39:1, 39:2, 39:3, 39:4, 39:5,6, 39:7, 39:8,9, 39:10, 39:11,12, 39:13-16, 39:17-20, 39:21-23

ఆదికాండము 39:1 యోసేపును ఐగుప్తునకు తీసికొని వచ్చినప్పుడు ఫరో యొక్క ఉద్యోగస్థుడును రాజసంరక్షక సేనాధిపతియునైన పోతీఫరనునొక ఐగుప్తీయుడు, అక్కడికి అతని తీసికొని వచ్చిన ఇష్మాయేలీయులయొద్ద నతని కొనెను.

ఈ వచనంలో ఇష్మాయేలీయులకు అమ్మబడిన యోసేపు మరలా ఐగుప్తులోని ఫరో ఉద్యోగికి అమ్మివెయ్యబడడం మనం చూస్తాం. ఇదంతా దేవుని సార్వభౌమ నిర్ణయం. అందుకే "వారికంటె ముందుగా ఆయన యొకని పంపెను. యోసేపు దాసుడుగా అమ్మబడెను. వారు సంకెళ్లచేత అతని కాళ్లు నొప్పించిరి ఇనుము అతని ప్రాణమును బాధించెను. అతడు చెప్పిన సంగతి నెరవేరువరకు యెహోవా వాక్కు అతని పరిశోధించుచుండెను" (కీర్తనలు 105:17-19) అని రాయబడింది. యోసేపు కన్న కలలు నెరవేరాలన్నా కరువులో యాకోబు కుటుంబం కాపాడబడాలన్నా అతను ఇలా ఐగుప్తుకు చేరాలి, అది కూడా మొదట పోతిఫరు ఇంటికి చేరాలి.

రోమా 8:28 దేవుని ప్రేమించువారికి, అనగా ఆయన సంకల్పము చొప్పున పిలువబడిన వారికి, మేలు కలుగుటకై సమస్తమును సమకూడి జరుగుచున్నవని యెరుగుదుము.

ఆదికాండము 39:2 యెహోవా యోసేపునకు తోడైయుండెను గనుక అతడు వర్ధిల్లుచు తన యజమానుడగు ఆ ఐగుప్తీయుని యింటనుండెను.

ఈ వచనంలో బానిసగా అమ్మబడిన యోసేపుకు దేవుడు తోడైయున్నట్టు, అతను వర్ధిల్లుతున్నట్టు మనం చూస్తాం. గుర్తుంచుకోండి; దేవునిపై ఆధారపడిన విశ్వాసి ఎక్కడున్నా ఏ పరిస్థితిలో ఉన్నా దేవుడు అతనికి తోడయ్యేయుంటాడు. ముఖ్యంగా ఆయన సార్వభౌమ నిర్ణయం చొప్పున అలాంటి పరిస్థితిలో ప్రవేశించిన వ్యక్తికి. కాబట్టి ఆయన చిత్తానుసారంగా జీవిస్తున్న ఏ విశ్వాసీ కూడా అధైర్యపడవలసిన లేక ఒంటరినని కృంగిపోవలసిన అవసరం లేదు. అందుకే దేశంలో క్లిష్టపరిస్థితులను ఎదుర్కొంటున్న హబక్కూకు "అంజూరపు చెట్లు పూయకుండినను ద్రాక్షచెట్లు ఫలింపకపోయినను ఒలీవచెట్లు కాపులేకయుండినను చేనిలోని పైరు పంటకు రాకపోయినను గొఱ్ఱెలు దొడ్డిలో లేకపోయినను సాలలో పశువులు లేకపోయినను నేను యెహోవాయందు ఆనందించెదను నా రక్షణకర్తయైన నా దేవునియందు నేను సంతోషించెదను. ప్రభువగు యెహోవాయే నాకు బలము ఆయన నా కాళ్లను లేడికాళ్లవలె చేయును ఉన్నతస్థలముల మీద ఆయన నన్ను నడవచేయును" (హబక్కూకు 3:17-19) అని అంటున్నాడు.

అదేవిధంగా యోసేపు తన యజమానుడికి లోబడి జీవిస్తున్నాడు, అక్కడినుండి పారిపోయే ప్రయత్నం కానీ అతనికి అవిధేయత చూపించడం కానీ చెయ్యట్లేదు. ఎందుకంటే పోతిఫరు అతడిని కొనుక్కున్నాడు కాబట్టి, అతనికి లోబడియుండడం న్యాయమని యోసేపు భావించాడు. ఆయా వృత్తుల్లో ఒకరిక్రింద పని చేస్తున్నవారంతా ఈ విషయం బాగా గుర్తుంచుకోవాలి. "దాసులైనవారు అన్ని విషయములయందు మన రక్షకుడగు దేవుని ఉపదేశమును అలంకరించునట్లు, తమ యజమానులకు ఎదురుమాట చెప్పక, ఏమియు అపహరింపక, సంపూర్ణమైన మంచి నమ్మకమును కనుపరచుచు, అన్ని కార్యములయందు వారిని సంతోషపెట్టుచు, వారికి లోబడియుండవలెనని వారిని హెచ్చరించుము" (తీతుకు 2:9,10) అంటూ ఇది మనకు నియమంగా చెప్పబడింది.

ఆదికాండము 39:3 యెహోవా అతనికి తోడై యుండెననియు, అతడు చేసినదంతయు అతని చేతిలో యెహోవా సఫలము చేసెననియు అతని యజమానుడు చూచినప్పుడు-

ఈ వచనంలో పోతిఫరు యోసేపుపై దేవుని కాపుదలనూ అతనిని బట్టి తనకు కలుగుతున్న ఆశీర్వాదాన్ని గమనించినట్టు మనం చూస్తాం.  దేవుడు తన పిల్లలను ఘనపరచడానికి, వారిపై దయ పుట్టించడానికి భక్తిహీనులను కూడా ఆశీర్వదిస్తాడు. యాకోబు విషయంలో కూడా ఇదే జరిగింది (ఆదికాండము 30:27).

ఆదికాండము 39:4 యోసేపు మీద అతనికి కటాక్షము కలిగెను గనుక అతని యొద్ద పరిచర్య చేయువాడాయెను. మరియు అతడు తన యింటి మీద విచారణకర్తగా అతని నియమించి తనకు కలిగినదంతయు అతనిచేతికప్పగించెను.

ఈ వచనంలో దేవుడు యోసేపుకు తోడైయుండి అతనిని బట్టి తనను కూడా ఆశీర్వదించడం గమనించిన పోతిఫరు యోసేపుపై కటాక్షం‌ చూపించి అతన్ని ఘనపరచడం మనం చూస్తాం. గుర్తుంచుకోండి; విశ్వాసులకు ఎవరినుండైనా కటాక్షం కలిగిందంటే దానికి కారణం దేవుడే. ఇది మనకు ఐగుప్తీయులకు ఇశ్రాయేలీయుల పట్ల కలిగిన కటాక్షం విషయంలో స్పష్టంగా అర్థమౌతుంది (నిర్గమకాండము 3:21,22, 12:36). యాకోబు ఏశావుల వృత్తాంతంలో కూడా ఇదే గమనిస్తున్నాం (ఆదికాండము 33:10).

ఆదికాండము 39:5,6 అతడు తన యింటిమీదను తనకు కలిగినదంతటిమీదను అతని విచారణకర్తగా నియమించినకాలము మొదలుకొని యెహోవా యోసేపు నిమిత్తము ఆ ఐగుప్తీయుని యింటిని ఆశీర్వదించెను. యెహోవా ఆశీర్వాదము ఇంటిలోనేమి పొలములోనేమి అతనికి కలిగిన సమస్తము మీదను ఉండెను. అతడు తనకు కలిగినదంతయు యోసేపు చేతికప్పగించి, తాను ఆహారము తినుట తప్ప తనకేమి ఉన్నదో ఏమి లేదో విచారించినవాడు కాడు. యోసేపు రూపవంతుడును సుందరుడునైయుండెను.

ఈ వచనాలలో పోతిఫరు తనకు కలిగిందంతా యోసేపుకు అప్పగించి తాను విశ్రాంతిగా ఉంటు‌నట్టు మనం చూస్తాం.‌ దీనిప్రకారం యోసేపును దేవుడు వర్ధిల్లింపచేస్తున్నప్పుడు అతను కూడా కష్టపడి తన బాధ్యతలు నిర్వర్తిస్తున్నాడు. కాబట్టి దేవుడు కార్యం చేసేటప్పుడు మానవుడు కూడా కష్టపడాలి.‌ అంతా దేవుడే చూసుకుంటాడు అన్నట్టు సోమరిలా బ్రతకకూడదు.

ఆదికాండము 39:7 అటుతరువాత అతని యజమానుని భార్య యోసేపు మీద కన్నువేసి తనతో శయనించుమని చెప్పెను.

ఈ వచనంలో యోసేపు సుందరుడై ఉండడం గమనించిన పోతిఫరు భార్య అతనితో కామవాంఛను తీర్చుకునే ప్రయత్నం చేస్తున్నట్టు మనం చూస్తాం. ఇతరులపై కామపూరితమైన కోరికలు ముఖ్యంగా చూపులతోనే ప్రారంభమౌతాయి. దీనికి "స్త్రీ పురుషులు" ఎవ్వరూ మినహాయింపు కాదు. కాబట్టి విశ్వాసులమైన మనం యోబులా మన చూపుల‌ విషయంలో జాగ్రత్త వహించాలి (యోబు 31:1,2). "నేను మీతో చెప్పునదేమనగా ఒక స్త్రీని (స్త్రీలైతే పురుషుడ్ని) మోహపుచూపుతో చూచు ప్రతివాడు అప్పుడే తన హృదయమందు ఆమెతో వ్యభిచారము చేసినవాడగును" (మత్తయి 5:28,29) అంటూ యేసుక్రీస్తు చేసిన హెచ్చరికలను మనసులో నిలుపుకోవాలి. మన కన్నులు ఎక్కువగా వాక్యంవైపు చూస్తున్నప్పుడే మన ధ్యాస ఎక్కువగా పరమందున్న దేవునిపై ఉన్నప్పుడే ఈ మోహపు చూపుల విషయంలోనూ కామసంబంధమైన కోరికల విషయంలోనూ జాగ్రత్తవహించగలం.

ఆదికాండము 39:8,9 అయితే అతడు ఒప్పక నా యజమానుడు తనకు కలిగినదంతయు నా చేతికప్పగించెనుగదా, నా వశమున తన యింటిలో ఏమి ఉన్నదో అతడెరుగడు. ఈ యింటిలో నాకంటె పైవాడు ఎవడును లేడు. నీవు అతని భార్యవైనందున నిన్ను తప్ప మరి దేనిని నా కప్పగింపక యుండలేదు. కాబట్టి నేనెట్లు ఇంత ఘోరమైన దుష్కార్యము చేసి దేవునికి విరోధముగా పాపము కట్టుకొందునని తన యజమానుని భార్యతో అనెను.

ఈ వచనాలలో యోసేపు పోతిఫరు భార్యకు నచ్చచెప్పడం మనం చూస్తాం. ఇక్కడ "నేనెట్లు ఇంత ఘోరమైన దుష్కార్యము చేసి దేవునికి విరోధముగా పాపము కట్టుకొందును" అనే మాటలు చాలా ప్రాముఖ్యమైనవి. ఎందుకంటే విశ్వాసుల పాపం మొదట దేవునికే విరుద్ధంగా చెయ్యబడుతుంది. అనగా మొదట ఆయననే ఎక్కువగా నొప్పిస్తుంది. అందుకే దావీదు బెత్షబతో పాపం చేసినప్పుడు "నీకు కేవలము నీకే విరోధముగా నేను పాపము చేసియున్నాను నీ దృష్టియెదుట నేను చెడుతనము చేసియున్నాను" (కీర్తనలు 51:4) అంటూ పశ్చాత్తాతపడుతున్నాడు. అలానే మనుషుల పాపాన్ని బట్టి దేవుడు ఎంతగా నొచ్చుకుంటాడో జలప్రళయసందర్భంలో మనం చదువుతాం (ఆదికాండము 6:5,6).

ఇక దేవునికి భయపడి యోసేపు కనుపరుస్తున్న నిజాయితీని గమనించండి. అతను తనను నమ్మి సమస్తాన్నీ తనకు అప్పగించిన ఫోతిఫరుకు ద్రోహం చెయ్యాలనుకోవట్లేదు. నమ్మి మేలు చేసిన స్నేహితుల భాగస్వాములతోనూ బంధువుల భాగస్వాములతోనూ అక్రమసంబంధాలకు పాల్పడే నీచులంతా ఈ సంఘటనను బట్టి బుద్ధి తెచ్చుకోవాలి. సమాజంలో అలాంటి నీచాలు ఎన్నెన్నో చూస్తున్నాం కాబట్టి ఈమాటలు ప్రత్యేకంగా చెబుతున్నాను.

ఆదికాండము 39:10 దిన దినము ఆమె యోసేపుతో మాటలాడుచుండెను గాని అతడు ఆమెతో శయనించుటకైనను ఆమెతోనుండుటకైనను ఆమె మాట విన్నవాడుకాడు.

ఈ వచనంలో పోతిఫరు భార్య ప్రతీరోజూ యోసేపును ఇబ్బంది (tempt) పెడుతున్నట్టు, అతను ప్రతీసారీ ఆమెనుండి తప్పించుకుంటున్నట్టు మనం చూస్తాం. సాధారణంగా చాలామంది విశ్వాసులు పాపపు శోధనను కొన్నిసార్లు జయించినప్పటికీ ఆ పాపం పదేపదే బలవంతపెడుతుంటే (tempt చేస్తుంటే) లొంగిపోతుంటారు. యోసేపు అలా చెయ్యలేదు. పాపం నుండి తనకు ఎన్నిసార్లు శోధన ఎదురౌతున్నా అన్నిసార్లూ దానిని జయిస్తూ వచ్చాడు. దీనంతటికీ దేవునిపట్ల అతనికున్న భయభక్తులే కారణం. విశ్వాసులు ఈ విషయాన్ని చాలా జాగ్రతగా గుర్తుంచుకోవాలి. అందుకే "యెహోవాయందు భయభక్తులు కలిగియుండుటవలన మనుష్యులు చెడుతనమునుండి తొలగిపోవుదురు" (సామెతలు 16:6) అని రాయబడింది. అలానే "నీ యెదుట నేను పాపము చేయకుండునట్లు నా హృదయములో నీ వాక్యము ఉంచుకొని యున్నాను" (కీర్తనలు 119: 11) అని కూడా చదువుతున్నాం.

ఇక్కడ మరో ప్రాముఖ్యమైన విషయాన్ని తెలియచెయ్యాలనుకుంటున్నాను. ఈ సంఘటన జరిగే సమయానికి యోసేపు లేత యవ్వనప్రాయంతో పాపానికి సులభంగా ఆకర్షితమయ్యే వయసులో ఉన్నాడు. పైగా కుటుంబ ప్రేమకు దూరమై ఒంటరిగా నివసిస్తున్నాడు. ఆ సమయంలో పోతిఫరు భార్య అతడిని ఆశించి, లైంగికసుఖమే కాదు మానసిక ఓదార్పు కూడా ఇచ్చేలా మాట్లాడుతుండవచ్చు. అలాంటి వ్యక్తుల మాటలు అలానే ఉంటాయి. "జారస్త్రీ పెదవులనుండి తేనె కారును దాని నోటి మాటలు నూనెకంటెను నునుపైనవి" (సామెతలు 5: 3) అని స్పష్టంగా రాయబడిందిగా!.

అయినప్పటికీ ఈ యోసేపు పాపం‌వల్ల కలిగే ఓదార్పును కానీ సుఖాన్ని కానీ ఆశించకుండా దేవునిలోనే తనను తాను ఓదార్చుకుంటున్నాడు. ఎందుకంటే మొదట సుఖంగానూ ఓదార్పుగానూ అనిపించినా చివరికి ఆ పాపం వల్ల కలిగే పర్యవసానం (ఫలం) ఏంటో భక్తుడైన అతనికి బాగా తెలుసు.

సామెతలు 5:4 దానివలన కలుగు ఫలము ముసిణిపండంత చేదు అది రెండంచులుగల కత్తియంత పదునుగలది.

కాబట్టి అక్రమ‌ సంబంధాలను ఓదార్పుగా భావిస్తున్నవారు, వాటిని బట్టి యవ్వనవాంఛలు తీర్చుకుంటున్నవారు "అది గాయపరచి పడద్రోసినవారు అనేకులు అది చంపినవారు లెక్కలేనంతమంది. దాని యిల్లు పాతాళమునకుపోవు మార్గము ఆ మార్గము మరణశాలలకు దిగిపోవును" (సామెతలు 7:26,27) అనే వాస్తవం గ్రహించి జాగ్రత్తగా ఉండాలి. అలాంటి సంఘటనలెన్నో చూస్తునే ఉన్నాం‌. యోసేపులా దేవునిపట్ల భయభక్తులతో వాటిలో చిక్కుకోకుందాం.

అయితే మనకిక్కడ పోతిఫరు భార్య యోసేపుతో అలా వ్యవహరిస్తున్నప్పుడు ఆ విషయం అతను తన యజమానుడి దృష్టికి ఎందుకు తీసుకునివెళ్ళలేదనే సందేహం కలుగుతుంది. బహుశా యోసేపుతో ఆమె అప్పటివరకూ సున్నితంగానే వ్యవహరిస్తూ అతడిని ప్రేరేపిస్తుంది. కాబట్టి అతను ఆ ప్రేరణను అప్పటివరకూ జయించినట్టే ఇకపై కూడా జయించగలననే నిశ్చయంతో ఉండుంటాడు. అందుకే ఆమెను తన భర్తముందు అవమానించడం ఇష్టంలేక అలా చెప్పకుండా ఉండుంటాడు. ప్రాముఖ్యంగా ఆమె స్త్రీ అని కూడా ఆలోచించుంటాడు. కానీ మనమైతే అలాంటి పరిస్థితి ఎదురైనప్పుడు తప్పకుండా దానిని సరిచెయ్యగలవారికి వెంటనే తెలియచెయ్యాలి. లేకుంటే యోసేపులా చిక్కుల్లో పడే అవకాశం ఉంది. అందుకే ప్రభువు మనల్ని "ఇదిగో తోడేళ్లమధ్యకు గొఱ్ఱెలను పంపినట్టు నేను మిమ్మును పంపుచున్నాను గనుక పాములవలె వివేకులును పావురములవలె నిష్కపటులునైయుండుడి" (మత్తయి 10:16) అని హెచ్చరించాడు.

ఆదికాండము 39:11,12 అట్లుండగా ఒకనాడు అతడు తన పనిమీద ఇంటిలోపలికి వెళ్లినప్పుడు ఇంటి మనుష్యులలో ఎవరును అక్కడ లేరు. అప్పుడామె ఆతని వస్త్రము పట్టుకొని తనతో శయనింపుమని చెప్పగా అతడు తన వస్త్రమును ఆమె చేతిలో విడిచిపెట్టి తప్పించుకొని బయటికి పారిపోయెను.

ఈ వచనాలలో యోసేపును పోతిఫరు భార్య బలవంతం చెయ్యడం, అతను ఆమె చేతినుండి తప్పించుకుపోవడం మనం చూస్తాం. గమనించండి; ఆ సమయంలో అక్కడ ఎవరూ లేరు. అంటే ఎవరో చూస్తారనే భయం అతనికి లేదు. కానీ అతను తనపై ఎప్పుడూ దృష్టి నిలిపిన దేవునికి భయపడ్డాడు. ఎందుకంటే మనం చేసే ఏ కార్యమూ ఏ పాపమూ ఆయనకు మరుగైయుండదు. అందుకే "నీ ముఖకాంతిలో మా రహస్యపాపములు కనబడు చున్నవి" (కీర్తనలు 90:8), "పాతాళమును అగాధకూపమును యెహోవాకు కనబడుచున్నవి నరుల హృదయములు మరి తేటగా ఆయనకు కన బడును గదా?" (సామెతలు 15:11) అని రాయబడింది. కాబట్టి మనుషులకు భయపడి కాదు మొదట దేవునికి భయపడే పాపం నుండి పారిపోవాలి. మనుషులు లేని ప్రదేశంలో (గదిలో) చెయ్యగలిగే పాపాలతో సహా.

మరో ప్రాముఖ్యమైన విషయం ఏంటంటే; ఈ యోసేపు ఫోతిఫరు భార్యతో రాజీపడడం వల్ల అతనికి చాలా ప్రయోజనాలు కలుగుతాయి. కావాలనుకుంటే అతను తన తండ్రి వద్దకు వెళ్ళివచ్చేలా ఆమె తన భర్తతో మాట్లాడి సహాయం చెయ్యగలుగుతుంది. అయినప్పటికీ అతను ఆమె నుండి పారిపోయాడు. ఎందుకంటే అతను తన కష్టాలను‌ అధిగమించడానికి దైవవిరుద్ధమైన మార్గంలో పయనించి ఆయన శ్రేష్టమైన ప్రేమనూ సహాయాన్నీ కోల్పోవాలి అనుకోలేదు. కాబట్టి విశ్వాసులు పాపంవల్ల తమకు ఎలాంటి ప్రయోజనాలు చేకూరే అవకాశం ఉన్నప్పటికీ దాని నుండి పారిపోవాలే తప్ప, అప్పగించుకోకూడదు. అప్పగించుకుంటే చివరికి దాని పర్యవసానం దారుణంగానే ఉంటుందని మరోసారి జ్ఞాపకం చేస్తున్నాను.

సామెతలు 7:26,27 అది గాయపరచి పడద్రోసినవారు అనేకులు అది చంపినవారు లెక్కలేనంతమంది దాని యిల్లు పాతాళమునకుపోవు మార్గము ఆ మార్గము మరణశాలలకు దిగిపోవును.

ఆదికాండము 39:13-16 అతడు తన వస్త్రమును ఆమె చేతిలో విడిచి తప్పించుకొనిపోవుట ఆమె చూచినప్పుడు తన యింటి మనుష్యులను పిలిచిచూడుడి, అతడు మనలను ఎగతాళి చేయుటకు ఒక హెబ్రీయుని మనయొద్దకు తెచ్చియున్నాడు. నాతో శయనింపవలెనని వీడు నా యొద్దకు రాగా నేను పెద్దకేక వేసితిని. నేను బిగ్గరగా కేకవేయుట వాడు విని నా దగ్గర తన వస్త్రమును విడిచిపెట్టి తప్పించుకొని బయటికి పారిపోయెనని వారితో చెప్పి అతని యజమానుడు ఇంటికి వచ్చువరకు అతని వస్త్రము తనదగ్గర ఉంచుకొనెను.

ఈ వచనాలలో యోసేపు తనకిక లొంగడని భావించిన పోతిఫరు భార్య అతనిపై మానభంగ ఆరోపణను మోపి, అతనిని హింసకు గురిచెయ్యాలని ప్రయత్నించడం మనం చూస్తాం. విశ్వాసులు లోకంతో రాజీపడకుండా యథార్థంగా జీవిస్తున్నప్పుడు వారిపై ఇలాంటి అన్యాయపు ఆరోపణలూ హింసలూ తప్పకుండా వస్తుంటాయి. అందుకే "అపరిమితమైన ఆ దుర్వ్యాపారమునందు తమతో కూడ మీరు పరుగెత్తకపోయినందుకు వారు ఆశ్చర్యపడుచు మిమ్మును దూషించుచున్నారు" (1 పేతురు 4:4) అని రాయబడింది. అయినప్పటికీ యోసేపులా పోరాడుతూ దానివల్ల ఎలాంటి శ్రమలు అనుభవించడానికైనా సిద్ధపడాలి. ఈ వాక్యభాగం చదవండి.

1 పేతురు 2:19,20 ఎవడైనను అన్యాయముగా శ్రమపొందుచు, దేవుని గూర్చిన మనస్సాక్షి కలిగి, దుఃఖము సహించినయెడల అది హితమగును. తప్పిదమునకై దెబ్బలు తినినప్పుడు మీరు సహించినయెడల మీకేమి ఘనము? మేలుచేసి బాధపడునప్పుడు మీరు సహించినయెడల అది దేవునికి హితమగును.

అదేవిధంగా కామసంబంధమైన ప్రేమ చివరికి ఎంత క్రూరంగా మారుతుందో ఈ పోతిఫరు భార్య చేసినదానిని బట్టి మనం గ్రహించాలి. ఆమె తన కామవాంఛను తీర్చుకోడానికి యోసేపును ప్రేమించి అతనిని లొంగదీసుకోవడానికి చాలా ప్రయత్నించింది. తీరా ఆ కోరిక తీరదని తెలిసినప్పుడు ద్వేషంతో అతనికి హాని చెయ్యడానికి సిద్ధపడింది. కాబట్టి యవ్వనస్తులు ఈ విషయంలో చాలా జాగ్రతగా ఉండాలి. ప్రస్తుత సమాజంలో ఇలాంటి అన్యాయపు ఆరోపణలూ హింసలెన్నిటినో మనం చూస్తూనే ఉన్నాం.

ఆదికాండము 39:17-20 అప్పుడామె తన భర్తతో ఈ మాటల చొప్పున చెప్పెను నీవు మనయొద్దకు తెచ్చిన ఆ హెబ్రీదాసుడు నన్ను ఎగతాళి చేయుటకు నాయొద్దకు వచ్చెను. నేను బిగ్గరగా కేక వేసినప్పుడు వాడు తన వస్త్రము నా దగ్గర విడిచిపెట్టి తప్పించుకొని బయటికి పారిపోయెననెను. కాబట్టి అతని యజమానుడు ఇట్లు నీ దాసుడు నన్ను చేసెనని తన భార్య తనతో చెప్పిన మాటలు విన్నప్పుడు కోపముతో మండిపడి అతనిని పట్టుకొని రాజు ఖైదీలు బంధింపబడు చెరసాలలో వేయించెను. అతడక్కడ చెరసాలలో ఉండెను.

ఈ వచనాలలో తన భార్య మాటలను విన్న పోతిఫరు కోపంతో యోసేపును పట్టుకుని చెరశాలలో వేయించడం మనం చూస్తాం. అయితే ఇక్కడ పోతిఫరు తలచుకుంటే యోసేపును చంపగలడు కానీ చంపకుండా చెరశాలలో మాత్రమే వేయించాడు. ఎందుకంటే మొదటిగా తన భార్యమాటలు విన్నప్పుడు అతను కోపంతో మండిపడినప్పటికీ తర్వాత అతను యోసేపు నిర్దోషి అని గ్రహించియుండవచ్చు. అయినప్పటికీ తన భార్యను బట్టి యోసేపును చెరశాలలోనైనా వేయించక తప్పకపోవచ్చు. ఒకవేళ ఈ పోతిఫరు యోసేపు నిర్దోషి అని గ్రహించకపోతే చెరశాలలో కూడా అతడికి ఎందుకు ఘనపరుస్తాడు (ఆదికాండము 40:1-4).

ఆదికాండము 39:21-23 అయితే యెహోవా యోసేపునకు తోడైయుండి, అతనియందు కనికరపడి అతనిమీద ఆ చెరసాలయొక్క అధిపతికి కటాక్షము కలుగునట్లు చేసెను. చెరసాల అధిపతి ఆ చెరసాలలోనున్న ఖైదీలనందరిని యోసేపు చేతి కప్పగించెను. వారక్కడ ఏమి చేసిరో అదంతయు అతడే చేయించువాడు. యెహోవా అతనికి తోడైయుండెను గనుక ఆ చెరసాల అధిపతి అతని చేతికి అప్పగింపబడిన దేనిగూర్చియు విచారణ చేయకయుండెను. అతడు చేయునది యావత్తు యెహోవా సఫలమగునట్లు చేసెను.

ఈ వచనాలలో కూడా దేవుడు యోసేపుపై చెరశాల అధిపతికి కటాక్షం కలిగించడం, అతను ఖైదీలందరికీ యోసేపుకు అప్పగించడం మనం చూస్తాం. జరిగిన ఈ సంఘటనలను జాగ్రతగా పరిశీలిస్తే యోసేపు శ్రమలకు లోనైన ప్రతీసారీ దేవుడు అతనికి తోడైయున్నాడని నొక్కిచెప్పబడడడం గమనిస్తున్నాం. దీనిప్రకారం విశ్వాసులకు తప్పకుండా శ్రమలు వస్తాయి, ఎందుకంటే ఆ శ్రమలు వారు దేవుని పిల్లలు అనేందుకు రుజువుగా ఉన్నాయి (యోహాను 16:33, 2 తిమోతికి 3:12). అయినప్పటికీ ఆ శ్రమల్లో ఆయన తోడుగా ఉంటాడు, తగిన విధంగా వారిని ఘనపరచి తన చిత్తాన్ని జరిగించుకుంటాడు. గమనించండి; దేవుణ్ణి నమ్మితే ఏ శ్రమలూ సంభవించవు, అంతా భౌతికమైన ఆశీర్వాదమే అనేది తరతరాలుగా క్రైస్తవ్యాన్ని పట్టి పీడిస్తున్న పెద్ద
దుర్బోధ, దానివల్ల ఎవ్వరూ మోసపోవద్దు. యోసేపుకంటే ఎక్కువగా దేవుణ్ణి ఎవరు నమ్మగలరు?