ఆడియో

"దుర్భోధను ఖండించుచునుండుము" (తీతుకు 2:15) "పరిశుద్ధులకు ఒక్కసారే అప్పగింపబడిన బోధ నిమిత్తము మీరు పోరాడవలెను ఏలయనగా కొందరు రహస్యముగా జొరబడియున్నారు" (యూదా 1:3,4) అనే ప్రభువు ఆజ్ఞలను బట్టి ఈమధ్యకాలంలో బ్రదర్ బిబు "బైబిల్ మిషన్" వ్యవస్థాపకుడైన దేవదాసు అయ్యగారి బోధలలోని ప్రాముఖ్యమైన దుర్బోధలను తన పుస్తకం మరియు వీడియోల ద్వారా బహిర్గతం చేసినప్పుడు ఆ సంస్థకు చెందిన కొందరు వ్యక్తులు విషయమంతా వదిలేసి‌, అనగా దేవదాసు అయ్యగారు బోధించినవి ఏవిధంగా వాక్యానుసారమో రుజువు చెయ్యకుండా కనీసం వారు బహిరంగంగా నిరూపించుకోగలిగే సవాలును కూడా స్వీకరించకుండా మాపై కొన్ని అనవసరపు విమర్శలు చెయ్యడం ప్రారంభించారు. దుర్బోధలను ఖండించే క్రమంలో ఇలాంటి అనవసరపు విమర్శలు మాకు కొత్తేంకాదు.

గతంలో మేము ఎడ్వర్డ్ విలియమ్స్ కుంటం వైఎస్ జగన్ పై చెప్పిన అబద్ధపు ప్రవచనాన్ని ఖండించినప్పుడూ అద్దంకి రంజీత్ ఓఫీర్, పీడీ సుందరావు లాంటి మరికొందరి బోధలు కూడా వాక్యపు వెలుగులో సరికావని వివరించినప్పుడు కూడా మాపై అలాంటి విమర్శలే సంధించబడ్డాయి. అందుకే మేము వివరిస్తున్నటువంటి విషయంతా వదిలేసి వారి ప్రియబోధకులను వాదన నుండి తప్పించడానికి కొందరు కుయుక్తితో చేస్తున్నటువంటి ఆ అనవసరపు విమర్శలకు సమాధానం ఇవ్వడానికి ఈ వ్యాసం రాస్తున్నాను.

1. దేవదాసు అయ్యగారు కానీ భక్తసింగ్ గారు కానీ ఇలాంటి పేరుమోసిన బోధకులు తమ జీవితంలో ఎంతో గొప్పపరిచర్య చేసి ఎన్నో వేల లక్షల ఆత్మలను ప్రభువు కోసం సంపాదించారు; అలాంటివారు ఏదైనా ఒక దుర్బోధ చేసినప్పటికీ అది ప్రభువు చూసుకుంటాడు, మధ్యలో వారిపై మీ విమర్శలు ఏంటని కొందరు మమ్మల్ని విమర్శిస్తున్నారు.

ఇక్కడ వారు గ్రహించలేకపోతున్న విషయం ఏంటంటే ఒక బోధకుడు ఎంత గొప్పగా పరిచర్య చేసినప్పటికీ ఎన్ని గంటలు ప్రార్థన చేసినప్పటికీ  ఎంతమందిని ప్రభువువైపు త్రిప్పినప్పటికీ వాక్యవిరుద్ధమైన ఒక బోధను చెయ్యడానికి అతను ప్రభువు దగ్గర నుండి అనుమతి పొందుకోలేడు. అతను ఎంత గొప్ప బోధకుడైనా సరే అతను చేసిన బోధ వాక్యానుసారంగా లేనప్పుడు అది దుర్భోధే ఔతుంది. ఒక డాక్టర్ వందలమంది ప్రాణాలను కాపాడినప్పటికీ ఒకరిని హత్య చేస్తే ఆ హత్య విషయంలో అతను హంతకుడే ఔతాడు‌ సుమా!

నేను పైన ప్రస్తావించిన బోధకులను పేతురుతో పోల్చడం నాకు ఇష్టం లేనప్పటికీ మమ్మల్ని విమర్శించేవారికి విషయం అర్థం కావడానికి మాత్రం ఆ పోలికను తీసుకుని జవాబు చెప్పదలచాను. పేతురు గురించి మనందరికీ తెలుసు, యేసుక్రీస్తు అపోస్తలులలో ఇతను ప్రముఖుడిగా గుర్తించబడి తన బోధతో అనేకులను ప్రభువు మార్గంలోకి నడిపించాడు. పెంతుకోస్తు పండుగ రోజున ఇతను చేసిన బోధ కారణంగానే మూడువేలమంది ప్రభువును హత్తుకుని ప్రారంభ క్రైస్తవ సంఘంగా ఏర్పడ్డారు (మత్తయి 16:18, అపొ. కా 2:41,42). అతను ఇంత ప్రాముఖ్యత కలిగినవాడు అయినప్పటికీ అప్పటి సంఘంలోని యూదులు, అన్యజనుల మధ్య ఏర్పడిన బేధానికి బలం చేకూర్చేలా ఒక తప్పిదం చేసినప్పుడు అందరికంటే చివరి అపోస్తలుడిగా ఎన్నుకోబడిన పౌలు అతణ్ణి ముఖాముఖిగా గద్దించాడు.

గలతీయులకు 2:11-14 అయితే కేఫా అంతియొకయకు వచ్చినప్పుడు అతడు అపరాధిగా తీర్చబడెను గనుక నేను ముఖాముఖిగా అతనిని ఎదిరించితిని; ఏలయనగా యాకోబునొద్దనుండి కొందరు రాకమునుపు అతడు అన్యజనులతో భోజనము చేయుచుండెను గాని వారు రాగానే సున్నతి పొందిన వారికి భయపడి వెనుకతీసి వేరైపోయెను. తక్కిన యూదులును అతనితో కలిసి మాయవేషము వేసికొనిరి గనుక బర్నబాకూడ వారి వేషధారణముచేత మోసపోయెను. వారు సువార్త సత్యము చొప్పున క్రమముగా నడుచుకొనకపోవుట నేను చూచినప్పుడు అందరి యెదుట కేఫాతో నేను చెప్పినదేమనగా నీవు యూదుడవై యుండియు యూదులవలె కాక అన్యజనులవలెనే ప్రవర్తించుచుండగా, అన్యజనులు యూదులవలె ప్రవర్తింపవలెనని యెందుకు బలవంతము చేయుచున్నావు?

ఈ సందర్భంలో సువార్త సత్యం‌ చొప్పున (యూదుడనీ అన్యుడనీ బేధం లేదు) క్రమంగా నడచుకోలేదని పేతురులాంటి బోధకుడినే పౌలు ఎదిరించి గద్దించినప్పుడు ఈరోజు ఎంత గొప్ప పేరు మోసిన బోధకుడైనా వాక్యక్రమం చొప్పున బోధించనప్పుడు దానిని ఖండించడం సబబే కదా! (ఇక్కడ ఎవరైనా పేతురును గద్దించిన పౌలు స్థాయి గురించీ మా స్థాయి గురించీ మాట్లాడితే దానికి కూడా ఈ వ్యాసం పూర్తయ్యేసరికి వివరణ వస్తుంది).

2. కొందరు - మేము ఏ బోధకుల బోధలనైతే దుర్బోధలని ఖండిస్తున్నామో నేను పైన ప్రస్తావించినట్టుగా వారు వేల లక్షల మందిని రక్షణలోకి నడిపించారని, మేము ఆ విధంగా ఎంతమందిని రక్షించామో చెప్పాలని ప్రశ్నిస్తున్నారు. రక్షణ అనేది బోధకుడి చేతుల్లో కాదు ప్రభువు యొక్క నిర్ణయంపైనా యేసుక్రీస్తు బలియాగంపైనే ఆధారపడి‌ ఉంటుందనే కనీస అవగాహన ఉన్నవారు ఎవరూ ఇలాంటి ప్రశ్నను మాపై సంధించలేరు. దేవుడు చేసే రక్షణ కార్యంలో బోధకుడు దేవుడు వాడుకునే సాధనమే తప్ప, రక్షణ బోధకుడి మూలంగా కలగదు (రోమా 8:29,30, అపో.కా 13:48,16:14). అందుకే పౌలు కొరింథీ సంఘాన్ని "ఒకడు నేను పౌలు వాడను, మరియొకడునేను అపొల్లోవాడను, అని చెప్పునప్పుడు మీరు ప్రకృతిసంబంధులైన మనుష్యులు కారా? అపొల్లో ఎవడు? పౌలెవడు? పరిచారకులే గదా. ఒక్కొక్కరికి ప్రభువను గ్రహించిన ప్రకారము వారి ద్వారా మీరు విశ్వసించితిరి నేను నాటితిని, అపొల్లో నీళ్లు పోసెను, వృద్ధి కలుగజేసిన వాడు దేవుడే కాబట్టి వృద్ధి కలుగజేయు దేవునిలోనే గాని, నాటువానిలోనైనను నీళ్లు పోయువానిలోనైనను ఏమియులేదు" (1 కొరింథీ 3:4-7) అని హెచ్చరిస్తున్నాడు. ప్రభువు ఒక బోధకుడి ద్వారా ఎంతమందిని రక్షించాలని నిర్ణయించాడో అంతమందినీ రక్షించుకుంటాడు. ఆ సంఖ్యను చూసి ఆ బోధకుడు కానీ అతని శిష్యగణం కానీ ఇదంతా మా బోధకుడి చలవేయని అతిశయించే అవకాశం 0.1% కూడా లేదు. కాబట్టి ప్రభువు మా ద్వారా ఎంతమంది‌ని రక్షించాలని నిర్ణయించాడో అంతమందినీ రక్షించుకుంటాడు, ఇందులో మేము ఎవరికీ లెక్కలు చెప్పవలసిన అవసరం లేదు.

ఇక్కడున్న మరొక సమస్య ఏమిటంటే ఒక బోధకుడి మాటలు వినేసి అతణ్ణి వెంబడించే మందంతా రక్షించబడిపోయినట్టు కాదు. ఈరోజు వాక్యవిరుద్ధమైన బోధలు చేసే ఎందరో బోధకులను కూడా లక్షలమంది గుడ్డిగా వెంబడిస్తున్నారు, అసలు వారంతా రక్షించబడినట్టా? ఉదాహరణకు; నేను పైన ప్రస్తావించిన బోధకులను బట్టి రక్షించబడ్డామని భావించి వారి సంస్థల్లో కొనసాగుతూ మమ్మల్ని విమర్శిస్తున్నవారు నిజంగానే రక్షించబడి ఉంటే బెరయ సంఘస్తులవలే వాక్యపు వెలుగులో తమ బోధకుడి బోధలు పరిశీలించకుండా (అపొ.కా 17:10,11) ఆ బోధలు వాక్యానుసారం కాదని మాలాంటివారు స్పష్టంగా రుజువు చేస్తున్నప్పుడు కూడా వాటినే/వారినే ఎందుకు గుడ్డిగా సమర్థిస్తున్నారు? మాపై అనవసరపు విమర్శలకూ దూషణలకూ ఎందుకు దిగుతున్నారు? నిజంగా రక్షించబడినవారు ప్రభుని వాక్యాన్నే హత్తుకుంటారు తప్ప, ఏదో ఒక సంస్థను కాదు. ప్రభువుకు మాత్రమే దాసులుగా ఉంటారు తప్ప, వారి బోధకుడికి కాదు.  ఈరోజు చాలామంది అలా ఉండడం లేదంటే కారణమేంటి, వారు రక్షించబడకపోవడమే కదా!

యోహాను 7:17 ఎవడైనను ఆయన చిత్తము చొప్పున చేయ నిశ్చయించుకొనినయెడల, ఆ బోధ దేవుని వలన కలిగినదో, లేక నా యంతట నేనే బోధించుచున్నానో, వాడు తెలిసికొనును.

3. మా బోధకుడు ఎలాంటి బోధ చేసినా దానిని/అతడిని విమర్శించే హక్కు మీకు ఎవరిచ్చారు, అది ప్రభువు చూసుకుంటాడు, ముందు మీరు మీ కంటిలో ఉన్న దూలాన్ని తీసుకోండని కూడా కొందరు మమ్మల్ని విమర్శిస్తున్నారు.

వారి బోధకుడు వాక్యవిరుద్ధమైన బోధలు చేస్తుంటే వాటిని ఖండించే హక్కు మాకు ప్రభువే ఇచ్చాడు (తీతుకు 2:15, 2 తిమోతికి 4:2-4, యూదా 1:3, అపొ. కా 20:28-30). సంఘాన్ని కలుషితం చేసే దుర్భోధలను ప్రభువే కాదు మనం కూడా చూసుకోవాలనే ఉద్దేశంతోనే ఆయన మన చేతిలో బైబిల్ ఉంచాడు (2 తిమోతికి 3:16,17).

కాబట్టి మమ్మల్ని విమర్శించేవారు అలాంటి అనవసరపు మాటలే కాకుండా మా కంటిలో ఏ దూలం ఉందో కాస్త బయటపెడితే దానిని తొలగించుకోవడానికి మేము సిద్ధంగా ఉన్నాము. ఎందుకంటే మేము ఒక బోధకుడికి కాదు సత్యమైయున్న ప్రభువుకే దాసులము.

4. మరికొందరు వారి బోధకులను విమర్శించడానికి మా స్థాయి సరిపోదనీ కేవలం మేము popular అవ్వడం కోసమే అలాంటి పనులు చేస్తున్నామని కూడా మమ్మల్ని విమర్శిస్తున్నారు.

లోకానుసారమైన మనస్సు కలిగినవారు మాత్రమే ఇలా స్థాయిల గురించి మాట్లాడుతుంటారు కానీ క్రీస్తులో మనమంతా సమానమని గ్రహించినవారు మేము చెప్పేదానిలో సత్యముందా లేదా అనేది మాత్రమే పరిశీలిస్తారు. ఔనులెండి, వారు తమ బోధకుడి సంస్థలో కాకుండా బైబిల్ బోధించిన యేసుక్రీస్తు సంఘంలో సభ్యులైయుంటే ఈ సంగతి బాగా గ్రహించేవారు (రోమా 12:2,3,10, 2 కొరింథీ 10:12). పౌలులాంటి ఉన్నతమైన పరిచర్య చేసిన బోధకుడు కూడా తనకివ్వబడిన ఆధిక్యతను బట్టీ తాను చేస్తున్న పరిచర్యను బట్టీ ఏనాడూ అతిశయించలేదు, ఎందుకంటే అంత గొప్ప పరిచర్యను చేసే సామర్థ్యం అతనికి దేవుడే అనుగ్రహించాడనే సత్యాన్ని అతను బలంగా విశ్వసించాడు (2 కోరింథీ 3:5). మరి ఆయనకే లేని ఆతిశయం మీకెందుకు?

కాబట్టి మాకు స్థాయిలతో పని లేదు బోధలతోనే పని ఉంది. వాక్యం ఒకరు చెప్పే బోధను బట్టి స్పందించమంటుందే తప్ప, వారి స్థాయిని బట్టి కాదు. పౌలును అపోస్తలుడిగా ఎన్నుకున్న దేవుడే మమ్మల్ని విశ్వాసులుగా బోధకులుగా ఎన్నుకుని మాపై కొన్ని బాధ్యతలను‌ ఉంచాడు. అందులో ఒకానొక బాధ్యతే దుర్భోధలను ఖండించడం. ఇంతకూ మా స్థాయి గురించి మాట్లాడుతున్న బోధకుల అనుచరులు మమ్మల్ని విమర్శించడానికి వారికున్న స్థాయి ఏంటో కాస్త వివరిస్తారా ? (వారి కొలమానం ప్రకారం). అదేవిధంగా ఎవరినో అడ్డుపెట్టుకుని popular  అవ్వడానికి ప్రయత్నించవలసిన పరిస్థితిలో మేము లేము. మేము మనుష్యులలో popular అవ్వడానికి ప్రయత్నించేవారం కాము, ఒకవేళ మా ఉద్దేశం అదేఐతే  వాక్యానుసారమైన ఎదురీతను (ఉన్నది ఉన్నట్టుగా ప్రకటించడం) కాకుండా కొందరు బోధకులు ఎంచుకుంటున్నట్టుగా  సులువైన మార్గాన్నే ఎంచుకునేవారం. వారికిలానే  కల్పనాకథలు చెబుతూ బూటకపు స్వస్థతలూ చేస్తూ లేదా భౌతికపరమైన ఆశీర్వాదపు బోధలనే ప్రకటిస్తూ ఎప్పుడో popular అయిపోయేవారం. కానీ ప్రాణం పోయినా సరే మేము అలా చెయ్యము. ఎందుకో ఈ వాక్యభాగాలు చదవండి.

1థెస్సలొనికయులకు 2:4 సువార్తను మాకు అప్పగించుటకు యోగ్యులమని దేవునివలన ఎంచబడినవారమై, మనుష్యులను సంతోషపెట్టువారము కాక మన హృదయములను పరీక్షించు దేవునినే సంతోషపెట్టు వారమై బోధించుచున్నాము.

గలతీయులకు 1:10 ఇప్పుడు నేను మనుష్యుల దయను సంపాదించు కొనజూచుచున్నానా దేవుని దయను సంపాదించుకొన జూచుచున్నానా? నేను మనుష్యులను సంతోషపెట్టగోరుచున్నానా? నేనిప్పటికిని మనుష్యులను సంతోష పెట్టువాడనైతే క్రీస్తుదాసుడను కాకయేపోవుదును.

5. దారినపోయేవాడెవడో ప్రశ్నిస్తే సమాధానం ఇవ్వవలసిన అవసరం మా బోధకుడికి లేదని కూడా కొందరు మమ్మల్ని విమర్శిస్తున్నారు.

దారినపోయేవాడెవడో  మీ బోధకుడి ఇంటి విషయాల గురించి ప్రశ్నిస్తే సమాధానం ఇవ్వవలసిన అవసరం అతనికి ఉండదేమో కానీ సంఘంలో బోధకుడిగా చలామణి అయ్యేవారెవరైనా సరే  తాను చేసే బోధల విషయంలో మరో బోధకుడు/విశ్వాసి వాక్యానుసారంగా ప్రశ్నించినప్పుడు, దానికి సమాధానం ఇవ్వవలసిన అవసరం అతనికి ఖచ్చితంగా ఉంటుంది. ఎవరుబడితే వాళ్ళు సంఘంలో ప్రవేశించి ఇష్టం వచ్చినట్టు బోధిస్తామంటే కుదరదు. ప్రతీ బోధకుడి బోధలూ బైబిల్ ప్రకారంగానే ఉండాలి. లేకపోతే వాళ్ళను దుర్బోధకులుగా వేరొక సువార్తను ప్రకటిస్తున్న శాపగ్రస్తులుగా పరిగణించవలసి ఉంటుంది. అదే విషయం ప్రజలకు కూడా ప్రకటించవలసి వస్తుంది. 

యెషయా 8:20 ధర్మశాస్త్రమును ప్రమాణ వాక్యమును విచారించుడి; ఈ వాక్యప్రకారము వారు బోధించనియెడల వారికి అరుణోదయము కలుగదు.

గలతియులకు 1:8 మేము మీకు ప్రకటించిన సువార్తగాక మరియొక సువార్తను మేమైనను పరలోకము నుండి వచ్చిన యొక దూతయైనను మీకు ప్రకటించినయెడల అతడు శాపగ్రస్తుడవును గాక.

అదేవిధంగా పౌలుచేస్తున్న పరిచర్యపై, అతని అపోస్తలత్వంపై కొందరు అక్కసుతో విమర్శలు లేవనెత్తినప్పుడు ఏ అవసరం ఉందని వారికి తన పత్రికలలో ఆయన సమాధానం‌ ఇచ్చాడు?

1కోరింథీయులకు 9:3 నన్ను విమర్శించువారికి నేను చెప్పుసమాధానమిదే.

మేమేమీ వారిలా అక్కసుతో కాకుండా కేవలం వాక్యంపైనున్న ఆసక్తితోనే ‌కొందరు బోధకులు చేస్తున్నటువంటి దుర్బోధలను ప్రశ్నిస్తున్నాము. అలాంటప్పుడు మాకు సమాధానం ఇవ్వవలసిన అవసరం వారికి ఇంకా ఎక్కువగా ఉంది. లేదని ఎవరైనా వాదిస్తుంటే వారి దృష్టిలో తమ బోధకులు పౌలుకంటే గొప్పవారేమో మరి.

6. మా బోధకుడు ఎవరిదీ రూపాయి ఆశించకుండా కష్టపడి సేవ చేస్తున్నాడు, అలాంటి నిస్వార్థపరుడిని ఎందుకు విమర్శిస్తున్నారని కూడా కొందరు మమ్మల్ని విమర్శిస్తున్నారు.

ఒక బోధకుడు రూపాయి ఆశించకుండా సేవ చేసినంత మాత్రానో తనకున్న ఆస్తినంతా సంఘస్తులకు ధారపోస్తున్నంత మాత్రానో ఆ బోధకుడి బోధలు వాక్యానుసారం అయిపోవు. ఆ బోధలు వాక్యానుసారంగా ఉన్నప్పుడు మాత్రమే అవి దేవుని బోధలుగా గుర్తించబడతాయి‌. సాతానుకు సంఘం దుర్భోధవైపు పయనించడం కావాలి. ఆ క్రమంలో వాడికి ఎలాంటి బోధకుడిని‌ సంఘానికి ఎరగా వెయ్యాలో ఎలాంటి బోధకుడికి సంఘం ఆకర్షించబడుతుందో బాగా తెలుసు.

2కోరింథీయులకు 11:13-15 ఏలయనగా అట్టి వారు క్రీస్తుయొక్క అపొస్తలుల వేషము ధరించుకొనువారైయుండి, దొంగ అపొస్తలులును మోసగాండ్రగు పనివారునై యున్నారు.
ఇది ఆశ్చర్యము కాదు; సాతాను తానే వెలుగు దూత వేషము ధరించుకొనుచున్నాడు.
గనుక వాని పరిచారకులును నీతి పరిచారకుల వేషము ధరించుకొనుట గొప్ప సంగతికాదు. వారి క్రియల చొప్పున వారి కంతము కలుగును.

అందుకే మనం బోధకుడు చేసే బోధను వాక్యంతో పోల్చిచూసి, అతను చెప్పే బోధను అంగీకరించాలే తప్ప అతనిలో‌ ఉన్న ఏదో ఒక మంచి లక్షణాన్ని బట్టి అతని బోధను సత్యంగా స్వీకరించకూడదు. ఇతర మతాలకు చెందిన బోధకులలో కూడా మనకు కొన్ని మంచి లక్షణాలు కనిపిస్తుంటాయి, వాటిని బట్టి వారి బోధలను కూడా సత్యమని స్వీకరిద్దామా?

7. మా బోధకుడు అప్పట్లో ఎంతో కష్టపడి సంఘాన్ని బలపరిచాడు, స్వస్థతల పేర్లతో విశ్వాసులను మోసం చేస్తున్నవారినీ మరి కొందరు దుర్బోధకులనూ ఖండించాడు. Debates చేసి మతోన్మాదుల నోర్లు మూయించాడు. అలాంటి వాడు ఇప్పుడేదో వాక్యవిరుద్ధంగా బోధించాడని అతన్ని ఇంతలా ఎందుకు విమర్శిస్తున్నారు అని కూడా కొందరు విమర్శిస్తున్నారు. పైగా ఆ బోధకుడిపై మాకు అసూయ అన్నట్టుగా కూడా నిందలు మోపుతున్నారు.

మొదటిగా "ప్రభువు మెచ్చుకొనువాడే యోగ్యుడు గాని తన్ను తానే మెచ్చుకొనువాడు యోగ్యుడుకాడు" (2కోరింథీ 10:18) అని రాయబడిన ప్రకారం; తనను తానే మెచ్చుకునే దుర్బోధకులపై అసూయ చెందవలసిన అవసరం మాకు లేదని గమనించాలి.‌ సాధారణంగా మనుషులకు అసూయ అనేది తమకంటే గొప్పవారి పట్ల కలుగుతుంది. కానీ మేము ఎవర్నైతే దుర్బోధలు చేస్తున్నారని వాక్యపు వెలుగులో ఆరోపిస్తున్నామో వారి‌ బోధలు గమనించినప్పుడు రోజు రోజుకూ అవి మరింత కలిపిచెరపబడి దిగజారుతున్నాయి. "మేము దేవుని వాక్యమును కలిపి చెరిపెడు మీ బోధకుని వలె ఉండక, నిష్కాపట్యముగలవారమును దేవునివలన నియమింపబడిన వారమునైయుండి, క్రీస్తునందు దేవునియెదుట బోధించుచున్నాము" (2 కొరింథీ 2:17). "మా బోధ కపటమైనది కాదు, అపవిత్రమైనది కాదు, మోసయుక్తమైనది కాదుగాని సువార్తను మాకు అప్పగించుటకు యోగ్యులమని దేవునివలన ఎంచబడినవారమై, మనుష్యులను సంతోషపెట్టువారము కాక మన హృదయములను పరీక్షించు దేవునినే సంతోషపెట్టు వారమై బోధించుచున్నాము" (1 థెస్సలోనిక 2:3,4) అలాంటప్పుడు కలిపిచెరిపే వారి పట్ల, దిగజారుడు బోధలు చేసేవారిపట్ల మాకు అసూయ ఏంటి? సజీవులైనవారికి కుళ్ళి పురుగులు పట్టిన కలేబరాన్ని చూస్తే అసహ్యం వేస్తుంది తప్ప అసూయ కలగదు కదా? ఇంతకూ వారిపై మాకు అసూయ ఉన్నట్టుగా మీకు ఎందుకు అనిపించింది? వారి YouTube Channel subscribers, video views ని బట్టి ఆ? లేక వారిని వెంబడించే గుంపును బట్టి ఆ? అలాగైతే చెడు చిత్రీకరణలు ప్రచారం చేసే YouTube Channels కు అంతకంటే ఎక్కువ subscribers, viewers ఉంటారు. అదేం అంత గొప్ప విషయం కాదు. ఒక తెలివైన బోధకుడు వాక్యానుసారమైన ఖండనను ప్రక్కనపెట్టి మనుషులకు అనుకూలంగా బోధించడం మొదలుపెడితే మీ బోధకుడి కంటే ఎక్కువ గుంపునే పోగేసుకోగలడు. అది సహజం. కాబట్టి కొందరి బోధలను మేము ఖండిస్తుంది వారిపై అసూయతోనూ కాదు అక్కసుతోనూ కాదు. "సత్యవిషయమైన అనుభవజ్ఞానము వారికి కలుగుటకై, దేవుడొకవేళ ఎదురాడు వారికి మారుమనస్సు దయచేయును" (2తిమోతికి 2:24) అనే జాలితోనూ వారి బోధల విషయంలో సంఘాన్ని అప్రమత్తం చెయ్యాలనే బాధ్యతోనూ మాత్రమే. ఎందుకంటే "కొరుకుపుండు ప్రాకినట్టు వారిమాటలు ప్రాకును" (2 తిమోతికి 2:17). "వారి నోళ్లు మూయింపవలెను. అట్టివారు ఉపదేశింపకూడని వాటిని దుర్లాభము కొరకు ఉపదేశించుచు, కుటుంబములకు కుటుంబములనే పాడుచేయుచున్నారు" (తీతుకు 1:11) అని రాయబడింది.

ఇక ఆ బోధకుల గతకాలపు బోధలూ ప్రయాసల దగ్గరకు వద్దాం. అప్పుడు బానే ఉన్నవాడికి ఇప్పుడేం పోయేకాలం వచ్చిందంట పనికిమాలిన బోధలు చెయ్యడానికి? అంటే మీ బోధకుడు "హుమెనైయు, అలక్సెంద్రుల" వారసుడా? (1 తిమోతికి 1:19,20). మరో విషయం మతోన్మాదుల నోర్లు మూయించి, స్వస్థతా బోధకులకూ మరి కొందరు దుర్బోధకులకూ ఘాటైన సమాధానాలు ఇచ్చినంతమాత్రాన ఆ బోధకుడు మంచి‌ ఉద్దేశంతోనే అలా చేసాడని భ్రమపడకూడదు. గుంపును పోగేసుకోవడానికి చాలామంది‌ దుర్బోధకులు అనుసరించే ప్రారంభవైఖరి ఇలానే చాలా మంచిదిగా ఉంటుంది.‌ సంఘంలో అపవాది పరిచారకులు నీతి పరిచారకుల వేషంలోనే ప్రవేశిస్తారని మర్చిపోవద్దు (2 కొరింథీ 11:14,15). లేదంటే ఆసక్తి కలిగిన ప్రజలు అతన్ని వెంబడించరు కదా!. తీరా ఆశించిన గుంపు పోగయ్యి మంచి పేరు లభించాక అప్పుడు బయటపడుతుంది వారి నిజస్వరూపం. అందరు దుర్బోధకులూ స్వస్థతలూ అద్భుతాలూ అంటూనే అమాయకపు గుంపును పోగేసుకోరు.‌ విమర్శల పట్ల మౌనంగా ఉండే బోధకులు, స్వస్థత‌లూ అద్భుతాల బోధకులు, కర్చీఫులూ కొబ్బరి నూనె బోధకులూ వంటి దుర్బోధకుల వల్ల విసిగిపోయిన గుంపును పోగేసుకోవడానికి కూడా ఇలా కొందరు దుర్బోధకులు కుయుక్తితో ముందుకు వస్తుంటారు.

పోని మీ బోధకుడు ఒకప్పుడు మంచి బోధకుడే అనుకుందాం. అయితే మీకు‌ బిలాము ఉదాహరణ చెప్పితీరాలి. ఎందుకంటే పేతురు అతని ఉదాహరణ తీసుకునే ఈ దుర్బోధకుల బ్రతుకు చాలా బాగా బయటపెట్టాడు (2 పేతురు 2). ఆ బిలాము మొదట దేవునిప్రేరణతో ఇశ్రాయేలీయులను దీవించాడు (సంఖ్యాకాండము 23:7-11, 24:1). కానీ ప్రారంభంనుండీ అతని‌ వైఖరిని పరిశీలించినప్పుడు అతని మనసు అంతా తన లాభం కోసమే ఆలోచిస్తుంటుంది. అందుకే ఇశ్రాయేలీయులను శపించమని మోయాబీయులు రెండవసారి అతనియొద్దకు వచ్చినప్పుడు మొదటిసారి దేవుడు చెప్పినదానిప్రకారంగా వారిని పొమ్మనకుండా ఒకవేళ దేవుడు కనుక ఈసారి అనుమతిస్తే అతనికి లాభం కలుగుతుందనే ఉద్దేశంతో మళ్ళీ దేవునిదగ్గర విచారణకు వెళ్తాడు. అందుకే దేవుడు వెళ్ళు అన్నట్టుగా అనుమతి కల్పించి మార్గమధ్యంలో అతన్ని చంపడానికి ప్రయత్నిస్తాడు (సంఖ్యాకాండము 23). ఆ లాభం కోసమే అతను తాను దీవించిన ఇశ్రాయేలీయులకు ఉరియొగ్గమని మళ్ళీ బాలాకును ప్రేరేపించాడు (2 పేతురు 2:15,16, ప్రకటన 2:14). చివరికి ఇశ్రాయేలీయుల చేతిలో చచ్చాడు (యెహోషువ 13:22). నా పరిశీలణ ప్రకారం మీ ప్రియ బోధకుడు కచ్చితంగా ఇలాంటివాడే "అయినను నేను నీమీద కొన్ని తప్పిదములు మోపవలసియున్నది. అవేవనగా, విగ్రహములకు బలియిచ్చిన వాటిని తినునట్లును, జారత్వము చేయునట్లును, ఇశ్రాయేలీయులకు ఉరి యొడ్డుమని బాలాకునకు నేర్పిన బిలాముబోధను అనుసరించువారు నీలో ఉన్నారు" (ప్రకటన 2:14) ఈ వాక్యభాగం బాగా పరిశీలించండి. సందర్భరహితంగా లేఖనాలను ఉటంకిస్తూ పూర్తిలేఖనాల సారాంశాన్ని పరిధిలోకి తీసుకోకుండా ప్రస్తుతం ఇలాంటి బోధలు చేస్తుంది ఎవరు? ఈ వ్యాసం చదవండి.‌

క్రైస్తవులు తప్పనిసరిపరిస్థితుల్లో విగ్రహారాధన చెయ్యవచ్చా?

ఒకవేళ మీ బోధకుడు బిలాబు వంటి పరిచారకుడు కాకుండా దేవునిపరిచారకుడే అయ్యుంటే ఒకప్పుడు తాను చేసిన మంచిబోధలూ విరోధులకు ఇచ్చినటువంటి మంచి సమాధానాలూ తన లాభం కోసం కాకుండా సంఘంపట్ల బాధ్యతతోనే ఇచ్చుంటే అతని బోధలను ఎవరైనా వాక్యపు వెలుగులో ఖండించినప్పుడూ ప్రశ్నించినప్పుడూ సంఘక్షేమం కోసం పేతురులా వాటిని సరిచేసుకుంటాడు (గలతీ 2:11-14).‌ ప్రశ్నించినవారిపైనా తన బోధలను ఖండించినవారిపైనా అడ్డకోలు దాడులకు సిద్ధపడదు. అసూయ అక్కసూ అంటూ తనను వెంబడించే గుంపుల మనసుల్లో వారిని చెడుగా చిత్రీకరించాలి అనుకోడు. మీ బోధకుడు ఎలాంటివాడో ఒకప్పుడు ఏ ఉద్దేశంతో "కొన్ని" మంచి బోధలు బోధించాడో పరిశీలించుకోవడానికి ఇదే మీకు మంచి కొలమానం.

యూదా 1:10,11 వీరైతే తాము గ్రహింపని విషయములను గూర్చి దూషించువారై, వివేక శూన్యములగు మృగముల వలె వేటిని స్వాభావికముగా ఎరుగుదురో వాటివలన తమ్మును తాము నాశనము చేసికొనుచున్నారు. అయ్యోవారికి శ్రమ. వారు కయీను నడిచిన మార్గమున నడిచిరి, బహుమానము పొందవలెనని బిలాము నడిచిన తప్పుత్రోవలో ఆతురముగా పరుగెత్తిరి, కోరహు చేసినట్టు తిరస్కారము చేసి నశించిరి.

8. మా‌‌ బోధకుడు రోజుకు అన్ని గంటలు ప్రార్థన చేస్తాడు, అన్నిసార్లు బైబిల్ చదివాడు, అప్పులు చేసి మరీ సువార్తసభలు నిర్వహించాడు, మీరలా చెయ్యగలుగుతున్నారా అని కూడా కొందరు మమ్మల్ని విమర్శిస్తున్నారు.

మేము రోజుకు‌ ఎన్నిగంటలు ప్రార్థన చేస్తున్నామో ఎన్నిసార్లు బైబిల్ చదువుతున్నామో అది మా వ్యక్తిగత విషయం. కొందరు బోధకులు చెప్పుకుంటున్నట్టుగా ఆ వివరాలు అందరికీ తెలియచెయ్యవలసిన అవసరం మాకు లేదు. మనం ఇక్కడ కొందరు చేస్తున్న బోధలు (అవి వ్యక్తిగతం కావు) వాక్యానుసారమా కావా అనేదాని గురించి మాట్లాడుకుంటున్నాము తప్ప, ఎవరెంతసేపు ప్రార్థన చేస్తున్నారు, ఎన్నిసార్లు బైబిల్ చదువుతున్నారు అనేది తేల్చుకోవడానికి కాదు. ఇంతకూ బైబిల్ గ్రంథంలో అప్పులు చేసి మరీ సువార్త సభలు నిర్వహించమని ఎక్కడ రాయబడిందో కాస్త చూపించగలరా? నాకు తెలిసినంతమట్టుకు అప్పులు చేసి సువార్త సభలు నిర్వహించి (అందులో‌ కూడా బోధకుడి సొంత డబ్బా ఎక్కువ వినిపిస్తుంది) ఆ అప్పును సంఘంపైకి నెట్టివెయ్యమని కానీ లేక ఆ అప్పులు సరిగా తీర్చలేక వారిచేత అవమానించబడమని కానీ ఎక్కడా రాయబడి లేదు. దానికి ప్రతిగా "మీలో ఎవడైనను ఒక గోపురము కట్టింప గోరిన యెడల దానిని కొనసాగించుటకు కావలసినది తన యొద్ద ఉన్నదో లేదో అని కూర్చుండి తగులుబడి మొదట లెక్క చూచుకొనడా? చూచుకొననియెడల అతడు దాని పునాదివేసి, ఒకవేళ దానిని కొనసాగింప లేక పోయినందున చూచువారందరుఈ మనుష్యుడు కట్ట మొదలు పెట్టెను గాని కొనసాగింపలేక పోయెనని అతని చూచి యెగతాళి చేయ సాగుదురు" (లూకా 14:28-30) అని రాయబడింది. కాబట్టి బైబిల్ ఖచ్చితంగా చెయ్యమని ఆజ్ఞాపించని ఒక విషయంలో మమ్మల్ని విమర్శించే హక్కు ఎవరికీ లేదు.

9. మరికొందరు మేము తమ దుర్బోధలను వాక్యపు వెలుగులో ఖండిస్తున్నప్పుడు మీరు అక్షరాలు పట్టుకు‌నే వ్రేలాడుతుంటారు తప్ప ఆత్మీయభావం గురించి మీకు తెలియదంటూ వారు చేస్తున్న వాక్యవిరుద్ధబోధను ఆత్మీయభావంగా చిత్రీకరిస్తుంటారు. కానీ ఇలా తమ దుర్బోధలను ఆత్మీయభావం అంటూ సమర్ధించుకునేవారు అసలు పౌలు "అక్షరము చంపునుగాని ఆత్మ జీవింపచేయును" (2కోరింథీ 3:6) అని వేటిని ఉద్దేశించి మాట్లాడుతున్నాడో అర్థం తెలుసుకుంటే బావుండేది. వీరి ఆత్మీయభావం వాక్యభావం విషయంలో మాత్రం ఎందుకు పనిచెయ్యదో మరి. పౌలు ఆ సందర్భంలో మోషే ధర్మశాస్త్రాన్ని అక్షరంతో పోలుస్తూ క్రొత్తనిబంధనను ఆత్మగా పేర్కొంటున్నాడు. ఆ సంబంధమైన వారి పరిచర్య ధర్మశాస్త్ర సంబంధమైన పరిచర్య కంటే అధికమహిమ కలది అని అతని సత్యవాదన.

2 కొరింథీ 3:6-6 ఆయనే మమ్మును క్రొత్త నిబంధనకు, అనగా అక్షరమునకు కాదు గాని ఆత్మకే పరి చారకులమవుటకు మాకు సామర్థ్యము కలిగించియున్నాడు. అక్షరము చంపునుగాని ఆత్మ జీవింపచేయును. మరణ కారణమగు పరిచర్య, రాళ్లమీద చెక్కబడిన అక్షరములకు సంబంధించినదైనను, మహిమతో కూడినదాయెను. అందుకే మోషే ముఖము మీద ప్రకాశించుచుండిన ఆ మహిమ తగ్గిపోవునదైనను, ఇశ్రాయేలీయులు అతని ముఖము తేరిచూడలేక పోయిరి. ఇట్లుండగా ఆత్మ సంబంధమైన పరిచర్య యెంత మహిమగలదై యుండును? శిక్షా విధికి కారణమైన పరిచర్యయే మహిమ కలిగినదైతే నీతికి కారణమైన పరిచర్య యెంతో అధికమైన మహిమ కలదగును.

అంతేతప్ప బైబిల్ లో రాయబడిన అక్షరాల గురించి పౌలు మాట్లాడడం లేదు. ఎందుకంటే బైబిల్ అంతా కూడా ఆత్మీయతకు మూలమైన పరిశుద్ధాత్మ ప్రేరేపితంగానే రాయబడింది (2 పేతురు 1:20,21, 2 తిమోతీ 3:16,17). కాబట్టి పరిశుద్ధాత్ముడు వాక్యంలో లేని భావాన్ని లేక వాక్యపుసారాంశానికి వ్యతిరేకమైన భావాన్ని ఎవరికీ బయలుపరచడు. అందుకే పౌలు "మనుష్యజ్ఞానము నేర్పుమాటలతో గాక ఆత్మ సంబంధమైన సంగతులను ఆత్మ సంబంధమైన సంగతులతో సరిచూచుచు, ఆత్మ నేర్పు మాటలతో వీటిని గూర్చియే మేము బోధించుచున్నాము" (1కోరింథీ 2:13) అంటూ ఆత్మసంబంధమైనవాటిని అనగా వాక్యాన్ని ఆత్మసంబంధమైన వాటితోనే అనగా వాక్యంతోనే సరిచూసుకుంటూ అప్పుడు ఆత్మ బయలుపరిచే మాటలను అనగా వాక్యపు సారాంశాన్ని బోధిస్తున్నాము అంటున్నాడు.‌

కీర్తనలు 119:160 నీ వాక్య సారాంశము సత్యము.

పౌలు పరిచర్యను మనం గమనించినప్పుడు అతని పాతనిబంధన లేఖనాలను ఎంతో చక్కగా ఆ లేఖనాలతోనే పోలుస్తూ క్రీస్తు గురించి బోధించ‌డం మనం స్పష్టంగా గ్రహిస్తాం. కాబట్టి ఆత్మీయభావం అనేది వాక్యానికి వెలుపల ఉండదు వాక్యంలోనే ఉంటుంది. ఎందుకంటే ఆత్మదేవుడే వాక్యాన్ని రాయించాడు. యేసుక్రీస్తు చాలా స్పష్టంగా తన మాటలను అనగా వాక్యాన్ని "ఆత్మయు జీవమునై యున్నవి" (యోహాను 6:63) అని సంబోధించారు. ఆయన మాటలనే శిష్యులంతా తమ‌ పత్రికల్లో రాసారు (యోహాను 16:12-14). ఒకవేళ ఆత్మీయభావం అనేది వాక్యంలో ఉన్నదానికి సంబంధించింది కాకపోతే అక్షరం అనగా వాక్యమే అయ్యుండి అది చంపేదే ఐతే ఇదే పౌలు; "సహోదరులారా, మీరు మమ్మును చూచి, లేఖనముల యందు వ్రాసియున్న సంగతులను అతిక్రమింపకూడదని నేర్చుకొని" (1కోరింథీ 4:6) అని లేఖనాలకోసం ఎందుకు రాస్తున్నాడు? మీకు కొత్తగా బయలుపరచబడే ఆత్మీయభావాన్ని అతిక్రమించొద్దు అని కదా రాయాలి. అలాగే "కాబట్టి సహోదరులారా, నిలుకడగా ఉండి మా నోటిమాటవలననైనను మా పత్రిక వలననైనను మీకు బోధింపబడిన విధులను చేపట్టుడి" (2థెస్సలోనిక 2:15) అని కూడా ఎందుకు రాస్తున్నాడు? ఈరోజుల్లో తమ మనసులో ఉన్న చెత్తనంతా వాక్యంపై రుద్దేసి దాన్ని సమర్థించుకోవాలి‌ అనుకునే ప్రతీఒక్కరూ అది ఆత్మీయభావం అనే సాకు పెట్టుకోవడం సర్వసాధారణం అయిపోయింది. ఇలాంటివాళ్ళే "సిద్ధాంతాలతో మనకు పనిలేదు" అన్నట్టుగా కూడా మాట్లాడుతుంటారు. కానీ వాక్యం జీవం అయినప్పుడు "నేను మీతో చెప్పియున్న మాటలు (వాక్యం) ఆత్మయు జీవమునై యున్నవి" (యోహాను 6:63) వాక్యసంబంధమైన సిద్ధాంతాలు కూడా ఆత్మయు జీవమునై ఉన్నాయి కాబట్టి అవి మనకు అవసరమే.

10. కొందరు ఇలా మీరు ఇతర సేవకుల గురించి బహిరంగంగా మాట్లాడకండి, ఏదైనా ఉంటే వారితో వ్యక్తిగతంగా మాట్లాడమని కూడా సలహాలు ఇస్తున్నారు.

వీరు చెబుతున్న ఆ సేవకులు వ్యక్తిగతంగా ఏదైనా చేసుంటే అప్పుడు వ్యక్తిగతంగానే మాట్లాడుదుము. కానీ వారు బహిరంగంగా చేసిన దుర్బోధలను బహిరంగంగా ఖండించకుంటే ఆ దుర్బోధల వల్ల మోసపోతున్న విశ్వాసులకు అవి దుర్బోధలని ఎలా అర్థమౌతాయి? ఇలాంటి ఉచితసలహాలు ఇచ్చేవారు అపోస్తలుల పత్రికలను చదివుంటే వారు దుర్బోధలు చేస్తున్నవారి పేర్లను ప్రకటించి మరీ ఆ‌ బోధలను ఖండించడం కనిపించియుండేది (1 తిమోతీ 1:19,20). ఎందుకంటే వారికి సంఘక్షేమాభివృద్ధి ముఖ్యం, మాకు కూడా అదే ముఖ్యం. వీరికి దానితో పని ఉండదు‌ కాబట్టి, ఆ సంఘక్షేమాభివృద్ధి కోసం ప్రయాసపడుతున్న మావంటివారికి ఉచితసలహాలు ఇవ్వడమూ మేము చేస్తుందేదో నేరమైనట్టు నిందించడంతోనే కాలయాపనలు చేస్తుంటారు. ఇంతకూ "వ్యక్తిగతంగా మాట్లాడాలనే మాటలు" ఏ సందర్భంలో చెప్పబడ్డాయో తెలుసా?

మత్తయి 18:15 మరియు నీ సహోదరుడు నీయెడల తప్పిదము చేసిన యెడల నీవు పోయి, నీవును అతడును ఒంటరిగానున్నప్పుడు అతనిని గద్దించుము; అతడు నీ మాట వినినయెడల నీ సహోదరుని సంపాదించుకొంటివి.

ఇక్కడ "నీ సహోదరుడు నీయెడల తప్పిదము చేసిన యెడల" అనేమాటలు గమనించండి. అంటే నా సహోదరుడు వ్యక్తిగతంగా నాపట్ల తప్పు చేస్తే కనుక మొదటే అతన్ని అందరిలోనూ సిగ్గుపరచకుండా వ్యక్తిగతంగా గద్దించాలి. అది ఇక్కడ సందర్భం. అంతేతప్ప ఈ మాటలు బహిరంగంగా దుర్బోధలు చేస్తున్నవారితో కూడా వ్యక్తిగతంగా మాట్లాడాలని చెప్పడం లేదు. నా సహోదరుడు నాపట్ల ఏదైనా తప్పుచేసుంటే అది నాకు మాత్రమే నష్టం, కానీ ఒక బోధకుడు బహిరంగంగా దుర్బోధ చేసినప్పుడు క్రైస్తవ్యానికే నష్టం. కాబట్టి దానిని బహిరంగంగానే ఖండించాలి. "వీటిని గూర్చి బోధించుచు, హెచ్చరించుచు సంపూర్ణాధికారముతో దుర్భోధను ఖండించుచునుండుము నిన్నెవనిని తృణీకరింపనీయకుము" (తీతుకు 2:15). అలా ఖండిస్తే కాదు ఖండించకుంటే తప్పు. ఎందుకంటే అది వాక్యానికీ సంఘానికీ ద్రోహం చెయ్యడమే (యూదా 1:3,4). ఈ నియమం "ఇతరులు భయపడు నిమిత్తము పాపము చేయువారిని అందరియెదుట గద్దింపుము" (1తిమోతికి 5:20) అనే మాటలతో పోల్చి అర్థం చేసుకోండి. సంఘంలో దుర్బోధకు మించిన పాపం లేదని నా అభిప్రాయం.

ఇప్పటివరకూ మనం చూసిన విమర్శలు కొందరు బోధకుల అనుచరుల నుండి మాపై సంధించబడితే  కొందరు సాధారణ క్రైస్తవులు కూడా మేము చేస్తున్నదానిని అపార్థం చేసుకుంటూ దానిపై వారి అభ్యంతరాలను తెలియచేస్తున్నారు. వారికి కూడా ఇక్కడ ప్రేమపూర్వకమైన సమాధానాలు ఇవ్వదలిచాను.

A. ప్రభువు మనకు సువార్త ప్రకటించమనే భారాన్ని అప్పగిస్తే మీరది చేయకుండా కొందరు బోధకులపై ఇలాంటి విమర్శలు ఎందుకు చేస్తున్నారు, ఇలాంటివి చేసి ఎంతమందిని రక్షిస్తున్నారని కొందరు మమ్మల్ని ప్రశ్నిస్తున్నారు.

ప్రభువు మనకు సువార్త ప్రకటించే బాధ్యత మాత్రమే కాదు సువార్త పేరిట జరుగుతున్న వాక్యవిరుద్ధ బోధలను ఖండించే బాధ్యతను కూడా అప్పగించాడని ఆధారాలతో తెలియచేసాను (యూదా 1:3, 2తిమోతీ 4:1-4, తీతుకు 2:15). భిన్నమైన సువార్త సమాజంలో ప్రవేశించినప్పుడు దానిని బహిర్గతం చేసి, వాక్యం చెప్పే అసలైన సువార్త ఏదో ప్రజలకు అవగాహన కల్పించడం కూడా సువార్త పనిలో భాగమే. సువార్త ప్రకటించడానికి స్వయంగా యేసుక్రీస్తు ప్రభువు చేతే నియమించబడిన అపోస్తలులు కూడా భిన్నమైన సువార్త సంఘంలో చెలరేగినప్పుడు దానిని ఖండించినట్టుగా వారి పత్రికలు సాక్ష్యమిస్తున్నాయి. అంటే వారు సువార్తను పక్కన పెట్టేసి విమర్శలు చెయ్యడం ప్రారంభించారని అర్థమా? అదేవిధంగా మనం చేసే బోధలన్నీ అన్యులను రక్షణలోకి నడిపేందుకు మాత్రమే కాదు, అప్పటికే రక్షించబడిన వారికి ఆధ్యాత్మిక అభివృద్ది కలుగచెయ్యడానికి , వాక్యవిరుద్ధమైన బోధలపై వారికి అవగాహన కల్పించడానికి కూడా దోహదపడతాయి.

కాబట్టి దుర్భోధలను‌ ఖండించేవారిని మీరు ఈవిధంగా చేస్తూ ఎంతమంది అన్యులను రక్షిస్తున్నారని ప్రశ్నించడం సరికాదు. అది నువ్వు స్నానం చెయ్యడం వల్ల ఆకలి తీరుతుందా అని ప్రశ్నించినట్టుగానే ఉంటుంది. ఎందుకంటే ఒక వ్యక్తి ఆకలి తీరడానికి భోజనం చేస్తాడు, వ్యక్తిగత శుభ్రత కోసం స్నానం చేస్తాడు, అవి రెండూ ఆ వ్యక్తికి అవసరమే. ఈవిధంగా దుర్భోధలను ఖండించేవారు ఆ సమయంలో ఆ పని చేస్తుంది అన్యులను రక్షించడానికి కాదు కానీ అప్పటికే రక్షించబడ్డామని భావించేవారికి వారు నమ్ముతున్న వాక్యవిరుద్ధమైన బోధలపై అవగాహన కల్పించడానికీ మరికొందరు ఆ బోధలలో చిక్కుకోకుండా తప్పించడానికి మాత్రమే. అలా అని మేము ఈ పని‌ని చేస్తూ సువార్తను ఎక్కడా నిర్లక్ష్యం చెయ్యడం లేదు, మా వెబ్ సైట్ లో సువార్తకు సంబంధించిన వ్యాసాలను కూడా మీరు చదవవచ్చు. ఇంతకూ మాపై ఈ ప్రశ్నను సంధిస్తున్నవారు వారి కొలమానం ప్రకారం మాపై ఈ ప్రశ్నను సంధించడం ద్వారా ఎంతమందిని రక్షించగలిగారు?

B. మీరు క్రైస్తవులైయుండి క్రైస్తవ సేవకులనే విమర్శిస్తూ క్రైస్తవ్యాన్ని చులకన చేస్తున్నారు, దేవుని నామాన్ని అవమానిస్తున్నారని మా విషయంలో కొందరు వాపోతున్నారు. క్రైస్తవ్యంలో ఉన్న భిన్నమైన సువార్తను (బోధను) బహిర్గతం చెయ్యడం క్రైస్తవ్యాన్ని అన్యుల ముందు చులకన చెయ్యడం అవ్వదు. అది క్రైస్తవ నైతికతనూ సత్యం పట్ల వారికున్న రాజీపడని తత్వాన్నీ చాటి చెప్పడమే ఔతుంది. అన్యుల ముందు దేవుని నామం అవమానించబడేది దుర్భోధలను ఖండించేవారి వల్ల కాదు కానీ దేవుని పేరుతో దుర్భోధలను చేస్తూ చెడు ప్రవర్తనను అనుసరించేవారివల్లే అని వాక్యం చెబుతుంది.

2 పేతురు 2:1,2 మరియు అబద్ధప్రవక్తలు ప్రజలలో ఉండిరి. అటువలెనే మీలోను అబద్దబోధకులుందురు; వీరు తమ్మును కొనిన ప్రభువును కూడ విసర్జించుచు, తమకు తామే శీఘ్రముగా నాశనము కలుగజేసికొనుచు, నాశనకరమగు భిన్నాభిప్రాయములను రహస్యముగా బోధించుదురు. మరియు అనేకులు వారి పోకిరిచేష్టలను అనుసరించి నడుతురు; వీరినిబట్టి సత్యమార్గము దూషింపబడును.

ప్రస్తుతం మన సమాజంలో దేవుని నామం దూషించబడేదీ క్రైస్తవ్యం చులకన చేయబడేదీ స్వస్థతలు, అద్భుతాలు, ప్రవచనాలు అంటూ దుర్భోధలు చేసే బోధకులను బట్టి కాదా?. అలానే మనం ప్రారంభ క్రైస్తవ సంఘచరిత్రను పరిశీలిస్తే వారు అన్యుల ద్వారా యూదుల ద్వారా చాలా హింసలు పడుతున్న సమయంలో కూడా అపోస్తలలు సంఘంలో ప్రవేశించిన దుర్భోధకులను బహిర్గతం చేస్తూ వచ్చారు (తరువాత చరిత్రలో కూడా ఇదే జరుగుతూ వచ్చింది). వారంతా మనం ఇలా చేస్తే దేవుని నామం అవమానించబడుతుంది, క్రైస్తవ్యం చులకన చెయ్యబడుతుందనే‌ అవగాహన లేకనే అలా చేసారంటారా? ఎవరిముందో చులకన ఔతామని భావించి వాక్యవిరుద్ధమైన బోధలతో బోధకులతో రాజీపడి వారిని/వాటిని సహించడం వాక్యానికీ దేవునికీ వ్యతిరేఖంగా మారడమే సుమా! దానివల్ల సంఘానికి కూడా ఎంతో నష్టం.

2 తిమోతికి 2:17,18 కొరుకుపుండు ప్రాకినట్టు వారిమాటలు ప్రాకును, వారిలో హుమెనైయును ఫిలేతును ఉన్నారు;  వారు పునరుత్థానము గతించెనని చెప్పుచు సత్యము విషయము తప్పిపోయి, కొందరి విశ్వాసమును చెరుపుచున్నారు.

C. కొందరు తీర్పు తీర్చకుడి అప్పుడు మిమ్మను గూర్చి తీర్పు తీర్చబడదు అనే వాక్యభాగాన్ని ప్రస్తావిస్తూ మేము చేసేది తప్పైనట్టు నేరం మోపుతున్నారు.

వాస్తవానికి ఆ వాక్యపు సందర్భం‌ దుర్బోధల గురించి కానే కాదు, దుర్బోధలకు మనం తీర్పు తీర్చేవారిగా ఉండాలనే  ప్రభువు మనకు బైబిల్ ఇచ్చాడు, దుర్బోధల ఖండించమని ఆజ్ఞాపించాడు (తీతుకు 2;15). ఇంతకూ మనం ఎవరికీ తీర్పుతీర్చకూడదని భావించేవారు, మేము చేసేది తప్పని చెబుతూ మాకెందుకు తీర్పు తీరుస్తున్నారు?

D. కొందరు మేము ఏ బోధకుల బోధలనైతే వాక్యానుసారంగా ఖండిస్తున్నామో వారిలో ఎవరొకరి పేరును ప్రస్తావించి, ఆయన చెప్పిన బోధమూలంగానే మేము రక్షించబడ్డామనీ/బలపరచబడ్డామని మా రక్షణకు/అభివృద్ధికి కారణమైన బోధకుడి మాటలు వాక్యవిరుద్ధమని ఎలా చెబుతారంటూ ఆవేదన వ్యక్తం చేస్తున్నారు.

మన రక్షణ అనేది బోధకుడి చేతుల్లో లేదని, దేవుని నిర్ణయంలోనే ఉందనీ బోధకుడు కేవలం దేవుడు వాడుకునే సాధనం మాత్రమేయని ఇప్పటికే తెలియచేసాను. ఒక బోధకుడు చెప్పిన మాటలవల్ల ఒక వ్యక్తి రక్షించబడినంత మాత్రాన (అది వాక్యానుసారమైన రక్షణే ఐతే ) ఆ బోధకుడు చేసిన మిగిలిన బోధలన్నీ సత్యమైపోవు. ఎంత పెద్ద దుర్భోధకుడైనా ఏదో ఒక సమయంలో సార్వాత్రికంగా చెయ్యబడుతున్నటువంటి ఏదోఒక సత్యబోధ చెయ్యడం సహజం. మనం ఎంతో కౄరులుగా భావించే టెర్రరిస్టులు కూడా తమ జీవితంలో ఏదో ఒక మంచిపనైనా చెయ్యకుండా ఉండరు కదా?. గమనించండి. దేవుడు సాతానును వాడుకుని కూడా తన కార్యాన్ని జరిగించుకుంటాడు, అదేవిధంగా ఒక వ్యక్తిని రక్షించడానికి దేవుడు ఎవర్నైనా వాడుకుంటాడు, కొన్నిసార్లు రోగాలనూ శోధనలను కూడా వాడుకుంటాడు. క్రూరుడైన కయప చేత కూడా ఆయన ఒక‌ సందర్భంలో యేసుక్రీస్తు మరణం గురించి ప్రవచనం చెప్పించాడు (యోహాను 11:49-52).

ఈ వ్యాసం రాస్తున్నటువంటి నేను కూడా గతంలో ఒక దుర్బోధకుడు చేసినటువంటి ప్రసంగం వినే బైబిల్ ను ఇంకా ఆసక్తితో చదవడం ప్రారంభించాను. అలా చదువుతూ మిగిలిన బోధకుల రచనలనూ బోధలనూ పరిశీలించినప్పుడు, ఆ బోధకుడు చేస్తున్నటువంటి చాలా బోధలు దుర్బోధలని గ్రహించి వాటిపై చాలామందికి అవగాహన కల్పించడం ప్రారంభించాను. ఇప్పటికీ‌ ఆ దుర్బోధలపై వ్యాసాలు రాస్తున్నాను. ఎందుకంటే నేను అ వ్యక్తిని బట్టే బైబిల్‌పై మరింత ఆసక్తి పెంచుకున్నప్పటికీ ‌నాలో ఆ ఆసక్తిని పుట్టించినవాడు దేవుడేయని నేను గుర్తించాను.

గాడిదను వాడుకుని బిలాముకు బుద్ధి చెప్పిన దేవుడే ఆ బోధకుడు చెప్పిన కొన్ని మాటల ద్వారా నాలో‌ ఆసక్తిని రేకెత్తించాడు. అలా అని ఆ వ్యక్తిపై నాకు అభిమానం లేకుండా పోలేదు, అందుకే ఇప్పటికీ ఆయన మారుమనస్సు పొంది సత్యాన్ని గ్రహించి తన తప్పుడు బోధలను బాహాటంగా సరిచేసుకోవాలని కోరుకుంటున్నాను. కాబట్టి మన రక్షణలో దేవుడు సాధనంగా వాడుకున్న బోధకుడి‌ కోసం మనం సత్యంతో రాజీపడే ఘోరతప్పిదం‌ చెయ్యకూడదు, ఎందుకంటే క్రైస్తవుడు సత్యసంబంధి.

E. ప్రభువు విశ్వాసులందరినీ ఏకంగా ఉండమని ఆజ్ఞాపిస్తే మీరు సంఘంలో చీలికలు తీసుకువస్తున్నారని కూడా కొందరు మమ్మల్ని నిందిస్తున్నారు.

మనల్ని ఏకంగా‌ ఉండమని ఆజ్ఞాపించిన ప్రభువే మనం దేనితో ఏకమైయుండాలో కూడా స్పష్టంగా వివరించాడు.

యోహాను సువార్త 17:21,22 వారును మనయందు ఏకమైయుండవలెనని వారికొరకు మాత్రము నేను ప్రార్థించుటలేదు; వారి వాక్యమువలన నాయందు విశ్వాసముంచువారందరును ఏకమైయుండ వలెనని వారికొరకును ప్రార్థించుచున్నాను. మనము ఏకమైయున్నలాగున, వారును ఏకమైయుండవలెనని నీవు నాకు అనుగ్రహించిన మహిమను నేను వారికి ఇచ్చితిని.

దీనిప్రకారం విశ్వాసులు వాక్యంతో ఏకమైయుండాలి, వాక్యవిరుద్ధమైన బోధలతో కాదు. సత్యం, అసత్యం ఎప్పటికీ ఏకమైయుండలేవు. అందుకే "పెద్దనైన నేను సత్యమునుబట్టి ప్రేమించు ప్రియుడైన గాయునకు శుభమని చెప్పి వ్రాయునది" (3యోహాను 1:1) అని యోహాను పత్రిక రాస్తున్నాడు. మన ప్రేమ ఐక్యత సత్యాన్ని బట్టి అనగా వాక్యాన్ని బట్టే ఉండాలి.

G. మీరు ఇంటిగుట్టును ఇలా బయటపెట్టడం మతోన్మాదులకు క్రైస్తవ్యాన్ని విమర్శించే అవకాశం కల్పించడమే అని కూడా కొందరు మమ్మల్ని విమర్శిస్తున్నారు.

సాధారణంగా మతోన్మాదులు వారి మతానికి చెందినవారు ఏ తప్పిదం చేసినప్పటికీ అవి బయటపడకుండా చూసుకుంటారు. కానీ నిజక్రైస్తవులు బైబిల్ బోధపై సంఘం వెలుపటి నుండి దాడి జరిగినా లోపటి నుండి జరిగినా సమానంగా బయటపెట్టి తమ నైతికతను చాటుకుంటారు.

మతోన్మాదులు మనం అవకాశం ఇచ్చినప్పటికీ  ఇవ్వనప్పటికీ వారు బైబిల్ పైనా క్రైస్తవ్యంపైనా విషం చిమ్మడం మానరు, అది వారి నైజం. అందుకే వారి గురించి "భక్తిహీనులు కదలుచున్న సముద్రమువంటివారు అది నిమ్మళింపనేరదు దాని జలములు బురదను మైలను పైకివేయును" (యెషయా 57:20) అని రాయబడింది. ఏ అవకాశం ఉందని ఈరోజు వారు మిషనరీ సేవలను కూడా నీచంగా అవమానిస్తున్నారు? సంఘంలోని దుర్భోధలను బహిర్గతం చెయ్యడం వల్ల మతోన్మాదులకు ఏదో అవకాశం ఇచ్చినట్టు‌ ఉంటుందని మనం జీవం గల దేవుని సంఘాన్ని బైబిల్ బోధ నుండి భిన్నమైన బోధ తట్టుకు నడిపిస్తున్నవారిని సహించాలా? ప్రభువు మనపై పెట్టిన బాధ్యతను విస్మరించాలా? కొరింథీ సంఘపువారు ఈ విధంగానే ఏవేవో కారణాలతో కొన్ని దుర్భోధలను సహిస్తున్నప్పుడు పౌలు వారితో వంగ్యంగా పలుకుతున్నటువంటి ఈ మాటలు చూడండి.

2 కొరింథీయులకు 11:2-4 దేవాసక్తితో మీ యెడల ఆసక్తి కలిగియున్నాను; ఎందుకనగా పవిత్రురాలైన కన్యకనుగా ఒక్కడే పురుషునికి, అనగా క్రీస్తుకు సమర్పింపవలెనని, మిమ్మును ప్రధానము చేసితిని గాని, సర్పము తనకు యుక్తిచేత హవ్వను మోసపరచినట్లు మీ మనస్సులును చెరుపబడి, క్రీస్తు ఎడలనున్న సరళత నుండియు పవిత్రత నుండియు ఎట్లయినను తొలగిపోవునేమో అని భయపడుచున్నాను. ఏలయనగా వచ్చినవాడెవడైనను మేము ప్రకటింపని మరియొక యేసును ప్రకటించినను, లేక మీరు పొందని మరియొక ఆత్మను మీరు పొందినను,మీరు అంగీకరింపని మరియొక సువార్త మీరు అంగీకరించినను, మీరు వానిని గూర్చి సహించుట యుక్తమే.

కాబట్టి, ఇకమీదట మేము ఎవరి బోధలనైనా దుర్భోధలుగా గుర్తించి ఖండిస్తున్నప్పుడు, మేము చెప్పేది వాక్యానుసారంగా ఉందా లేదా అనేది మాత్రమే పరిశీలిస్తూ దానిప్రకారం‌ మమ్మల్ని విమర్శించండి. లేదా ఇలాంటి అనవసరపు విమర్శలు ఏమైనా బాకీ ఉంటే వాటిని కూడా సంధించడానికి సిద్ధపడండి. విమర్శలు ఎన్ని వచ్చినప్పటికీ సమాధానం ఇవ్వడానికి మేము సిద్ధంగా ఉన్నాము, ఉంటాము.

ప్రకటన గ్రంథం 3:8,9 నీ క్రియలను నేనెరుగుదును; నీకున్న శక్తి కొంచెమై యుండినను నీవు నా వాక్యమును గైకొని నా నామము ఎరుగననలేదు. ఇదిగో తలుపు నీయెదుట తీసియుంచి యున్నాను; దానిని ఎవడును వేయనేరడు. యూదులు కాకయే తాము యూదులమని అబద్ధమాడు సాతాను సమాజపు వారిని రప్పించెదను; వారు వచ్చి నీ పాదముల యెదుట పడి నమస్కారముచేసి, ఇదిగో, నేను నిన్ను ప్రేమించితినని తెలిసికొనునట్లు చేసెదను.