడం, దేవుడు అతను కోరిన సూచన నెరవేర్చాడని గ్రహించాక ఆయనను స్తుతించడం మనం చూస్తాం. ఇక్కడ రిబ్కా ఎలీయెజెరు కోరికమేరకు అతని దాహాన్ని తీర్చి అతని ఒంటెలకు కూడా నీరుపెట్టడం ద్వారా ఆమెలోని సహాయగుణం మనకు అర్థమౌతుంది. కాబట్టి విశ్వాసురాళ్ళు ఇలాంటి మంచిమనసుతో ఇతరులు అడిగినదానికంటే ఎక్కువగా సహాయం చేసేవారై ఉండాలి (సాధ్యమైనప్పుడు). శత్రువు ఆకలిగొంటేనే ఆహారం పెట్టాలన్నది వాక్య నియమం అయినప్పుడు (రోమా 12:20) సాధారణ మనుషులకూ ప్రాముఖ్యంగా మనవారికి మరింతగా సహాయం చెయ్యాలి.

అదేవిధంగా ఈ ఎలీయెజెరు బావిదగ్గర నిలచినప్పుడు దేవుణ్ణి సూచన అడుగుతూ ప్రార్థన చేసాడు, ఆయన ఆ సూచనను నెరవేర్చి సరైన గమ్యానికి చేర్చినప్పుడు ఆయనకు కృతజ్ఞతలు చెల్లిస్తున్నాడు. కాబట్టి విశ్వాసులు దేవునిపై ఆధారపడి కార్యాలను తలపెట్టాలి, ఆ కార్యాన్ని ఆయన సఫలం చేసినప్పుడు మరచిపోకుండా కృతజ్ఞతలు చెల్లించాలి. చాలామందికి కార్య ఆరంభంలో సహాయం కోసం ఆయనపై ఉండే ఆసక్తి, ఆ కార్యాన్ని ఆయన సఫలం చేసాక కృతజ్ఞతలు చెల్లించడంలో మాత్రం ఉండదు.

ఆదికాండము 24:28-32 అంతట ఆ చిన్నది పరుగెత్తికొనిపోయి యీ మాటలు తన తల్లి యింటి వారికి తెలిపెను. రిబ్కాకు లాబాననునొక సహోదరుడుండెను. అప్పుడు లాబాను ఆ బావి దగ్గర వెలుపటనున్న ఆ మనుష్యుని యొద్దకు పరుగెత్తికొనిపోయెను. అతడు ఆ ముక్కు కమ్మిని తన సహోదరి చేతులనున్న ఆ కడియములను చూచి ఆ మనుష్యుడు ఈలాగు నాతో మాటలాడెనని తన సహోదరియైన రిబ్కా చెప్పిన మాటలు విని ఆ మనుష్యుని యొద్దకు వచ్చెను. అతడు ఆ బావియొద్ద ఒంటెలు దగ్గర నిలిచి యుండగా లాబాను యెహోవా వలన ఆశీర్వదింపబడినవాడా, లోపలికి రమ్ము. నీవు బయట నిలువనేల? ఇల్లును ఒంటెలకు స్థలమును నేను సిద్ధము చేయించితిననెను. ఆ మనుష్యుడు ఇంటికి వచ్చినప్పుడు లాబాను ఒంటెల గంతలు విప్పి ఒంటెలకు గడ్డియు మేతయు కాళ్లు కడుగుకొనుటకు అతనికిని అతనితో కూడనున్నవారికిని నీళ్లు ఇచ్చి-

ఈ వచనాలలో రిబ్కా తన తండ్రి ఇంటికి వెళ్ళి, తన ఇంటివారికీ తన సహోదరుడైన లాబానుకూ విషయం తెలియచెయ్యడం మనం చూస్తాం. వారి ఇంటికి వచ్చిన వ్యక్తి అబ్రాహాము దాసుడని‌ లాబానుకు తెలియనప్పటికీ అతడిని యెహోవా పేరట ఆహ్వానించడం ద్వారా ఆ కుటుంబమంతా యెహోవా దేవుణ్ణి ఎరిగినవారని మనకు అర్థమౌతుంది.

ఆదికాండము 24:33 అతనికి భోజనము పెట్టించెను గాని అతడు నేను వచ్చిన పనిచెప్పక మునుపు భోజనము చేయననగా లాబాను చెప్పుమనెను.

ఈ వచనంలో ఎలీయెజెరుకు లాబాను‌ భోజనం పెట్టించినప్పుడు సంగతి చెప్పకుండా భోజనం చెయ్యనని బదులివ్వడం మనం చూస్తాం. దీనినిబట్టి అతను అబ్రాహాముకు చేసిన ప్రమాణం విషయంలో ఎంతో బాధ్యతతో వ్యవహరిస్తున్నాడో అర్థమౌతుంది. ప్రయాణంలో అతను సరైన ఆహారం తినకుండా ఉండుంటాడు అయినా సరే ముందు విషయానికి వస్తున్నాడు.‌ ఇలా బాధ్యత కలిగిన దాసులకు ఎలీయెజెరు మంచి ‌మాదిరిగా ఉన్నాడు, అందుకే అతను ప్రాముఖ్యమైన కార్యంలో ముఖ్య పాత్రను పోషించినవాడిగా బైబిల్ చరిత్రలో నిలచిపోయాడు. కాబట్టి ప్రతీదాసుడూ తన యజమాని పట్ల ఇలాంటి వైఖరిని‌ కలిగుండాలి. ఒకవేళ వీరి కష్టాన్ని యజమానులు గుర్తించనప్పటికీ దేవుని నుండి మాత్రం వారికి తప్పకుండా ప్రతిఫలం దక్కుతుంది. అందుకే పౌలు "దాసులారా, మనుష్యులను సంతోషపెట్టువారైనట్టు కంటికి కనబడవలెనని కాక, ప్రభువునకు భయపడుచు శుద్ధాంతఃకరణగలవారై, శరీరమును బట్టి మీ యజమానులైనవారికి అన్ని విషయములలో విధేయులైయుండుడి. ప్రభువు వలన స్వాస్థ్యమును ప్రతిఫలముగా పొందుదుమని యెరుగుదురు గనుక, మీరేమి చేసినను అది మనుష్యుల నిమిత్తము కాక ప్రభువు నిమిత్తమని మనస్ఫూర్తిగా చేయుడి, మీరు ప్రభువైన క్రీస్తునకు దాసులైయున్నారు" (కొలొస్సీ 3:22-24) అని రాస్తున్నాడు.

ఆదికాండము 24:34-49 అంతట అతడిట్లనెను నేను అబ్రాహాము దాసుడను, యెహోవా నా యజమానుని బహుగా ఆశీర్వదించెను గనుక అతడు గొప్పవాడాయెను. అతనికి గొఱ్ఱెలను గొడ్లను వెండి బంగారములను దాసదాసీ జనమును ఒంటెలను గాడిదలను దయచేసెను. నా యజమానుని భార్యయైన శారా వృద్ధాప్యములో నా యజమానునికి కుమారుని కనెను; నా యజమానుడు తనకు కలిగినది యావత్తును అతనికిచ్చియున్నాడు. మరియు నా యజమానుడు నాతో నేను ఎవరి దేశమందు నివసించుచున్నానో ఆ కనానీయుల పిల్లలలో ఒక పిల్లను నా కుమారునికి పెండ్లి చేయవద్దు. అయితే నా తండ్రి యింటికిని నా వంశస్థుల యొద్దకును వెళ్లి నా కుమారునికి పెండ్లి చేయుటకు ఒక పిల్లను తీసికొని రావలెనని నాచేత ప్రమాణము చేయించెను. అప్పుడు నేను నా యజమానునితో ఆ స్త్రీ నా వెంటరాదేమో అని చెప్పినందుకు అతడు ఎవని సన్నిధిలో నేను జీవించుచున్నానో ఆ యెహోవా నీతో కూడ తన దూతను పంపి నీ ప్రయాణము సఫలము చేయును గనుక నీవు నా వంశస్థులలో నా తండ్రి యింట నుండి నా కుమారునికి భార్యను తీసికొని వచ్చెదవు , నీవు నా వంశస్థుల యొద్దకు వెళ్లితివా యీ ప్రమాణము విషయములో ఇక నీకు బాధ్యత ఉండదు, వారు ఆమెను ఇయ్యనియెడల కూడ ఈ ప్రమాణము విషయములో నీకు బాధ్యత ఉండదని చెప్పెను. నేను నేడు ఆ బావి యొద్దకు వచ్చి అబ్రాహామను నా యజమానుని దేవుడవైన యెహోవా, నా ప్రయాణమును నీవు సఫలము చేసిన యెడల నేను ఈ నీళ్ల బావియొద్ద నిలిచియుండగా నీళ్లు చేదుకొనుటకు వచ్చిన చిన్నదానితో నేను నీవు దయచేసి నీ కడవలో నీళ్లు కొంచెము నన్ను త్రాగనిమ్మని చెప్పునప్పుడు నీవు త్రాగుము నీ ఒంటెలకును చేది పోయుదునని యెవతె చెప్పునో ఆమెయే నా యజమానుని కుమారునికి యెహోవా నియమించిన పిల్లయైయుండును గాకని మనవి చేసికొంటిని. నేను నా హృదయములో అట్లు అనుకొనుట చాలింపక ముందే రిబ్కా భుజము మీద తన కడవను పెట్టుకొని వచ్చి ఆ బావిలోనికి దిగిపోయి నీళ్లు చేదుకొని వచ్చెను. అప్పుడు నాకు దాహమిమ్మని నేనామెను అడుగగా ఆమె త్వరగా తన కడవను దించి త్రాగుము, నీ ఒంటెలకును నీళ్లు పెట్టెదనని చెప్పెను గనుక నేను త్రాగితిని. ఆమె ఒంటెలకును నీళ్లు పెట్టెను. అప్పుడు నేను నీవు ఎవరి కుమార్తెవని యడిగినందుకు ఆమె మిల్కా నాహోరునకు కనిన కుమారుడగు బెతూయేలు కుమార్తెనని చెప్పినప్పుడు, నేనామె ముక్కుకు కమ్మియును ఆమె చేతులకు కడియములను పెట్టి నా తలవంచి యెహోవాకు మ్రొక్కి, అబ్రాహామను నా యజమానుని దేవుడైన యెహోవాను స్తోత్రము చేసితిని. ఏలయనగా ఆయన నా యజమానుని యొక్క సహోదరుని కుమార్తెను అతని కుమారునికి తీసికొనునట్లు సరియైన మార్గమందు నన్ను నడిపించెను. కాబట్టి నా యజమానునియెడల మీరు దయను నమ్మకమును కనుపరచినయెడల అదియైనను నాకు తెలియచెప్పుడి, లేనియెడల అదియైనను తెలియ చెప్పుడి. అప్పుడు నేనెటు పోవలెనో అటు పోయెదననగా-

ఈ వచనాలలో ఎలీయెజెరు మొదటినుండీ జరిగిన సంగతులన్నీ రిబ్కా ఇంటివారికి వివరించడం మనం చూస్తాం. దీనినిబట్టి వివాహం విషయంలో ఏదీ దాచకుండా నిజాలు చెప్పడం మనం నేర్చుకోవాలి. వంద అబద్ధాలు ఆడైనా ఒక పెళ్ళి చెయ్యాలనే లోకపు సామెత క్రైస్తవుల విషయంలో వర్తించదు. అది వారికి పాపంగా పరిగణించబడుతుంది. క్రైస్తవ వివాహాలు దేవుని వాక్యం నేర్పించే నిజాయితీ నైతికతలపైనే నిర్మాణమవ్వాలి.

ఆదికాండము 24:50,51 లాబానును బెతూయేలును ఇది యెహోవావలన కలిగిన కార్యము. మేమైతే అవునని గాని కాదనిగాని చెప్ప జాలము ఇదిగో రిబ్కా నీ యెదుట నున్నది, ఆమెను తీసికొని పొమ్ము. యెహోవా సెలవిచ్చిన ప్రకారము ఈమె నీ యజమానుని కుమారునికి భార్య అగునుగాకని ఉత్తరమిచ్చిరి.

ఈ వచనాలలో ఎలీయెజెరు చెప్పిందంతా విశ్వసించిన రిబ్కా కుటుంబీకులు ఇది యెహోవా వలన కలిగిన కార్యమని ఒప్పుకోవడం మనం చూస్తాం. అందుకే రిబ్కాను అతనితో పంపడానికి ఇష్టపడుతున్నారు. ఈవిధంగా అబ్రాహాము విశ్వసించినట్టే దేవుడు ఎలీయెజెరుకు ముందుగా తన దూతను పంపి అతను వచ్చిన కార్యాన్ని సఫలం చేసాడు.

ఆదికాండము 24:52 అబ్రాహాము సేవకుడు వారి మాటలు విని యెహోవాకు సాష్టాంగ నమస్కారము చేసెను.

ఈ వచనంలో ఎలీయెజెరు మరలా దేవునికి సాష్టాంగ నమస్కారం చెయ్యడం మనం చూస్తాం. దీనిని బట్టి ఇతను దేవునిపట్ల భయభక్తులు కలిగిన మంచి విశ్వాసిగా కూడా మనకు కనిపిస్తున్నాడు. దీనంతటికీ అబ్రాహాము చేసిన బోధలే కారణం (ఆదికాండము 18:19).

ఆదికాండము 24:53 తరువాత ఆ సేవకుడు వెండినగలను బంగారునగలను, వస్త్రములను తీసి రిబ్కాకు ఇచ్చెను. మరియు అతడు ఆమె సహోదరునికి తల్లికిని విలువగల వస్తువులు ఇచ్చెను.

ఈ వచనంలో ఎలీయెజెరు అబ్రాహాము ఇంటినుండి తెచ్చిన విలువైన వస్తువులను రిబ్కాకూ ఆమె కుటుంబానికి బహూకరించడం మనం చూస్తాం. ప్రాచీనకాలపు వివాహాల్లో వధువుకు వరుడి తరపు నుండి ఓలిని ఇవ్వడం ఆచారంగా కొనసాగేది, యాకోబు వివాహం విషయంలో కూడా మనం ఇది చూస్తాం. ప్రస్తుతం మన దేశంలో వధువు తరపునుండి వరుడికి కట్నం ఇవ్వడం జరుగుతుంది. అవతలివారి సమృద్ధినుండి ఇష్టపూర్వకంగా ఇస్తున్నదానిని స్వీకరించడం తప్పు కాదు కానీ దానికోసం బలవంతం చెయ్యడం మాత్రం దురాచారమే. వధువు తరపునుండి వచ్చే కట్నం తక్కువయ్యిందని ఆగిపోయిన వివాహాలు ఎన్నో మనకు తెలుసు. అదేవిధంగా వరుడికి ఉన్న ఆస్తిపాస్తులు, అతని‌ తరపు నుండి వధువుకు‌ చెల్లించే ఆభరణాల విషయంలో కూడా అలాంటి సంఘటనలు చోటుచేసుకుంటాయి. ఈవిధంగా ఎవరు చేసినా అది దురాచారమే అని, దేవుడు నియమించిన వివాహ వ్యవస్థను అవమానించడమే అని మనం గుర్తించాలి.

ఆదికాండము 24:54-61 అతడును అతనితోకూడనున్న మనుష్యులును అన్నపానములు పుచ్చుకొని అక్కడ ఆ రాత్రియంతయు నుండిరి. ఉదయమున వారు లేచినప్పుడు అతడు నా యజమానుని యొద్దకు నన్ను పంపించుడని చెప్పగా ఆమె సహోదరుడును ఆమె తల్లియు ఈ చిన్నదాని పదిదినములైనను మాయొద్ద ఉండనిమ్ము, ఆ తరువాత ఆమె వెళ్లవచ్చుననిరి. అప్పుడతడు యెహోవా నా ప్రయాణమును సఫలము చేసెను గనుక నాకు తడవు కానీయక నన్ను పంపించుడి, నా యజమానుని యొద్దకు వెళ్లెదనని చెప్పినప్పుడు వారు ఆ చిన్నదానిని పిలిచి, ఆమె యేమనునో తెలిసికొందమని చెప్పుకొని రిబ్కాను పిలిచి ఈ మనుష్యునితో కూడ వెళ్లెదవా అని ఆమెనడిగినప్పుడు వెళ్లెదననెను. కాబట్టి వారు తమ సహోదరియైన రిబ్కాను ఆమె దాదిని అబ్రాహాము సేవకుని అతనితో వచ్చిన మనుష్యులను సాగనంపినప్పుడు వారు రిబ్కాతో మా సహోదరీ, నీవు వేల వేలకు తల్లివగుదువు గాక, నీ సంతతివారు తమ పగవారి గవినిని స్వాధీనపరచుకొందురు గాక అని ఆమెను దీవింపగా రిబ్కాయు ఆమె పనికత్తెలును లేచి ఒంటెలనెక్కి ఆ మనుష్యుని వెంబడి వెళ్లిరి. అట్లు ఆ సేవకుడు రిబ్కాను తోడుకొని పోయెను.

ఈ వచనాలలో ఎలీయెజెరుతో వెళ్ళడానికి రిబ్కా సిద్ధపడడం అతను ఆమెను తన యజమానుడి ఇంటికి తీసుకునివెళ్ళడం మనం చూస్తాం. ఈవిధంగా ఎలీయెజెరు అబ్రాహాముకు చేసిన ప్రమాణాన్ని నెరవేర్చుకున్నాడు. దీనంతటికీ దేవుడు తన దూతను పంపి సహాయం చెయ్యడమే కారణం అందుకే "ప్రభువు సెలవులేనిది మాట యిచ్చి నెరవేర్చగలవాడెవడు?" (విలాపవాక్యములు 3: 37) అని రాయబడింది.

ఇక్కడ మనం ఒక ప్రాముఖ్యమైన విషయాన్ని గుర్తించాలి. ఎలీయెజెరు రిబ్కా కుటుంబీకులతో అతని ప్రయాణమంతటి గురించీ వివరించినప్పుడు అది యెహోవా వలన కలిగినకార్యమని వారు గ్రహించి ఆమెను అతనితో పంపడానికి సిద్ధపడ్డారు‌. అయితే ఈ సందర్భంలో మళ్ళీ వారు "ఈ మనుష్యునితో కూడ వెళ్లెదవా" అని ఆమె ఇష్టాన్ని కూడా కనుక్కుంటున్నారు. దీనిని బట్టి ఆ కాలంలో దేవుణ్ణి పూర్తిగా ఎరుగనివారికి సైతం వివాహం విషయంలో పిల్లల ఇష్టాలను కనుక్కునే విచక్షణ ఉందని మనకు అర్థమౌతుంది. అలా వారి ఇష్టాలను అనుగుణంగా జరిగించినప్పుడే వారి జీవితం సుఖంగా కొనసాగుతుంది. అయితే దీనికి విరుద్ధంగా కొంతమంది క్రైస్తవులు కూడా వధువు తరపు నుండి వచ్చే కట్నంపై ఆశతోనో వరుడి వెనుకున్న ఆస్తిపాస్తులను బట్టో ఇష్టంలేని వివాహాలు చేస్తూ వారి జీవితాలను నాశనం చేస్తున్నారు. కాబట్టి ఈవిషయంలో క్రైస్తవులమైన మనం అన్యులకంటే మరింత విచక్షణతో నడుచుకోవాలి.

ఆదికాండము 24:62-66 ఇస్సాకు బెయేర్‌ లహాయిరోయి మార్గమున వచ్చి దక్షిణ దేశమందు కాపురముండెను. సాయంకాలమున ఇస్సాకు పొలములో ధ్యానింప బయలువెళ్లి కన్నులెత్తి చూచినప్పుడు ఒంటెలు వచ్చుచుండెను, రిబ్కా కన్నులెత్తి ఇస్సాకును చూచి ఒంటెమీదనుండి దిగి మనల నెదుర్కొనుటకు పొలములో నడుచుచున్న ఆ మనుష్యుడెవరని దాసుని నడుగగా అతడు ఇతడు నా యజమానుడని చెప్పెను గనుక ఆమె ముసుకు వేసికొనెను. అప్పుడా దాసుడు తాను చేసిన కార్యములన్నియు ఇస్సాకుతో వివరించి చెప్పెను.

ఈ వచనాలలో ఎలీయెజెరు రిబ్కాను అబ్రాహాము నివసిస్తున్న ప్రాంతానికి తీసుకురావడం ఆ సమయంలో ఇస్సాకు పొలంలో ధ్యానించడానికి వెళ్ళడం మనం చూస్తాం. ధ్యానం అంటే దేవునితో ఏకాంతంగా గడపడం ప్రార్థించడం అని అర్థం. దీనినిబట్టి అతను కూడా తన తండ్రివలే దేవునితో నడుస్తున్నాడని అర్థమౌతుంది.‌

ఆదికాండము 24:67 ఇస్సాకు తల్లియైన శారా గుడారములోనికి ఆమెను తీసికొనిపోయెను. అట్లు అతడు రిబ్కాను పరిగ్రహింపగా ఆమె అతనికి భార్య ఆయెను. అతడు ఆమెను ప్రేమించెను. అప్పుడు ఇస్సాకు తన తల్లి విషయమై దుఃఖనివారణ పొందెను.

ఈ వచనంలో ఇస్సాకు రిబ్కాను భార్యగా చేసుకుని, చనిపోయిన తన తల్లి గుడారంలోనికి ఆమెను తీసుకువెళ్ళడం, ఆ తర్వాత తన భార్య ప్రేమను బట్టి తన తల్లి విషయంలో దుఃఖనివారణ పొందడం మనం చూస్తాం. ఆదికాండము 17:17 ప్రకారం; ఇస్సాకు జన్మించేసరికి శారా వయస్సు 90 సంవత్సరాలు. ఆదికాండము 23:1 ప్రకారం; ఆమె 127 సంవత్సరాలకు మరణించింది.‌ అప్పటికి ఇస్సాకు వయసు 37 సంవత్సరాలు. ఆదికాండము 25:20 ప్రకారం; ఇస్సాకు రిబ్కాను 40 సంవత్సరాలకు వివాహం చేసుకున్నాడు. దీనిప్రకారం ఇస్సాకు సుమారు 3 సంవత్సరాలపాటు తన తల్లి విషయమై దుఃఖపడుతూ జీవించాడు. కాబట్టి ఎంత గొప్ప విశ్వాసియైనా తనకు ఇష్టమైనవారిని కోల్పోయినప్పుడు ఆ బాధనుండి బయటపడడానికి సమయం పడుతుందని మనం గుర్తించాలి. దీనిని బట్టి తమ జీవితంలో జరిగిన చేదుసంఘటనలను బట్టి బాధపడేవారిని అవిశ్వాసులుగా పరిగణిస్తూ నిందించకుండా దేవుని వాక్యాన్ని బట్టి ఓదార్చే ప్రయత్నం చెయ్యాలి.