26:1, 26:2, 26:3, 26:4, 26:5, 26:6,7, 26:8-11, 26:12-14, 26:15, 26:16,17, 26:18-22, 26:23-25, 26:26, 26:27-31, 26:32,33, 26:34,35

ఆదికాండము 26:1
అబ్రాహాము దినములలో వచ్చిన మొదటి కరవు గాక మరియొక కరవు ఆ దేశములో వచ్చెను. అప్పడు ఇస్సాకు గెరారులోనున్న ఫిలిష్తీయుల రాజైన అబీమెలెకు నొద్దకు వెళ్లెను.

ఈ వచనంలో కనాను దేశంలో మరలా కరవు సంభవించినట్టు, అప్పుడు‌ ఇస్సాకు ఫిలిష్తీయుల రాజైన అబీమెలెకు వద్దకు వెళ్ళినట్టుగా మనం చూస్తాం. ఈవిధంగా అబ్రాహాము ఇస్సాకులు‌ ఇద్దరూ కూడా కనాను దేశంలో కరువును ఎదుర్కొన్నారు, తర్వాత కాలంలో‌ యాకోబుకు కూడా అదే పరిస్థితే ఎదురైంది (). గమనించండి; కనాను దేశం అనేది వీరికి వాగ్దాన భూమి, దేవుని మాటచొప్పునే వీరు ఆ దేశంలో సంచరిస్తున్నారు. అయినప్పటికీ ఈ పితరులు ముగ్గురూ ఆ దేశంలో కరువును అనుభవించారు. కాబట్టి విశ్వాసయాత్రలో మన జీవితం ఎలాంటి ఇబ్బందులూ లేకుండా సజావుగా సాగుతుందని ఎప్పుడూ భావించకూడదు. శ్రమ కలిగినప్పుడు దేవుడు‌ మనల్ని విడిచిపెట్టేసాడనే అభిప్రాయానికి కూడా రాకూడదు. ఎందుకంటే ఆ శ్రమలన్నీ దేవుడు మనకు నిర్ణయించిన పాఠాలు ([simple_tooltip content='నాయందు మీకు సమాధానము కలుగునట్లు ఈ మాటలు మీతో చెప్పుచున్నాను. లోకములో మీకు శ్రమ కలుగును; అయినను ధైర్యము తెచ్చుకొనుడి, నేను లోకమును జయించియున్నాననెను']యోహాను 16: 33, 1‌ పేతురు 4: 1).

ఆదికాండము 26:2
అక్కడ యెహోవా అతనికి ప్రత్యక్షమై నీవు ఐగుప్తులోనికి వెళ్లక నేను నీతో చెప్పు దేశమందు నివసించుము.

ఈ వచనంలో దేవుడు ఇస్సాకుకు ఐగుప్తుకు వెళ్ళకుండా నేను నీతో చెప్పే దేశంలో నివసించమని ఆజ్ఞాపించడం మనం చూస్తాం. ఎందుకంటే గతంలో అబ్రాహాము ఈ కనాను దేశంలో కరువు సంభవించినప్పుడు దేవునిమాటను విచారణ చెయ్యకుండా ఐగుప్తుకు వెళ్ళి ఇబ్బందులు ఎదుర్కొన్నాడు. ఇప్పుడు ఇస్సాకు కూడా ఐగుప్తుకు వెళ్ళే ఉద్దేశంతోనే ముందుగా గెరారు దేశానికి చేరుకున్నాడు. అందుకే దేవుడు అతడిని అడ్డుకుంటున్నాడు.

ఆదికాండము 26:3
ఈ దేశమందు పరవాసివై యుండుము. నేను నీకు తోడైయుండి నిన్ను ఆశీర్వదించెదను.

ఈ వచనంలో దేవుడు ఇస్సాకుకు కనాను దేశంలో పరదేశిగా నివసించమని ఆజ్ఞాపించడం మనం చూస్తాం. కనాను దేశాన్ని ఆయన వీరి సంతానానికి స్వాస్థ్యంగా ఇచ్చాడు తప్ప, వీరికి స్వాధీనపరచలేదు. కాబట్టి అందులో వీరు పరదేశులుగానే జీవించాలి (అపొ. కా 7:5, హెబ్రీ 11:9).

ఆదికాండము‌ 26:4
ఏలయనగా నీకును నీ సంతానమునకును ఈ దేశములన్నియు ఇచ్చి, నీ తండ్రియైన అబ్రాహాముతో నేను చేసిన ప్రమాణము నెరవేర్చి, ఆకాశ నక్షత్రములవలె నీ సంతానమును విస్తరింపచేసి ఈ దేశములన్నియు నీ సంతానమునకు ఇచ్చెదను. నీ సంతానమువలన సమస్త భూలోకములోని సమస్త జనులు ఆశీర్వదింపబడుదురు.

ఈ వచనంలో దేవుడు అబ్రాహాముకు చేసిన వాగ్దానాన్ని ఇస్సాకుకు జ్ఞాపకం చెయ్యడం మనం చూస్తాం. ఈవిధంగా ఆయన మాటిమాటికి తన వాగ్దానాన్ని జ్ఞాపకం చెయ్యడానికి ఒక ప్రత్యేకమైన కారణం ఉందని మనం భావించవచ్చు. ఒక మనిషి దేవునిపట్ల ఎంతగొప్ప విశ్వాసంతో ముందుకు సాగుతున్నప్పటికీ కొన్నిసార్లు పరిస్థితుల ప్రభావాన్ని బట్టి అతను అధైర్యపడే అవకాశం ఉంటుంది. అలాంటి సమయంలో దేవుని మాట మాత్రమే అతడికి ఊరట కలిగిస్తుంది. కాబట్టి విశ్వాసులమైన మనం కూడా మన బలహీన సమయంలో దేవుని వాక్యాన్ని ఎక్కువగా ధ్యానిస్తుండాలి, దీనివల్ల మనం ఎంతో ధైర్యపరచబడతాం.

కీర్తనలు 119: 50 నీ వాక్యము నన్ను బ్రదికించి యున్నది నా బాధలో ఇదే నాకు నెమ్మది కలిగించుచున్నది.

ఆదికాండము 26:5
ఏలయనగా అబ్రాహాము నా మాట విని నేను విధించిన దాని నా ఆజ్ఞలను నా కట్టడలను నా నియమములను గైకొనెనని చెప్పెను.

ఈ వచనంలో దేవుడు అబ్రహాము యొక్క ప్రవర్తన గురించి ఇస్సాకుకు జ్ఞాపకం చెయ్యడం మనం చూస్తాం. దీనిద్వారా ఆయన నువ్వు కూడా నీ తండ్రిలా నాపట్ల విధేయత చూపించాలని అతనికి బోధిస్తున్నాడు.

ఆదికాండము 26:6,7
ఇస్సాకు గెరారులో నివసించెను. ఆ చోటి మనుష్యులు అతని భార్యను చూచి ఆమె యెవరని అడిగినప్పుడు అతడు ఆమె నా సహోదరి అని చెప్పెను. ఎందుకనగా రిబ్కా చక్కనిది గనుక ఈ చోటి మనుష్యులు ఆమె నిమిత్తము నన్ను చంపుదురేమో అనుకొని తన భార్య అని చెప్పుటకు భయపడెను.

ఈ వచ‌నాలలో తన భార్యవల్ల గెరారు ప్రాంత ప్రజలనుండి తనకు హాని సంభవిస్తుందని భయపడిన ఇస్సాకు, తన తండ్రియైన అబ్రాహాములానే తన భార్యను చెల్లెలని చెప్పడం మనం చూస్తాం. ఈ సంఘటనకు ముందే దేవుడు అతనికి ప్రత్యక్షమై తన సంతానం గురించి వాగ్దానం చేసాడు, అయినప్పటికీ ఈ సమయంలో ఇస్సాకు ప్రాణ భయానికి లోనై తన భార్య విషయంలో అబద్ధం చెబుతున్నాడు. కాబట్టి విశ్వాసులు తమకు సంభవించే భయానక పరిస్థితుల్లో సత్యానికి వేరుగా ప్రవర్తించకుండా జాగ్రతపడాలి. అబ్రాహాము ఇస్సాకు అంతటి వారే ఇలాంటి పొరపాట్లు చేసారంటే మనం ఇంకా చేసే అవకాశం ఉంది కాబట్టి, మనం ఆ విధంగా తప్పిపోకుండా మరింత జాగ్రతగా ఉండాలనే ఉద్దేశంతో ఈ మాటలన్నీ రాయబడ్డాయి. అందుకే "కాగా నా ప్రియులారా, మీరెల్లప్పుడును విధేయులైయున్న ప్రకారము, నాయెదుట ఉన్నప్పుడు మాత్రమే గాక మరి యెక్కువగా నేను మీతో లేని యీ కాలమందును, భయముతోను వణకుతోను మీ సొంత రక్షణను కొనసాగించుకొనుడి" (ఫిలిప్పీ 2:12) అని ఆజ్ఞాపించబడుతున్నాం.

అదేవిధంగా ఈ సందర్భంలో మనకు కనిపిస్తున్న గెరారు రాజైన అబీమెలెకు, అబ్రాహాము కాలంలో గెరారును పరిపాలించిన అబీమెలెకు ఒకరు కాదు. ఐగుప్తు రాజులను ఫరోలని ఎలా సంబోధిస్తారో ఈ గెరారులో కూడా అలాంటి సాంప్రదాయం ఉండియుండవచ్చు, లేదా ఈ రాజుది తన పితరులను బట్టి అదే పేరు అయ్యుండవచ్చు (లూకా 1:59). ఎందుకంటే; ఆదికాండము 20వ అధ్యాయంలో శారాను తన ఇంటిలో చేర్చుకున్న అబీమెలెకు అబ్రాహాము చనిపోయిన తర్వాత కూడా బ్రతికుండే అవకాశం లేదు. అతను ఇంచుమించు అబ్రాహాము సమకాలికుడు కాబట్టే శారాను మోహించి తన ఇంటచేర్చుకున్నాడు.

ఆదికాండము 26:8-11
అక్కడ అతడు చాలా దినము లుండిన తరువాత ఫిలిష్తీయుల రాజైన అబీమెలెకు కిటికీలో నుండి చూచినప్పుడు ఇస్సాకు తన భార్యయైన రిబ్కాతో సరసమాడుట కనబడెను. అప్పుడు అబీమెలెకు ఇస్సాకును పిలిపించి ఇదిగో ఆమె నీ భార్యయే ఆమె నా సహోదరి అని యేల చెప్పితివని అడుగగా ఇస్సాకు ఆమెను బట్టి నేను చనిపోవుదునేమో అనుకొంటినని అతనితో చెప్పెను. అందుకు అబీమెలెకు నీవు మాకు చేసిన యీ పని యేమి? ఈ జనులలో ఎవడైన ఆమెతో నిర్భయముగా శయనించవచ్చునే. అప్పుడు నీవు మా మీదికి పాతకము తెచ్చిపెట్టు వాడవుగదా అనెను. అబీమెలెకు ఈ మనుష్యుని జోలికైనను ఇతని భార్య జోలికైనను వెళ్లు వాడు నిశ్చయముగా మరణశిక్ష పొందునని తన ప్రజల కందరికి ఆజ్ఞాపింపగా-

ఈ వచనాలలో అబీమెలెకు రిబ్కా ఇస్సాకుకు భార్య అని తెలుసుకుని ఆమె విషయంలో తన ప్రజలకు ఆజ్ఞాపించడం మనం చూస్తాం. దేవుడు అబ్రాహాముకు తోడైయున్నట్టే ఇస్సాకుకు కూడా తోడైయున్నాడు కాబట్టి, ఆయన అబీమెలెకు మనస్సును ఆ విధంగా ప్రేరేపించి, ఇస్సాకుకు కానీ రిబ్కాకు కానీ ఎలాంటి హానీ సంభవించకుండా కాపాడాడు. అయితే ఇక్కడ ఇస్సాకు చెప్పిన అబద్దాన్ని బట్టి అన్యుడైన అబీమెలెకు చేత గద్దించబడవలసి పరిస్థితి అతనికి వచ్చింది. కాబట్టి విశ్వాసులమైన మన ప్రవర్తన అన్యులకు బుద్ధి నేర్పేదిగా ఉండాలి తప్ప వారి చేత బోధించబడేలా ఉండకూడదు. అలాంటి పరిస్థితి మనకే కాదు‌ మనం నమ్మిన దేవునికి కూడా ఎంతో అవమానకరం. ఆయన పిల్లలు తమ సమస్త ప్రవర్తన విషయంలో లోకానికి‌ వెలుగుగా ఉండి ఆ లోకపు చీకటిని ఖండించాలి.

అదేవిధంగా, ధర్మశాస్త్రంలో నీ పొరుగువాని భార్యను ఆశించకూడదనే ఆజ్ఞ లేని కాలంలో కూడా ఆ నియమం అన్యులకు సైతం తెలిసినట్టు అబీమెలెకు మాటల్లో మనం చూస్తాం. దేవుడు ఇలాంటి నైతికపరమైన ఆజ్ఞలను పూర్వం నుండే మానవులకు వారి మనస్సాక్షి ద్వారా బోధించాడు (రోమా 2:14,15).

ఆదికాండము 26:12-14
ఇస్సాకు ఆ దేశమందున్నవాడై విత్తనము వేసి ఆ సంవత్సరము నూరంతలు ఫలము పొందెను. యెహోవా అతనిని ఆశీర్వదించెను గనుక ఆ మనుష్యుడు గొప్పవాడాయెను. అతడు మిక్కిలి గొప్పవాడగువరకు క్రమ క్రమముగా అభివృద్ధి పొందుచు వచ్చెను. అతనికి గొఱ్ఱెల ఆస్తియు గొడ్ల ఆస్తియు దాసులు గొప్ప సమూహమును కలిగినందున ఫిలిష్తీయులు అతనియందు అసూయపడిరి.

ఈ వచనాలలో దేవుని ఆశీర్వాదం కారణంగా ఇస్సాకుకు కలిగిన సమృద్ధిని బట్టి ఫిలిష్తీయులు అతనిపట్ల అసూయపడినట్టు మనం చూస్తాం. వాగ్దాన పుత్రుడైన ఇస్సాకు అన్యులనుండి అసూయను ఎదుర్కొన్నప్పుడు, ఈ క్రింది వచనాల ప్రకారం; ఆ అసూయను బట్టి అతడిని ఇబ్బంది పెట్టినప్పుడు మనకు కూడా ఇలాంటి పరిణామాలు తప్పకుండా చోటుచేసుకుంటాయి. ఆ సమయంలో మనం కృంగిపోకుండా వారితో జగడానికి సిద్ధమవ్వకుండా క్రింది వచనాలలో ఇస్సాకు ప్రవర్తించినట్టుగా వివేకం కలిగి నడుచుకోవాలి. బైబిల్ గ్ర‌ంథంలోని ఎందరో భక్తుల జీవితంలో ఇతరులనుండి వారు ఎదుర్కొన్న అసూయను మనం చూస్తుంటాం, ఉదాహరణకు, యోసేపు, దానియేలు. అయినప్పటికీ వారు ఆ సమయంలో కృంగిపోలేదు, వాక్యం నిర్దేషించిన మార్గానికి విరుద్ధంగా వారితో జగడమాడలేదు.

ఆదికాండము 26:15
అతని తండ్రియైన అబ్రాహాము దినములలో అతని తండ్రి దాసులు త్రవ్విన బావులన్నిటిని ఫిలిష్తీయులు మన్ను పోసి పూడ్చివేసిరి.

ఈ వచనంలో ఇస్సాకుపై ఫిలిష్తీయులకు కలిగిన అసూయవల్ల అతనిని ఇబ్బంది పెట్టే క్రమంలో వారు అబ్రాహాము తవ్వించిన బావులను పూడ్చివేసినట్టు మనం చూస్తాం. ఇక్కడ ఫిలిష్తీయులు అబ్రాహాముతో చేసుకున్న ఒప్పందాన్ని మీరుతూ ఈవిధంగా ప్రవర్తించారు (ఆదికాండము 21:22). కాబట్టి ఒప్పందాలను మీరడం అనేది దేవుణ్ణి ఎరుగని అన్యుల లక్షణంగా మనం గుర్తించాలి, మనమైతే ఇతరులతో చేసుకున్న న్యాయమైన ఒప్పందాల విషయంలో ఎప్పటికీ తప్పిపోకూడదు. దేవుని గుడారంలో (పరలోకం) నివసించేవారికి ఉండవలసిన అర్హతలలో ఇది కూడా ఒకటి.

కీర్తనలు 15: 4 అతడు ప్రమాణము చేయగా నష్టము కలిగినను మాట తప్పడు.

ఆదికాండము 26:16,17
అబీమెలెకు నీవు మాకంటె బహుబలము గలవాడవు గనుక మాయొద్ద నుండి వెళ్లిపొమ్మని ఇస్సాకుతో చెప్పగా ఇస్సాకు అక్కడనుండి వెళ్లి గెరారు లోయలో గుడారము వేసికొని అక్కడ నివసించెను.

ఈ వచనాలలో ఇస్సాకుకు దేవుని ఆశీర్వాదం మూలంగా కలుగుతున్న సమృద్ధిని బట్టి అబీమెలెకు అతనిని వారి ప్రదేశం నుండి వెళ్ళిపోమనడం మనం చూస్తాం. ఎందుకంటే భవిష్యత్తులో ఇస్సాకు వారిపై యుద్ధం ప్రకటిస్తాడని వారు భయపడియుండవచ్చు. ఈ విషయంలో ఇస్సాకు వారితో ఎంతమాత్రం జగడమాడకుండా వారున్న ప్రదేశం నుండి లోయవైపుగా వెళ్ళిపోయాడు. ఎందుకంటే ఆ ప్రదేశం అప్పటికి ఫిలిష్తీయులది, ఆ ప్రాంతంలో ఎవరు ఉండాలో ఎవరు ఉండకూడదో నిర్ణయించే అధికారం వారికి ఉంటుంది. అందుకే ఇస్సాకు తనకున్న బలాన్ని ఉపయోగించి వారితో జగడమాడకుండా న్యాయబద్ధంగా నడుచుకుంటున్నాడు. కాబట్టి విశ్వాసులమైన మనం మనకున్న‌ బలాన్ని బట్టి న్యాయవిరుద్ధంగా ఇతరులతో పోరాడకుండా దేవుని న్యాయానికి భయపడి‌ మనల్ని మనం తగ్గించుకోవాలి.

ఆదికాండము 26:18-22
అప్పుడు తన తండ్రియైన అబ్రాహాము దినములలో త్రవ్విన నీళ్ల బావులు ఇస్సాకు తిరిగి త్రవ్వించెను. ఏలయనగా అబ్రాహాము మృతిబొందిన తరువాత ఫిలిష్తీయులు వాటిని పూడ్చివేసిరి. అతడు తన తండ్రి వాటికి పెట్టిన పేళ్ల చొప్పున తిరిగి వాటికి పేర్లు పెట్టెను. మరియు ఇస్సాకు దాసులు ఆ లోయలో త్రవ్వగా జెలలుగల నీళ్లబావి దొరికెను. అప్పుడు గెరారు కాపరులు ఇస్సాకు కాపరులతో జగడమాడి ఈ నీరు మాదే అని చెప్పిరి గనుక వారు తనతో కలహించినందున అతడు ఆ బావికి ఏశెకు అను పేరు పెట్టెను. వారు మరియొక బావి త్రవ్వినప్పుడు దానికొరకును జగడమాడిరి గనుక దానికి శిత్నా అను పేరు పెట్టెను. అతడు అక్కడ నుండి వెళ్లి మరియొక బావి త్రవ్వించెను. దాని విషయమై వారు జగడమాడలేదు గనుక అతడు ఇప్పుడు యెహోవా మనకు ఎడము కలుగజేసియున్నాడు గనుక యీ దేశమందు అభివృద్ధి పొందుదమనుకొని దానికి రహెబోతు అను పేరు పెట్టెను.

ఈ వచనాలలో ఫిలిష్తీయులు ఇస్సాకు తవ్వించుకుంటున్న బావుల విషయంలో అతనిని మరలా ఇబ్బంది పెడుతున్నట్టు మనం చూస్తాం. అయినప్పటికీ ఇస్సాకు వారితో పోట్లాటకు దిగకుండా ఓర్పు సహనంతో దేవుడేవారి నుండి ఎడము కలుగచేస్తాడని ఎదురుచూసాడు. కాబట్టి విశ్వాసులు సాధ్యమైనంతవరకూ కలహాలకు దూరంగా ఉండాలి.

రోమీయులకు 12: 18 శక్యమైతే మీ చేతనైనంత మట్టుకు సమస్త మనుష్యులతో సమాధానముగా ఉండుడి.

అలా అని మనకు సొంతమైనదానిని ఎవరో ఆక్రమించుకుంటుంటే మౌనంగా ఉండమని దీనర్థం కాదు. ఇస్సాకు ఈ దేశంలో‌ పరవాసిగా నివసిస్తున్నాడు కాబట్టి, ఆ భూమిపై‌ అతనికి పూర్తి హక్కులేదు. అందుచేతనే అతను ఆ భూమి విషయంలో వారితో కొట్లాటకు దిగకుండా దేవునిపై‌ ఆధారపడ్డాడు చివరికి ఆయనే అతనికి ఫిలిష్తీయుల నుంచి‌ ఎడము కలుగచేసాడు. కానీ మనకు సొంతమైన వాటివిషయంలో ఎవరైనా ఆక్రమణకు పాల్పడితే తప్పకుండా చట్టాన్ని ఆశ్రయించాలి, న్యాయపరిథిలోనే వారితో పోరాడాలి.

ఆదికాండము 26:23-25
అక్కడనుండి అతడు బెయేర్షెబాకు వెళ్లెను. ఆ రాత్రియే యెహోవా అతనికి ప్రత్యక్షమై నేను నీ తండ్రియైన అబ్రాహాము దేవుడను, నేను నీకు తోడైయున్నాను గనుక భయపడకుము. నా దాసుడైన అబ్రాహామును బట్టి నిన్ను ఆశీర్వదించి నీ సంతానమును విస్తరింపచేసెదనని చెప్పెను. అక్కడ అతడొక బలిపీఠము కట్టించి యెహోవా నామమున ప్రార్థన చేసి అక్కడ తన గుడారము వేసెను. అప్పుడు ఇస్సాకు దాసులు అక్కడ బావి త్రవ్విరి.

ఈ వచనాలలో దేవుడు మరలా ఇస్సాకుకు ప్రత్యక్షమై భయపడవద్దని, అబ్రాహామును బట్టి నీ సంతానాన్ని విస్తరింపచేస్తానని చెప్పడం‌ మనం చూస్తాం. కనాను దేశంలో అతను చాలా ఇబ్బందులను ఎదుర్కొంటూ తన‌ జీవితాన్ని గడుపుతున్నాడు కాబట్టి, దేవుడు అతనిని ఈవిధంగా ధైర్యపరుస్తున్నాడు. అదేవిధంగా అబ్రాహామును బట్టే ఆయన ఇస్సాకు సంతానాన్ని విస్తరింపచేస్తున్నట్టు ఇక్కడ మనం చూస్తాం.

ఆదికాండము 26:26
అంతట అబీమెలెకును అతని స్నేహితుడైన అహుజతును అతని సేనాధిపతియైన ఫీకోలును గెరారు నుండి అతని యొద్దకు వచ్చిరి.

ఈ వచనంలో గెరారు రాజైన అబీమెలెకు అతని సేనాధిపతితో కలసి ఇస్సాకుతో నిబంధన చేసుకోవడానికి వచ్చినట్టు మనం చూస్తాం. గతంలో గెరారును పరిపాలించిన అబీమెలెకు కూడా ఇదేవిధంగా అబ్రాహాముతో ఒప్పందం చేసుకోవడానికి వచ్చినట్టు మనం చూసాం (ఆదికాండము 21:22). బహుశా తన పితరుడైన అబీమెలెకు చేసినదానిని అనుసరిస్తూనే ఈ అబీమెలెకు కూడా ఇస్సాకుతో ఒప్పందం చేసుకోవడానికి వచ్చాడు. ఎందుకంటే అబ్రాహాము, ఇస్సాకులకు దేవుడు తోడైయుండడాన్ని వారు స్పష్టంగా గ్రహించారు కాబట్టి, ఆ భయంతోనే వీరు అలా చేసారు‌. అయితే ఈ రెండు సందర్భాలలోనూ కూడా అబీమెలకుల సేనాధిపతి పేరు ఫీకోలుగానే రాయబడింది, ఆ కాలంలో తండ్రుల పేరే పిల్లలకు పెట్టబడడం సహజం. అబీమెలెకు తన తండ్రిపేరుతో అబీమెలెకుగా పిలవబడినట్టే ఫీకోలు కూడా అదేవిధంగా పిలువబడుతుండవచ్చు.

ఆదికాండము 26:27-31
ఇస్సాకుమీరు నామీద పగపట్టి మీయొద్దనుండి నన్ను పంపివేసిన తరువాత ఎందునిమిత్తము నా యొద్దకు వచ్చియున్నారని వారినడుగగా వారు నిశ్చ యముగా యెహోవా నీకు తోడైయుండుట చూచితిమి గనుక మనకు, అనగా మాకును నీకును మధ్య నొక  ప్రమాణముండవలెననియు మేము నిన్ను ముట్టక నీకు మేలే తప్ప మరేమియు చేయక నిన్ను సమాధానముగా పంపి వేసితిమి గనుక నీవును మాకు కీడుచేయకుండునట్లు నీతో నిబంధనచేసికొందుమనియు అనుకొంటిమి; ఇప్పుడు నీవు యెహోవా ఆశీర్వాదము పొందిన వాడవనిరి. అతడు వారికి విందుచేయగా వారు అన్నపానములు పుచ్చు కొనిరి. తెల్లవారినప్పుడు వారు లేచి ఒకనితో ఒకడు ప్రమాణము చేసికొనిరి; తరువాత ఇస్సాకు వారిని సాగ నంపగా వారు అతని యొద్దనుండి సమాధానముగా వెళ్లిరి.

ఈ వచనాలలో ఇస్సాకు తనయొద్దకు వచ్చిన గెరారురాజుతో సమాధానపడి ప్రమాణం చెయ్యడం మనం చూస్తాం. గతంలో వారు ఇస్సాకును‌ ఎంతగా ఇబ్బంది పెట్టినప్పటికీ ఈ సందర్భంలో వారు తగ్గించుకుని సమాధానపడడానికి అతని యొద్దకు వచ్చారు‌ కాబట్టి ఇస్సాకు కూడా దానికి అంగీకరిస్తున్నాడు. కాబట్టి విశ్వాసులమైన మనం గతంలో మనకు కీడుచేసినవారు మనతో సమాధానపడాలని చూసినప్పుడు వారిని తృణీకరించకూడదు, వారిపై ద్వేషముంచుకోకూడదు. ఎందుకంటే దేవునివాక్యం మనకు ఎనలేని క్షమాగుణాన్ని నేర్పిస్తుంది.

అయితే ఇస్సాకు ఫిలిష్తీయులు తన యొద్దకు రాగానే‌ మొదట వారు తనపట్ల చేసిన తప్పిదాన్ని బట్టి వారిని గద్దించాడు. ఒకవేళ అతను అలా చెయ్యకపోతే వారివల్ల ఇస్సాకు గతంలో ఎంత ఇబ్బందిపడ్డాడో వారికి తెలియకపోవచ్చు. అలాగే మనం కూడా అవతలివారు తమ తప్పిదాన్ని గ్రహించేవిధంగా వారిని గద్దించగలగాలి. అందుకే యేసుక్రీస్తు ప్రభువు కూడా నీ సహోదరుడు నీయెడల తప్పిదం చేస్తే వాడిని గద్దించమని చెప్పాడు (మత్తయి 18:15). మనం ఇతరులతో సమాధానపడడం ఎంతముఖ్యమో వారి అపరాధాన్ని బట్టి గద్దించడం కూడా అంతే ముఖ్యం.

ఆదికాండము 26:32,33
ఆ దినమందే ఇస్సాకు దాసులు వచ్చి తాము త్రవ్విన బావినిగూర్చి అతనికి తెలియచేసిమాకు నీళ్లు కనబడినవని చెప్పిరి గనుక దానికి షేబ అను పేరు పెట్టెను. కాబట్టి నేటివరకు ఆ ఊరి పేరు బెయేర్షెబా.

ఈ వచనాలలో బెయేర్షెబా అనే పేరు గురించి మనం చూస్తాం, వాస్తవానికి ఈ బావికి బెయేర్షెబా అనేపేరును అబ్రాహామే పెట్టాడు (ఆదికాండము 21:31). అబ్రాహాము చనిపోయాక పిలిష్తీయులు ఆ బావులను పూడ్చివేసారు కాబట్టి ఇస్సాకు మరలా వాటిని తవ్వించి, తన తండ్రి పెట్టిన పేర్లనే వాటికి మళ్ళీ పెట్టేక్రమంలో ఈ పేరును ఇక్కడ ప్రస్తావించాడు (18వ వచనం).

ఆదికాండము 26:34,35
ఏశావు నలువది సంవత్సరములవాడైనప్పుడు హిత్తీయుడైన బేయేరీ కుమార్తెయగు యహూదీతును హిత్తీయుడైన ఏలోను కుమార్తెయగు బాశెమతును పెండ్లి చేసికొనెను. వీరు ఇస్సాకునకును రిబ్కాకును మనోవేదన కలుగజేసిరి.

ఈ వచనాలలో ఏశావు కనానీయుల కుమార్తెలను వివాహం చేసుకున్నట్టు వారు అతని తల్లితండ్రులకు వేదన కలుగచేసినట్టు మనం చూస్తాం. ఏశావు ఇలాంటి పని చెయ్యడంలో ఇస్సాకు అశ్రద్ధ కూడా మనకు స్పష్టంగా కనిపిస్తుంది. 24 వ అధ్యాయం ప్రకారం; అబ్రాహాము‌ ఇతని వివాహం విషయంలో ఎంతో జాగ్రతను తీసుకుంటూ ఎలీయెజెరు ద్వారా తన‌ బంధువుల కుమార్తెను‌ రప్పించాడు. కానీ ఇక్కడ ఇస్సాకు ఏశావు విషయంలో అలాంటి జాగ్రతను తీసుకోకుండా బావులను తవ్వించే పనిలో నిమగ్నమయ్యాడు. ఎందుకంటే ఏశావు ఎవరి కుమార్తెలనైతే పెళ్ళిచేసుకున్నాడో ఆ బేయేరీ, ఏలోనులు వారి వ్యక్తిగత పేర్లు కావు. బేయేరీ అంటే బావులు తవ్వించేవాడని, ఏలోను అంటే ఒప్పందాలు చేసేవాడని అర్థం వస్తుంది. ఇస్సాకుకు తన తండ్రి తవ్వించిన బావులను మళ్ళీ తవ్వించే పనిలో సహాయపడినవారే ఈ ఇద్దరు. ఆ విధంగా ఇస్సాకు కుటుంబంతో వారి కుటుంబానికి సాంగత్యం ఏర్పడి ఏశావు వారి కుమార్తెలను వివాహం చేసుకున్నాడు. ఒకవిధంగా ఇది ఏశావు దేవుని చేత తృణీకరించబడ్డాడు అనేందుకు కూడా సాక్ష్యంగా ఉంది. అదేవిధంగా, ఆదికాండము 36 వ అధ్యాయంలో రాయబడిన ఏశావు భార్యల పేర్లకూ ఈ సందర్భంలో కనిపిస్తున్న పేర్లకూ మధ్య కాస్త వైరుధ్యం కనిపిస్తుంది, దాని గురించి ఆ అధ్యాయపు వ్యాఖ్యానంలో చూద్దాం.