20:1, 20:2, 20:3, 20:4,5, 20:6,7, 20:8-11, 20:12,13, 20:14-16, 20:17,18

ఆదికాండము 20:1
అక్కడనుండి అబ్రాహాము దక్షిణ దేశమునకు తర్లిపోయి కాదేషుకును షూరుకును మధ్య ప్రదేశములో నివసించి గెరారులో కొన్నాళ్లు ఉండెను.

ఈ వచనంలో అబ్రాహాము గెరారు ప్రాంతానికి వెళ్ళి అక్కడ నివసిస్తున్నట్టు మనం చూస్తాం. దేవుడు అతనికి కనాను దేశమంతటినీ సంచరించమని ఆజ్ఞాపించాడు‌ (ఆదికాండము 13:17‌). అందుకే అబ్రాహాము ఒకేచోట స్థిరంగా నివసించకుండా ఆ ప్రాంతాలన్నిటినీ సంచరిస్తున్నాడు. 

ఆదికాండము 20:2
అప్పుడు అబ్రాహాము తన భార్యయైన శారానుగూర్చి ఈమె నా చెల్లెలని చెప్పెను గనుక గెరారు రాజైన అబీమెలెకు శారాను పిలిపించి తన యింట చేర్చుకొనెను.

ఈ వచనంలో అబ్రాహాము మరలా తనను కాపాడుకునేందుకు గెరారు రాజైన అబీమెలెకు దగ్గర శారాను తన చెల్లెలని చెప్పడం మనం చూస్తాం. ‌ గతంలో అతను ఐగుప్తు రాజైన ఫరోముందు కూడా ఇలానే చెప్పినపుడు అతను శారాను తన ఇంటచేర్చుకున్నాడు. అప్పుడు దేవుడు తన కృప చేత శారానూ అబ్రాహామునూ ఫరోవల్ల ఎలాంటి అపాయం కలగకుండా కాపాడాడు. అదంతా తెలిసిన అబ్రాహాము మరలా అదేవిధంగా చెయ్యడం ఆశ్చర్యంగా అనిపిస్తుంటుంది కానీ ఇది మానవ పతన స్వభావాన్ని తెలియచేస్తుంది. ఇక్కడ అబ్రాహాము‌ శారాను చెల్లెలని చెప్పడం పొరపాటుగా భావించకుండా తన ప్రాణాలను కాపాడుకునే‌ ఉపాయంగా ఆలోచిస్తున్నాడు. మనకు కూడా కొన్ని సమయాలలో మనం చేసేవి పొరపాట్లలా అనిపించవు, అందుకే దేవుని వాక్యంలో రాయబడిన ప్రతీ సంగతినీ ఆలోచించి దేవుని దృష్టిలో పొరపాట్లు ఏమిటో గుర్తించగలగాలి.

కీర్తనలు 119: 11 నీ యెదుట నేను పాపము చేయకుండునట్లు నా హృదయములో నీ వాక్యము ఉంచుకొని యున్నాను.

ఆదికాండము 20:3
అయినను రాత్రివేళ దేవుడు స్వప్నమందు అబీమెలెకు నొద్దకు వచ్చి నీవు నీ యింట చేర్చుకొనిన స్త్రీ ఒక పురుషునికి భార్య గనుక ఆమె నిమిత్తము నీవు చచ్చినవాడవు సుమా అని చెప్పెను.

ఈ వచనంలో గెరారు రాజైన అబీమెలెకును దేవుడు శారా నిమిత్తం గద్దిస్తున్నట్టు మనం చూస్తాం. దేవుడు ఇలా తన భక్తులు కాని అన్యులతో కూడా స్వప్నాల ద్వారా మాట్లాడినట్టు కొన్ని సందర్భాలలో మనకు కనిపిస్తుంది. దానికి కారణం వారికేదో తన ప్రత్యక్షత ద్వారా బోధను అప్పగించడానికి కాదు కానీ దేవుని పిల్లల (ఇశ్రాయేలీయుల) మేలు నిమిత్తమే ఆవిధంగా జరిగింది. ఉదాహరణకు ఫరోకు ఆయన స్వప్నంలో కరువు గురించి బోధించడం వల్ల యోసేపు ఐగుప్తుకు ప్రధానిగా మారాడు, తన కుటుంబాన్ని కరువు నుండి రక్షించుకున్నాడు. ఆయన నెబుకద్నెజరుకు స్వప్నాన్ని రప్పించడం ద్వారా దానియేలు ఘనపరచబడ్డాడు. ఆయన యాకోబును కాపాడేందుకు అతని మామయైన లాబానుతో కూడా స్వప్నంలో మాట్లాడాడు. ఈ సందర్భంలో కూడా ఆయన అబ్రాహాము శారాల నిమిత్తం అబీమెలకుతో స్వప్నంలో మాట్లాడుతున్నాడు.

అదేవిధంగా దేవుడు అబీమెలెకుతో మాట్లాడిన ఆ మాటల్లో ప్రపంచానికి అవసరమైన నైతికపాఠం నిక్షిప్తమైయుంది. "నీవు నీ యింట చేర్చుకొనిన స్త్రీ ఒక పురుషునికి భార్య గనుక ఆమె నిమిత్తము నీవు చచ్చినవాడవు సుమా" దీనిప్రకారం పొరుగువాని భార్య/భర్తలను ఆశించేవారు దైవన్యాయం ప్రకారం మరణానికి పాత్రులు. కాబట్టి విశ్వాసులు ఇలాంటి అపవిత్రతల వైపు వెళ్ళకుండా జాగ్రతపడాలి.

సామెతలు 6:27- 29 ఒకడు తన ఒడిలో అగ్ని నుంచుకొనినయెడల వాని వస్త్రములు కాలకుండునా? ఒకడు నిప్పులమీద నడిచినయెడల వాని పాదములు కమలకుండునా? తన పొరుగువాని భార్యను కూడువాడు ఆ ప్రకారమే నాశనమగును ఆమెను ముట్టువాడు శిక్ష తప్పించుకొనడు (ఈ హెచ్చరిక పరాయివారి భార్య/భర్తలను ఆశించే స్త్రీ పురుషులు ఇద్దరికీ వర్తిస్తుంది).

ఆదికాండము 20:4,5
అయితే అబీమెలెకు ఆమెతో పోలేదు గనుక అతడు ప్రభువా ఇట్టి నీతిగల జనమును హతము చేయుదువా? ఈమె నా చెల్లెలని అతడు నాతో చెప్పలేదా? మరియు ఆమె కూడ అతడు నా అన్న అనెను. నేను చేతులతో ఏ దోషము చేయక యధార్థ హృదయముతో ఈ పని చేసితిననెను.

ఈ వచనాలలో అబీమెలెకు శారాను తన ఇంట ఎందుకు చేర్చుకున్నాడో ఆ కారణాన్ని దేవునికి విన్నవించుకోవడం మనం చూస్తాం. అతను ఉద్దేశపూర్వకంగా ఆ తప్పు చెయ్యలేదు కాబట్టి ఇలా దేవునితో తాను కానీ తన ప్రజలు కానీ మరణానికి పాత్రులు కాదని మాట్లాడగలుగుతున్నాడు. కాబట్టి మనకున్న యధార్థత మనల్ని అన్ని‌ పరిస్థితుల్లోనూ మన తరపున మాట్లాడుకునే ధైర్యాన్ని ఇస్తుంది. ఇలాంటి గొప్ప సాధనాన్ని మనం ఎప్పటికీ కోల్పోకూడదు.

ఆదికాండము 20:6,7
అందుకు దేవుడు అవును, యధార్థహృదయముతో దీని చేసితివని నేనెరుగుదును. మరియు నీవు నాకు విరోధముగా పాపము చేయకుండ నేను నిన్ను అడ్డగించితిని. అందుకే నేను నిన్ను ఆ మెను ముట్టనియ్యలేదు. కాబట్టి ఆ మనుష్యుని భార్యను తిరిగి అతని కప్పగించుము. అతడు ప్రవక్త, అతడు నీ కొరకు ప్రార్థనచేయును, నీవు బ్రదుకుదువు. నీవు ఆమెను అతని కప్పగించని యెడల నీవును నీవారందరును నిశ్చయముగా చచ్చెదరని తెలిసికొనుమని స్వప్నమందు అతనితో చెప్పెను.

ఈ వచనాలలో అబీమెలెకు మాటలకు దేవుడు జవాబిస్తూ అబ్రాహాముకు తన భార్యను అప్పగించమని అతను బ్రతకడానికి అవకాశం ఇవ్వడం మనం చూస్తాం. ఇక్కడ అబీమెలెకు అప్పటికే శారాను చెరపకుండా ఉండడానికి దేవుడు అతడిని ఆపడమే కారణం. ఒకవేళ అదే జరిగుంటే శారాతో పాటు ఆమె సంతానమంతా ఆ నిందను భరించాలి, ఎందుకంటే అక్కడ శారా కూడా అబ్రాహాము మాటతో మాట కలిపి అతను నాకు అన్నయ్య అని అబీమెలెకుతో అబద్ధం చెప్పింది. దీనిని బట్టి దేవుడు తన వాగ్దానంపై ప్రభావం చూపించే నరుల కార్యాలను (పాపాన్ని) నియంత్రిస్తాడని మనం అర్థం చేసుకోవాలి. ఆయన సార్వభౌముడు, సర్వశక్తిమంతుడు మానవుల హృదయాలకు పైగా ఉన్నాడు.

ఆదికాండము 20:8-11
తెల్లవారినప్పుడు అబీమెలెకు లేచి తన సేవకులందరిని పిలిపించి ఈ సంగతు లన్నియు వారికి వినిపించినప్పుడు ఆ మనుష్యులు మిగుల భయపడిరి. అబీమెలెకు అబ్రాహామును పిలిపించినీవు మాకు చేసిన పని యేమిటి? నీవు నా మీదికిని నా రాజ్యము మీదికిని మహాపాతకము తెప్పించునట్లు నేను నీయెడల చేసిన పాపమేమిటి? చేయరాని కార్యములు నాకు చేసితివని అతనితో చెప్పెను. మరియు అబీమెలెకునీవేమి చూచి ఈ కార్యము చేసితివని అబ్రాహాము నడుగగా అబ్రాహాము ఈ స్థలమందు దేవుని భయము ఏ మాత్రమును లేదు గనుక నా భార్య నిమిత్తము నన్ను చంపుదురనుకొని చేసితిని.

ఈ వచనాలలో అబీమెలెకు అబ్రాహామును పిలిపించి, అతను చెప్పిన అబద్ధం నిమిత్తం వాదించడం, దానికి అబ్రాహాము ఈ స్థలమందు దేవుని భయం లేదు కాబట్టి అలా చేసానని బదులివ్వడం మనం చూస్తాం. కానీ 4వ వచనంలో అబీమెలెకు "ప్రభువా ఇట్టి నీతిగల జనమును హతము చేయుదువా?" అని దేవుణ్ణి బ్రతిమిలాడుతూ తన జనం నీతిగల జనమని ప్రస్తావిస్తున్నాడు. కానీ ఈ సందర్భంలో అబ్రాహాము మాత్రం ఈ స్థలమందు దేవుని భయం లేదంటూ ఆ జనంపై ఆరోపణ చేస్తున్నాడు.

వాస్తవానికి అబీమెలెకు తన ప్రజలు కొన్ని‌ విషయాలలో నీతిగా ఉంటున్నారు కాబట్టి వారు నీతిగల జనమని భావించాడు. కానీ అబ్రాహాము దేవునివైపు నుండి వారి నీతిని కొలుస్తూ‌ ఆ క్రమంలో వారిలో కనిపించిన అనైతికతను బట్టి వారికి దేవుని భయం‌లేదని నిర్థారించుకున్నాడు. ఈరోజుకీ దేవుని నీతి తెలియని ప్రజలెందరో తమకు తామే కొన్ని నియమాలను (చట్టాలను) పెట్టుకుని వాటిని పాటించడమే నీతిగా భావిస్తుంటారు (పరిసయ్యులలా). కాబట్టి విశ్వాసులమైన మనం అనుసరించే నీతి దేవుని వాక్యంలో‌ బోధించబడినదై ఉండాలి. అప్పుడు మాత్రమే మనలో అబ్రాహాము చెబుతున్న దేవుని భయం ఉన్నట్టు. అందుకే యేసుక్రీస్తు ప్రభువు "శాస్త్రుల నీతి కంటెను పరిసయ్యుల నీతికంటెను మీ నీతి అధికము కానియెడల మీరు పరలోకరాజ్యములో ప్రవేశింపనేరరని మీతో చెప్పుచున్నాను" (మత్తయి 5:20) అని అంటున్నాడు.

2 థెస్సలొనికయులకు 2: 15 కాబట్టి సహోదరులారా, నిలుకడగా ఉండి మా నోటిమాటవలననైనను మా పత్రిక వలననైనను మీకు బోధింపబడిన విధులను చేపట్టుడి.

ఆదికాండము 20:12,13
అంతేకాకఆమె నా చెల్లెలనుమాట నిజమే. ఆమె నా తండ్రి కుమార్తెగాని నా తల్లి కుమార్తె కాదు. ఆమె నాకు భార్యయైనది. దేవుడు నన్ను నా తండ్రియిల్లు విడిచి దేశాంతరము పోవునట్లు చేసినప్పుడు నేను ఆమెను చూచి మనము పోవు ప్రతి స్థలమందు ఇతడు నా సహోదరుడని నన్ను గూర్చి చెప్పుము. నీవు నాకు చేయవలసిన ఉపకారమిదేయని చెప్పితిననెను.

ఈ వచనాలలో అబ్రాహాము తాను అబీమెలెకుతో శారా గురించి చెప్పిన మాటలను సమర్థించుకోవడానికి మరో కారణాన్ని కూడా చెబుతుండడం మనం చూస్తాం. దాని ప్రకారం శారా అబ్రాహాము తండ్రి కుమార్తె. వారు తమ దేశం విడిచివచ్చేటప్పుడే ప్రమాదకరమైన స్థలాలలో అన్న చెల్లెలుగా చెప్పుకోవడానికి ఒప్పందాన్ని చేసుకున్నారు. నిజానికి అబ్రాహాముకు శారా చెల్లెలు వరసే అయినప్పటికీ తరువాత ఆమె అతనికి భార్యకూడా అయ్యింది. కాబట్టి అతను ఆ ప్రాముఖ్యమైన సంబంధాన్ని దాచిపెట్టి కేవలం శారాను చెల్లెలు మాత్రమే అని చెప్పడం తప్పకుండా పొరపాటే. పైగా అతను దేవుని కాపుదలపై ఆధారపడకుండా తన పొరపాటుతో కూడిన ఆలోచనను బట్టి తనను తాను రక్షించుకోవాలి అనుకుంటున్నాడు. అబీమెలెకుతో ఈ స్థలమందు దేవుని భయం లేదని తీవ్రంగా ఆరోపణ చేసిన అబ్రాహాము, శారాను తన చెల్లెలని చెప్పే ఆలోచన కూడా ఎంతవరకూ దేవునికి అనుకూలమో పరిశీలించుకునుంటే బావుండేది. కాబట్టి విశ్వాసులమైన మనం‌ ముందుగా మన ఆలోచన, ప్రవర్తనలు దేవునికి అనుకూలంగా ఉండేలా చూసుకోవాలి, అబ్రాహాము అంతటి వాడే ఈ విషయంలో కొన్నిసార్లు తప్పిపోయినప్పుడు, మనం కూడా మరింతగా తప్పిపోయే అవకాశం ఉంది కాబట్టి మరింత జాగ్రతగా ఉండాలి.

కీర్తనలు 17: 5 నీ మార్గములయందు నా నడకలను స్థిరపరచుకొని యున్నాను. నాకు కాలు జారలేదు.

అదేవిధంగా ఇక్కడ అబ్రాహాము అబీమెలెకుతో, శారాను తన తండ్రి కుమార్తెగా చెప్పినదానిని కొందరు అపార్థం చేసుకుని, అతని తండ్రియైన తెరహుకూ వేరే స్త్రీకి జన్మించిందే శారా అని, అయినప్పటికీ అబ్రాహాము ఆమెను వివాహం చేసుకున్నాడని భావిస్తుంటారు. కానీ అబ్రాహాము తండ్రియైన తెరహుకు ఆడసంతానం లేదు. ఎందుకంటే తెరహుకు ముందున్న పితరులకు ఆడసంతానం కలిగితే అది రాయబడింది‌ కానీ, తెరహు విషయంలో మాత్రం అలా జరగలేదు.

ఆదికాండము 11:26,27 తెరహు డెబ్బది యేండ్లు బ్రదికి అబ్రామును నాహోరును హారానును కనెను. తెరహు వంశావళి ఇది, తెరహు అబ్రామును నాహోరును హారానును కనెను.

పైగా తెరహుకు అబ్రాహాము భార్యయైన శారా ఏమౌతుందని రాయబడిందో చూడండి

ఆదికాండము 11:31 తెరహు తన కుమారుడగు అబ్రామును, తన కుమారుని కుమారుడు, అనగా హారాను కుమారుడగు లోతును, "తన కుమారుడగు అబ్రాము భార్యయయిన శారయి అను తన కోడలిని" తీసికొని కనానుకు వెళ్ళుటకు కల్దీయుల ఊరను పట్టణములో నుండి వారితోకూడ బయలుదేరి హారాను మట్టుకు వచ్చి అక్కడ నివసించిరి.

ఈ ఆధారాలను బట్టి, శారా అబ్రాహాము తండ్రికి పుట్టిన స్వంత చెల్లి కాదు, ఆమె తెరహుకు కోడలు మాత్రమే. మరి అబ్రాహాము అబీమెలెకు దగ్గర ఆమె నా తండ్రి కుమార్తెయని ఎందుకు‌ సంబోధించాడంటే, దానిని మనం హెబ్రీయుల కోణం నుండి‌ అర్థం చేసుకోవాలి. హెబ్రీయులు తమ తండ్రి వంశపువారందరినీ  "తండ్రి" అనే సంబోధిస్తారు. శారా అబ్రాహాము తండ్రియైన తెరహు తరంలోని వారికి (పెదనాన్న& చిన్నాన్న) పుట్టిన అమ్మాయి. ఈ కారణంతోనే అబ్రాహాము ఆమెను "నా తండ్రి కుమార్తె" అని సంబోధించాడు. అబ్రాహాము మాటల్లోనే శారా తన స్వంత చెల్లి కాదని మనకు స్పష్టం ఔతుంది. ఎందుకంటే తెరహుకు అబ్రాహామును కన్నటువంటి భార్య తప్ప వేరే భార్య ఉన్నట్టు ఎలాంటి ఆధారం లేదు.

ఆదికాండము 20:14-16
అబీమెలెకు గొఱ్ఱెలను గొడ్లను దాసదాసీ జనులను రప్పించి, అబ్రాహాముకిచ్చి అతని భార్యయైన శారాను అతనికి తిరిగి అప్పగించెను. అప్పుడు అబీమెలెకు ఇదిగో నా దేశము నీ యెదుట నున్నది. నీకిష్టమైన స్థలమందు కాపురముండుమనెను. మరియు అతడు శారాతో ఇదిగో నీ అన్నకు నేను వెయ్యి రూపాయలిచ్చియున్నాను. ఇది నీ యొద్ద నున్న వారందరి దృష్టికి ప్రాయశ్చిత్తముగా నుండుటకై యిది నీ పక్షముగా ఇచ్చియున్నాను. ఈ విషయ మంతటిలో నీకు న్యాయము తీరిపోయినదనెను.

ఈ వచనాలలో గెరారు రాజైన అబీమెలెకు ఐగుప్తు రాజైన‌ ఫరోవలే, తాను చేసిన అపరాధానికి ప్రాయశ్చిత్తంగా అబ్రాహాము శారాలకు పశువులు, దాసులతో పాటుగా కొంత ధనాన్ని కూడా ఇస్తున్నట్టు మనం చూస్తాం. మన తెలుగు‌ బైబిల్ లో శారాకు అతనిచ్చిన సొమ్ము వెయ్యి రూపాయలు అని తర్జుమా చేసారు కానీ, దానిని మూలభాషలో చూసినపుడూ అక్కడ వెయ్యి వెండినాణేలను అని రాయబడింది. ఇంగ్లీష్ బైబిల్ లో చూసినా కూడా ఇది స్పష్టమౌతుంది.

ఆదికాండము 20:17,18
అబ్రాహాము దేవుని ప్రార్థింపగా దేవుడు అబీమెలెకును అతని భార్యను అతని దాసీలను బాగుచేసెను. వారు పిల్లలుకనిరి. ఏలయనగా అబ్రాహాము భార్యయైన శారానుబట్టి దేవుడు అబీమెలెకు ఇంటిలో ప్రతి గర్భమును మూసియుండెను.

ఈ వచనాలలో దేవుడు అబ్రాహాము ప్రార్థనను బట్టి, అబీమెలకు ఇంటివారందరినీ బాగుచేసినట్టు మనం చూస్తాం. ప్రాచీనకాలంలో మనుషులకు అత్యంత విలువైన ఆస్తి తమ సంతానమే. అందుకే దేవుడు కొన్ని సందర్భాలలో మనుషులను శిక్షించేటప్పుడు వారి సంతానాన్ని నాశనం చెయ్యడం లేక, వారి గర్భాలను మూసివెయ్యడం వంటిది మనకు కనిపిస్తుంది.