44:1-3, 44:4,5, 44:6-9, 44:10-14, 44:15, 44:16,17, 44:18-34

ఆదికాండము 44:1-3
యోసేపు ఆ మనుష్యుల గోనెలు పట్టినంత ఆహార పదార్థములతో వాటిని నింపి ఎవరి రూకలు వారి గోనెమూతిలో పెట్టుమనియు, కనిష్ఠుని గోనె మూతిలో తన వెండి గిన్నెను అతని ధాన్యపు రూకలను పెట్టుమనియు, తన గృహ నిర్వాహకునికి ఆజ్ఞాపింపగా యోసేపు చెప్పినమాట చొప్పున అతడు చేసెను. తెల్లవారినప్పుడు ఆ మనుష్యులు తమ గాడిదలతో కూడ పంపివేయబడిరి.

ఈ వచనాలలో యోసేపు గతంలో చేసినట్టుగానే వారి ఆహార పదార్థాలు ఉన్న గోనెలలో వారు తీసుకువచ్చిన ధనాన్ని వేయించడం, బెన్యామీను గోనెలో అయితే వెండి గిన్నెను కూడా పెట్టించడం మనం చూస్తాం. యోసేపు ఇదంతా కేవలం తన సహోదరులకు వారి తప్పును తెలియచెయ్యడానికి, మరియు వారిలో ఏదైనా మార్పువచ్చిందా అని పరీక్షించడానికి మంచి ఉద్దేశంతో చేస్తున్నాడు కాబట్టి దీనిని ఎవరూ తప్పుపట్టే అవకాశం లేదు. కానీ ఎవరైనా అవతలివారిని అన్యాయంగా ఇబ్బందిపెట్టాలని ఇలా చేస్తే మాత్రం అది దేవుని దృష్టికి పాపమే ఔతుంది.

సామెతలు 24:28 నిర్నిమిత్తముగా నీ పొరుగువానిమీద సాక్ష్యము పలుక కుము నీ పెదవులతో మోసపు మాటలు చెప్పవచ్చునా?

ఆదికాండము 44:4,5
వారు ఆ పట్టణము నుండి బయలుదేరి యెంతో దూరము వెళ్లక మునుపు, యోసేపు తన గృహనిర్వాహకుని చూచి నీవు లేచి ఆ మనుష్యుల వెంటబడి వెళ్లి వారిని కలిసికొని మీరు మేలుకు కీడు చేయనేల? దేనితో నా ప్రభువు పానము చేయునో దేనివలన అతడు శకునములు చూచునో అది యిదే కదా? మీరు దీని చేయుటవలన కాని పని చేసితిరని వారితో చెప్పుమనెను.

ఈ వచనాలలో యోసేపు తన సహోదరులపై మోపబడుతున్న ఆరోపణ ఎంత తీవ్రమైనదో వారికి తెలియచెయ్యడానికి తన గృహనిర్వాహకుడి ద్వారా ఈమాటలు పలికిస్తున్నట్టు మనం చూస్తాం.

ఆదికాండము 44:6-9
అతడు వారిని కలిసికొని ఆ మాటలు వారితో చెప్పినప్పుడు వారు మా ప్రభువు ఇట్లు మాటలాడనేల? ఇట్టి పని చేయుట నీ దాసులకు దూరమవును గాక. ఇదిగో మా గోనెలమూతులలో మాకు దొరికిన రూకలను కనాను దేశములో నుండి తిరిగి తీసికొనివచ్చితిమి. నీ ప్రభువు ఇంటిలోనుండి మేము వెండినైనను బంగారమునైనను ఎట్లు దొంగిలుదుము? నీ దాసులలో ఎవరియొద్ద అది దొరుకునో వాడు చచ్చును గాక; మరియు మేము మా ప్రభువునకు దాసులముగానుందుమని అతనితో అనిరి.

ఈ వచనాలలో యోసేపు సహోదరులు వారిపై మోపబడుతున్న దొంగతనం వారు చెయ్యలేదు కాబట్టి, పైగా గతంలో యోసేపు తమ గోనెల్లోకి వేయించిన ధనాన్ని కూడా వారు తిరిగి తీసుకుని వచ్చి అప్పగించారు కాబట్టి ఇంత ధైర్యంగా సమాధానం చెబుతున్నట్టు మనం చూస్తాం. నిజాయితీని అనుసరించేవారు ఎవరిముందైనా‌ ఇలాంటి ధైర్యాన్ని చాటుకుంటారు.

ఆదికాండము 44:10-14
అందుకతడు మంచిది, మీరు చెప్పినట్టే కానీయుడి. ఎవరియొద్ద అది దొరుకునో అతడే నాకు దాసుడగును, అయితే మీరు నిర్దోషులగుదురని చెప్పెను. అప్పుడు వారు త్వరపడి ప్రతివాడు తన గోనెను క్రిందికి దించి దానిని విప్పెను. అతడు పెద్దవాడు మొదలుకొని చిన్నవానివరకు వారిని సోదా చూడగా ఆ గిన్నె బెన్యామీను గోనెలో దొరికెను. కావున వారు తమ బట్టలు చింపుకొని ప్రతివాడు తన గాడిదమీద గోనెలు ఎక్కించుకొని తిరిగి పట్టణమునకు వచ్చిరి. అప్పుడు యూదాయును అతని సహోదరులును యోసేపు ఇంటికి వచ్చిరి. అతడింక అక్కడనే ఉండెను గనుక వారు అతనియెదుట నేలను సాగిలపడిరి.

ఈ వచనాలలో యోసేపు సహోదరులు ఆ గృహనిర్వాహకుడితో పలికిన మాటల ప్రకారం తమ‌ గోనెలను తెరచి చూపించినప్పుడు అందులో వారు తీసుకువచ్చిన ధనంతో పాటు బెన్యామీను గోనెలో యోసేపు వెండిగిన్నె దొరకడం మనం చూస్తాం. కాబట్టి వారు బెన్యామీను విషయమైన ఆందోళనతో యోసేపు ముందుకు వచ్చి మరోసారి సాగిలపడుతున్నారు

ఆదికాండము 44:15
అప్పుడు యోసేపుమీరు చేసిన యీ పనియేమిటి? నావంటి మనుష్యుడు శకునము చూచి తెలిసికొనునని మీకు తెలియదా అని వారితో అనగా-

ఈ వచనంలో యోసేపు తన సహోదరులతో నావంటి మనుష్యుడు శకునం చూస్తాడని మీకు తెలియదా అంటూ తన హోదాను బట్టి ప్రశ్నించడం మనం చూస్తాం. అయితే యోసేపు శకునం చూసే దైవవిరుద్ధమైన కార్యానికి ఎట్టి పరిస్థితుల్లోనూ పాల్పడడు.

సంఖ్యాకాండము 23:23 నిజముగా యాకోబులో మంత్రము లేదు ఇశ్రాయేలులో శకునము లేదు ఆయాకాలములందు దేవుని కార్యములు యాకోబు వంశస్థులగు ఇశ్రాయేలీయులకు తెలియచెప్పబడును.

అతనికి బెన్యామీను గోనెలో వెండిపళ్ళెం ఉందనే సంగతి శకునం చూడడం వల్ల తెలియలేదు కానీ దానిని అతనే ఆ గోనెలో పెట్టించాడు కాబట్టి తెలిసింది. కలలకు కూడా భావాన్ని చెప్పగలిగే జ్ఞానాన్ని దేవుడు అతనికి అనుగ్రహించినప్పుడు, అతను దైవవిరుద్ధమైన శకునాల జోలికి పోవలసిన అవసరం ఏముంది? కానీ ఐగుప్తీయులకు శకునాలు చూసే ఆచారం ఉండేది కాబట్టి, యోసేపు వారికి ఇంకా ఐగుప్తీయుడిలానే కనపరచుకుంటున్నాడు కాబట్టి వారితో ఈవిధంగా శకునం గురించి ప్రస్తావిస్తున్నాడు.

ఆదికాండము 44:16,17
యూదా యిట్లనెను ఏలినవారితో ఏమి చెప్పగలము? ఏమందుము? మేము నిర్దోషులమని యెట్లు కనుపరచగలము? దేవుడే నీ దాసుల నేరము కనుగొనెను. ఇదిగో మేమును ఎవని యొద్ద ఆ గిన్నె దొరికెనో వాడును ఏలినవారికి దాసులమగుదుమనెను. అందుకతడు అట్లు చేయుట నాకు దూరమవునుగాక. ఎవని చేతిలో ఆ గిన్నె దొరికెనో వాడే నాకు దాసుడుగానుండును. మీరు మీ తండ్రి యొద్దకు సమాధానముగా వెళ్లుడని చెప్పగా-

ఈ వచనాలలో యూదా బెన్యామీనును కాపాడే ప్రయత్నం చేసినప్పుడు దానికి యోసేపు నిరాకరిస్తూ ప్రత్యుత్తరమివ్వడం మనం చూస్తాం. దీనికి కారణం ఏంటంటే గతంలో యాకోబు వారందరికంటే యోసేపును‌ ఎక్కువగా ప్రేమిస్తున్నాడనే అసూయతోనే వారు అతడిని చంపే ప్రయత్నం చేసి చివరికి అమ్మివేసారు. ప్రస్తుతం అతని స్థానంలో బెన్యామీను ఉండి యాకోబు చేత అందరికంటే ఎక్కువగా ప్రేమించబడుతున్నాడు. ఒకవేళ వారింకా ఎలాంటి మార్పు లేకుండా అలాంటి అసూయతోనే ఉండుంటే మీరు సమాధానంగా మీ తండ్రి దగ్గరకు వెళ్ళండి, బెన్యామీనును ఇక్కడ విడిచిపెట్టండని యోసేపు చెప్పినప్పుడు వారు తప్పకుండా వెళ్ళిపోయి ఉండేవారు. అది తెలుసుకోవడానికే యోసేపు ఇదంతా చేస్తున్నాడు. కానీ క్రింది‌ వచనాలలో యూదా పలికిన మాటలవల్ల అతనికి ఆ సందేహం నివృత్తి చెయ్యబడి తన అన్నలు ఇదివరకటిలా కాకుండా మార్పు చెందారని నిశ్చయించుకున్నాడు.

ఆదికాండము 44:18-34
యూదా అతని సమీపించి ఏలినవాడా ఒక మనవి. ఒక మాట యేలినవారితో తమ దాసుని చెప్పుకొననిమ్ము. తమ కోపము తమ దాసునిమీద రవులుకొననీయకుము. తమరు ఫరో అంతవారుగదా ఏలినవాడు మీకు తండ్రియైనను సహోదరుడైనను ఉన్నాడా అని తమ దాసులనడిగెను. అందుకు మేము మాకు ముసలివాడైన తండ్రియు అతని ముసలితనమున పుట్టిన యొక చిన్నవాడును ఉన్నారు. వాని సహోదరుడు చనిపోయెను, వాని తల్లికి వాడొక్కడే మిగిలియున్నాడు, వాని తండ్రి వానిని ప్రేమించుచున్నాడని చెప్పితిమి. అప్పుడు తమరు నేనతని చూచుటకు అతని నా యొద్దకు తీసికొని రండని తమ దాసులతో చెప్పితిరి. అందుకు మేము ఆ చిన్నవాడు తన తండ్రిని విడువలేడు. వాడు తన తండ్రిని విడిచినయెడల వాని తండ్రి చనిపోవునని యేలినవారితో చెప్పితిమి. అందుకు తమరు మీ తమ్ముడు మీతో రానియెడల మీరు మరల నా ముఖము చూడకూడదని తమ దాసులతో చెప్పితిరి. కాబట్టి నా తండ్రియైన తమ దాసుని యొద్దకు మేము వెళ్లి యేలినవారి మాటలను అతనికి తెలియచేసితిమి. మా తండ్రి మీరు తిరిగి వెళ్లి మనకొరకు కొంచెము అహారము కొనుక్కొని రండని చెప్పినప్పుడు మేము అక్కడికి వెళ్లలేము. మా తమ్ముడు మాతో కూడ ఉండినయెడల వెళ్లుదుము. మా తమ్ముడు మాతోనుంటేనే గాని ఆ మనుష్యుని ముఖము చూడలేమని చెప్పితిమి. అందుకు తమ దాసుడైన నా తండ్రి నా భార్య నాకిద్దరిని కనెనని మీరెరుగుదురు. వారిలో ఒకడు నా యొద్దనుండి వెళ్లి పోయెను. అతడు నిశ్చయముగా దుష్టమృగములచేత చీల్చబడెననుకొంటిని, అప్పటినుండి అతడు నాకు కనబడలేదు. మీరు నా యెదుటనుండి ఇతని తీసికొనిపోయిన తరువాత ఇతనికి హాని సంభవించినయెడల నెరసిన వెండ్రుకలుగల నన్ను మృతుల లోకములోనికి దుఃఖముతో దిగిపోవునట్లు చేయుదురని మాతో చెప్పెను. కావున తమ దాసుడైన నా తండ్రియొద్దకు నేను వెళ్లినప్పుడు ఈ చిన్నవాడు మాయొద్ద లేనియెడల అతని ప్రాణము ఇతని ప్రాణముతో పెనవేసికొనియున్నది గనుక ఈ చిన్నవాడు మాయొద్ద లేకపోవుట అతడు చూడగానే చనిపోవును. అట్లు తమ దాసులమైన మేము నెరసిన వెండ్రుకలు గల తమ దాసుడైన మా తండ్రిని మృతల లోకములోనికి దుఃఖముతో దిగిపోవునట్లు చేయుదము. తమ దాసుడనైన నేను ఈ చిన్న వానినిగూర్చి నా తండ్రికి పూటపడి నీ యొద్దకు నేనతని తీసికొని రానియెడల నా తండ్రి దృష్టియందు ఆ నింద నా మీద ఎల్లప్పుడు ఉండునని చెప్పితిని. కాబట్టి తమ దాసుడనైన నన్ను ఈ చిన్నవానికి ప్రతిగా ఏలినవారికి దాసునిగా నుండనిచ్చి యీ చిన్నవాని తన సహోదరులతో వెళ్లనిమ్ము. ఈ చిన్నవాడు నాతోకూడ లేనియెడల నా తండ్రియొద్దకు నేనెట్లు వెళ్లగలను? వెళ్లినయెడల నా తండ్రికి వచ్చు అపాయము చూడవలసి వచ్చునని చెప్పెను.

ఈ వచనాలలో యూదా గతంలో జరిగిన చరిత్రనంతటినీ యోసేపుకు వివరించడం‌ మనం చూస్తాం. గతకాలపు యూదా జీవితంలో మనం యోసేపును అమ్మివేసిన విషయంలోనూ తామారు విషయంలోనూ లోపాలను గుర్తించాం. కానీ ఇక్కడ యూదా పలుకుతున్న మాటలలో అతను మార్పుకు గురయ్యాడని మనకు అర్థమౌతుంది. ఎందుకంటే గతంలో యోసేపును తన తండ్రి ఎక్కువగా ప్రేమిస్తున్నాడని అతనిపై అసూయపడినవారిలో ఇతను కూడా ఉన్నాడు. కానీ ఇక్కడ బెన్యామీను విషయంలో మాత్రం తన తండ్రి చూపుతున్న ప్రేమను బట్టి అలాంటి అసూయకు లోనవ్వడం లేదు. పైగా ఆ ప్రేమకు కారణం అతను వృద్ధాప్యంలో పుట్టిన కుమారుడవ్వడమే అని అర్థం చేసుకున్నాడు.

ఇక్కడ అతను బెన్యామీనును మరలా యాకోబు దగ్గరకు తీసుకుని వెళ్ళకపోతే తనపైకి ఆ నింద వస్తుందనే కాకుండా తన తండ్రికి కలిగే అపాయాన్ని కూడా చూడలేననే కారణంతో ఈవిధంగా మాట్లాడుతున్నాడు. కాబట్టి గతంలో కఠినంగా ప్రవర్తించినవారు ఎప్పుడూ మార్పుచెందకుండా అలానే ఉంటారని మనం భావించకూడదు. ఇక్కడ యూదా విషయంలో ఆ మార్పునే మనం చూస్తున్నాం. ప్రభువగు యేసుక్రీస్తు జన్మించబోయే గోత్రానికి ఇతను మూలపురుషుడు కాబట్టి దేవుడే తన పిలుపుకు తగినట్టుగా ఇతడిలో మార్పును కలిగించాడు. అదేవిధంగా ఇతను ఇప్పటివరకూ యోసేపుకు‌ వివరించిన చరిత్రవల్ల గతంలో తనను ఐగుప్తుకు అమ్మివేసి తమ తండ్రికి ఏం‌చెప్పారో కూడా యోసేపుకు అర్థమైంది.