నేటి విశ్వాసులు చాలామందికి తమ రక్షణ విషయంలో దేవుని సంకల్పానుసారమైన నిర్ణయం గురించి తెలియకపోవడం వల్ల ఆ రక్షణ విషయంలో చాలా అనిశ్చితి కలిగియుంటున్నారు. ఉదాహరణకు; ఒక విశ్వాసి పాపం చేసాడు. వెంటనే అతను "మన పాపములను మనము ఒప్పుకొనిన యెడల, ఆయన నమ్మదగినవాడును నీతిమంతుడును గనుక ఆయన మన పాపములను క్షమించి సమస్త దుర్నీతినుండి మనలను పవిత్రులనుగా చేయును" (1యోహాను 1:9) అనే వాక్యభాగాన్ని బట్టి ఆ పాపం విషయంలో దేవుని ముందు పశ్చాత్తాపపడాలి. మరలా ఆ పాపం జోలికి పోకుండా జాగ్రత్తపడాలి. కానీ కొందరు అలా చెయ్యకుండా తాము పాపం చెయ్యగానే మా రక్షణను కోల్పోయాము అనే అపోహతో పూర్తిగా దేవునికి దూరమయ్యే ప్రయత్నం చేస్తున్నారు. దీనికి రక్షణ విషయంలో వారికి నిశ్చయత లేకపోవడమే కారణం. అలానే మన రక్షణకు కారణం కేవలం దేవుని నిర్ణయమేనని అనగా ఆయన నిర్ణయానుసారమైన కృపయే అని, ఆ రక్షణ సంపాదించుకునేలా మనలో ఏ యోగ్యతా లేదని గుర్తించినప్పుడే ఆ రక్షణ విషయంలో ఆయనను మరింతగా స్తుతించగలం. లేకుంటే మన రక్షణకు మనం కూడా కారణం అన్నట్టుగా ఉప్పొంగడం, రక్షణ పొందనివారితో పోల్చుకుని గర్వించడం వంటివి చేసే ప్రమాదం ఉంది.

విశ్వాసులు అలా చెయ్యకూడదనే పౌలు "కృపచేత మీరు రక్షింపబడియున్నారు. మీరు విశ్వాసము ద్వారా కృపచేతనే రక్షింపబడియున్నారు; ఇది మీవలన కలిగినది కాదు, దేవుని వరమే. అది క్రియల వలన కలిగినది కాదు గనుక ఎవడును అతిశయపడ వీలులేదు" (ఎఫెసీ 2:5-9) అని హెచ్చరిస్తున్నాడు. మన రక్షణ కేవలం దేవుని నిర్ణయానుసారమైన కృపను బట్టే. ఇందులో మనం అతిశయించడానికి ఏమీ లేదు. అందుకే పరలోకం చేరిన భక్తులు "తెల్లని వస్త్రములు ధరించు కొన్నవారై, ఖర్జూరపుమట్టలు చేత పట్టుకొని సింహాసనము ఎదుటను గొర్రెపిల్లయెదుటను నిలువబడి. సింహాసనాసీనుడైన మా దేవునికిని గొఱ్ఱెపిల్లకును మా రక్షణకై స్తోత్రమని మహాశబ్దముతో ఎలుగెత్తి చెప్పిరి" (ప్రకటన 7:9,10) అని ఆయనకు స్తుతించబోతున్నట్టుగా రాయబడింది. ఇది అర్థమైనప్పుడు కేవలం తన కృపతో మనల్ని రక్షించిన దేవునికి విరోధంగా పాపం చేసే సాహసం కూడా మనం చెయ్యలేము. దానికి మంచి ఉదాహరణే "క్రీస్తు ప్రేమ మమ్మును బలవంతము చేయుచున్నది. ఏలాగనగా అందరి కొరకు ఒకడు మృతిపొందెను గనుక అందరును మృతిపొందిరనియు, జీవించువారికమీదట తమకొరకు కాక, తమ నిమిత్తము మృతిపొంది తిరిగి లేచినవాని కొరకే జీవించుటకు ఆయన అందరి కొరకు మృతిపొందెననియు నిశ్చయించు కొనుచున్నాము" (2కోరింథీ 5:14) అనే ఈ పౌలు మాటలు.

ఈ రక్షణకు సంబంధించిన దేవుని నిత్యనిర్ణయం గురించి తెలియకపోవడం వల్లే కొంతమంది సేవకులు తమ వాక్యపరిచర్య వల్ల రక్షించబడినవారిని తామే రక్షించాము అన్నట్టుగా అతిశయించడం, వారి ఆత్మలకు వీరే ప్రభువులు, నాయకులు అన్నట్టుగా పెత్తనం చెలాయించడం (విశ్వాసులు కూడా వీరికి అలానే లోబడడం) మరి కొందరు సేవకులైతే తాము కష్టపడి సువార్త ప్రకటించినప్పటికీ ఎవరూ మార్పుచెందడం లేదని నిరాశ చెందడం, ఆ కారణంగా తమ ప్రయత్నాన్ని విడిచిపెట్టడం చేస్తున్నారు.

అందుకే రక్షణ అనేది మనిషికి కేవలం దేవుని నిర్ణయాన్ని బట్టే లభిస్తుందని, ఆ రక్షణను ఎవ్వరూ కోల్పోలేరని వాక్య ఆధారాలతో ఈ వ్యాసం రాస్తున్నాను. ఈ క్రమంలో చదువరులకు తలెత్తే ప్రాముఖ్యమైన సందేహాలకు కూడా సమాధానం ఇవ్వబోతున్నాను.

మొదటిగా రక్షణ గురించి ఏమని రాయబడిందో పరిశీలిద్దాం.

ఎఫెసీయులకు 1:4-6 ఎట్లనగా తన ప్రియునియందు తాను ఉచితముగా మనకనుగ్రహించిన తన కృపా మహిమకు కీర్తి కలుగునట్లు, తన చిత్త ప్రకారమైన దయా సంకల్పము చొప్పున, యేసుక్రీస్తు ద్వారా తనకు కుమారులనుగా స్వీకరించుటకై,మనలను ముందుగా తన కోసము నిర్ణయించుకొని, మనము తన యెదుట పరిశుద్ధులమును నిర్దోషులమునై యుండవలెనని జగత్తు పునాది వేయబడకమునుపే, ప్రేమచేత ఆయన క్రీస్తులో మనలను ఏర్పరచుకొనెను.

ఎఫెసీయులకు 1:12 దేవుడు తన చిత్త ప్రకారమైన సంకల్పమును బట్టి మనలను ముందుగా నిర్ణయించి, ఆయన యందు స్వాస్థ్యముగా ఏర్పరచెను. ఆయన తన చిత్తాను సారముగా చేసిన నిర్ణయము చొప్పున సమస్త కార్యములను జరిగించుచున్నాడు.

2 థెస్సలొనికయులకు 2: 13 ప్రభువువలన ప్రేమింపబడిన సహోదరులారా, ఆత్మ మిమ్మును పరిశుద్ధపరచుటవలనను, మీరు సత్యమును నమ్ముటవలనను, రక్షణపొందుటకు దేవుడు ఆదినుండి మిమ్మును ఏర్పరచుకొనెను గనుక మేము మిమ్మునుబట్టి యెల్లప్పుడును దేవునికి కృతజ్ఞతాస్తుతులు చెల్లింప బద్ధులమైయున్నాము.

ఈ వాక్యభాగాల ప్రకారం; నేడు క్రీస్తునందు విశ్వాసులైన వారంతా జగత్తు పునాది వెయ్యబడకముందే దేవుడు తన చిత్తానుసారంగా చేసిన నిర్ణయాన్ని బట్టి ఆయనను విశ్వసించారని (రక్షించబడ్డారని) మనకు అర్ధమౌతుంది.

మరో వాక్యభాగం కూడా చూడండి -

రోమీయులకు 8:29,30 ఎందుకనగా తన కుమారుడు అనేక సహోదరులలో జ్యేష్ఠుడగునట్లు, దేవుడెవరిని ముందు ఎరిగెనో, వారు తన కుమారునితో సారూప్యము గలవారవుటకు వారిని ముందుగా నిర్ణయించెను. మరియు ఎవరిని ముందుగా నిర్ణయించెనో వారిని పిలిచెను; ఎవరిని పిలిచెనో వారిని నీతిమంతులుగా తీర్చెను; ఎవరిని నీతిమంతులుగా తీర్చెనో వారిని మహిమ పరచెను.

ఈ వాక్యభాగంలో క్రీస్తు సారూప్యం గలవారిగా అవ్వడానికి దేవుడు ముందే కొందరిని నిర్ణయించాడనీ వారందరినీ ఆయన పిలచి నీతిమంతులుగా తీర్చి మహిమపరుస్తున్నాడని స్పష్టంగా రాయబడింది. దేవుడు చేసిన ఈ నిర్ణయం‌ మనిషి భూమిపైన పుట్టాక అతని‌ క్రియలను బట్టి చేసేది కాదు కానీ అది జగత్తుపునాది వెయ్యబడకముందే చెయ్యబడిన నిర్ణయమని ఇప్పటికే మనం ఎఫెసీ పత్రిక నుండి చూసాం (ఆ సత్యం మరలా చూడబోతున్నాం). అయితే కొందరు ఈ "దేవుని నిర్ణయం" అనే మాటను అపార్థం చేసుకుని అది రక్షణకు సంబంధించింది కాదని‌ బహుమానానికి సంబంధించిందని చెబుతుంటారు. కానీ మనం చూసినటువంటి వాక్యభాగాలలో ఆ పదప్రయోగం స్పష్టంగా రక్షణను ఉద్దేశించే వాడబడింది. దీనికి సంబంధించిన మరికొన్ని వాక్యభాగాలు ముందు ముందు చూడబోతున్నాం. ఆ మాటల సందర్భాన్ని పరిశీలించినప్పుడు రక్షణ గురించే ఆ పదం వాడబడింది.

మరికొందరు ఈ "దేవుని నిర్ణయం" అనేదానికి ఆయన తన భవిష్యత్తు జ్ఞానంతో ముందుకు తొంగిచూసి ఆయనను ఎవరు విశ్వసిస్తారో తెలుసుకుని తర్వాత వారిని నిర్ణయించుకున్నాడని వివరణ ఇస్తుంటారు. ఈ వాదన ప్రకారం; దేవుడు ముందుకు తొంగిచూసి ఏం జరుగుతుందో తెలుసుకున్నాడనీ అలా తెలుసుకోకపోతే ఆయన సృష్టిలో ఏం జరిగేదో ఆయనకే తెలియదనే అర్థం వస్తుంది. పైగా ఆయన తన భవిష్యత్తుజ్ఞానంతో ముందుకు తొంగిచూసి ఎవరు రక్షించబడతారో తెలుసుకున్నప్పుడు మళ్ళీ వారిని రక్షణకోసం నిర్ణయించుకోవడం ఎందుకు? ఇది తర్కలోపంతో కూడినటువంటి వాదన. లేఖనాలపై కనీస అవగాహన లేనివారు మాత్రమే ఇలా వాదిస్తుంటారు.

గమనించండి. లేఖనాలలో "దేవుని భవిష్యత్తు జ్ఞానం" అని రాయబడినప్పుడు ఆయన ముందుకు తొంగిచూసి ఏదో తెలుసుకుంటున్నాడని‌ మనం భావించకూడదు‌ "ఆయన సంకల్ప జ్ఞానమే ఆయన భవిష్యత్తు జ్ఞానం". దీనిగురించి మరింత వివరంగా తెలుసుకోవడానికి ఈ‌ వ్యాసం చదవండి.

దేవుణ్ణి పాపానికి కర్తగా చూపిస్తుంది ఎవరు?

ఒకవేళ పై వాక్యభాగాలలో మనం‌ చూసిన "దేవుని నిర్ణయం" మానవుల భవిష్యత్తును చూసి చెయ్యబడిందే ఐతే అది మానవుల క్రియలను బట్టి చెయ్యబడిన నిర్ణయమని ఒప్పుకోవలసి ఉంటుంది. కానీ అది దేవుని సంకల్పానుసారమైన (స్వకీయ, చిత్తానుసారమైన) నిర్ణయమని వాక్యం స్పష్టంగా చెబుతుంది.

ఎఫెసీయులకు 1:12 దేవుడు తన చిత్త ప్రకారమైన సంకల్పమును బట్టి మనలను ముందుగా నిర్ణయించి, ఆయన యందు స్వాస్థ్యముగా ఏర్పరచెను. ఆయన తన చిత్తాను సారముగా చేసిన నిర్ణయము చొప్పున సమస్త కార్యములను జరిగించుచున్నాడు.

ఎఫెసీయులకు 1:4-6 ఎట్లనగా తన ప్రియునియందు తాను ఉచితముగా మనకనుగ్రహించిన తన కృపా మహిమకు కీర్తి కలుగునట్లు, తన చిత్త ప్రకారమైన దయా సంకల్పము చొప్పున, యేసుక్రీస్తు ద్వారా తనకు కుమారులనుగా స్వీకరించుటకై,మనలను ముందుగా తన కోసము నిర్ణయించుకొని, మనము తన యెదుట పరిశుద్ధులమును నిర్దోషులమునై యుండవలెనని జగత్తు పునాది వేయబడకమునుపే, ప్రేమచేత ఆయన క్రీస్తులో మనలను ఏర్పరచుకొనెను.

తీతుకు 3:5 మనము నీతిని అనుసరించి చేసిన క్రియల మూలముగా కాక, తన కనికరము చొప్పుననే పునర్జన్మ సంబంధమైన స్నానము ద్వారాను, పరిశుద్ధాత్మ మనకు నూతన స్వభావము కలుగజేయుట ద్వారాను మనలను రక్షించెను.

ఈ వాక్యభాగం కూడా చూడండి.

2 తిమోతికి 1:9,10 మన క్రియలనుబట్టి కాక తన స్వకీయ సంకల్పమును బట్టియు, అనాదికాలముననే క్రీస్తుయేసునందు మనకు అనుగ్రహింపబడినదియు, క్రీస్తు యేసను మన రక్షకుని ప్రత్యక్షత వలన బయలుపరచబడినదియునైన తన కృపను బట్టియు, మనలను రక్షించి పరిశుద్ధమైన పిలుపుతో ఆయన మనలను పిలిచెను. ఆ క్రీస్తుయేసు, మరణమును నిరర్థకము చేసి జీవమును అక్షయతను సువార్తవలన వెలుగులోనికి తెచ్చెను.

ఇప్పటివరకూ మనం చూసిన వాక్యభాగాల ప్రకారం; ఈలోకంలో ఎవరు రక్షించబడి పరలోకం చేరాలో దేవుడు ముందుగానే (జగత్తు పునాది వెయ్యబడకముందే) నిర్ణయించాడు. ఆ నిర్ణయంలో ఉన్నవారు ఒక్కరు కూడా నశించిపోకుండా తప్పకుండా రక్షించబడతారు. ఎందుకంటే దేవుడు చేసిన నిర్ణయం, ఆలోచనను ఆయన తప్పకుండా నెరవేర్చుకుంటాడు. కొందరు బోధిస్తున్నట్టుగా "ఆయన లోకంలో అందరినీ రక్షించాలి అనుకుంటుంటే అందరూ రక్షించబడడం లేదు కాబట్టి నశించిన వారి విషయంలో ఆయన ఆలోచన నెరవేరకుండా నిరర్థకం కావట్లేదు". ఎందుకంటే అది అసాధ్యమని వాక్యం చెబుతుంది.

యెషయా 46:10 నా ఆలోచన నిలుచుననియు నా చిత్తమంతయు నెరవేర్చుకొనెదననియు చెప్పుకొనుచు ఆది నుండి నేనే కలుగబోవువాటిని తెలియజేయుచున్నాను.

యోబు 42:2 నీవు సమస్త క్రియలను చేయగలవనియు నీవు ఉద్దేశించినది ఏదియు నిష్ఫలము కానేరదనియు నేనిప్పుడు తెలిసికొంటిని.

దానియేలు 4:35 ఆయన పరలోక సేనయెడలను భూనివాసులయెడలను తన చిత్తము చొప్పున జరిగించువాడు.

ఒకవేళ దేవుడు అందర్నీ రక్షించాలనే ఆలోచనతో ఉండి, యేసుక్రీస్తు ఈ లోకంలోని అందరి కోసమూ ప్రాణం పెడితే ఇక్కడ దేవుడు కూడా మానవుడివలే తన ఆలోచనను నెరవేర్చుకోలేక విఫలమయ్యాడనీ అదేవిధంగా నశించినవారి విషయంలో యేసుక్రీస్తు బలియాగం కూడా ఎలాంటి ప్రభావాన్నీ చూపించలేకపోయిందని మనం భావించవలసి వస్తుంది. కానీ అది అసాధ్యం.

యోహాను 12:32,33 నేను భూమి మీదనుండి పైకెత్తబడినయెడల అందరిని నాయొద్దకు ఆకర్షించుకొందునని చెప్పెను. తాను ఏవిధముగా మరణము పొందవలసి యుండెనో సూచించుచు ఆయన ఈ మాట చెప్పెను.

ఈ వాక్యభాగం ప్రకారం; యేసుక్రీస్తు ఎవరికోసమైతే ప్రాణం పెట్టాడో వారందరూ ఆయనకు ఆకర్షించబడాలి లేకపోతే ఆయన పలికిన ఈ మాట తప్పిపోయినట్టు ఔతుంది. కాబట్టి యేసుక్రీస్తుకు ఎవరైతే ఆకర్షించబడి ఆయన దగ్గరకు వస్తున్నారో వారికోసమే ఆయన ప్రాణం పెట్టాడు. వారంతా జగత్తు పునాదికి ముందుగా దేవుని నిర్ణయంలో ఏర్పరచబడినవారే.

అయితే మీకు ఇప్పుడు, యేసుక్రీస్తు అందరి కోసమూ ప్రాణం పెట్టలేదా? పై వాక్యభాగంలో కూడా ఆయన అందరి కోసమూ ప్రాణం పెట్టాడని ఉందిగా? ఒకవేళ దేవుడు రక్షణ పొందేలా కొందరినే నిర్ణయించుకుంటే ఆయనలో పక్షపాతం ఉందా? ఆయన రక్షించబడేవారిని ముందే నిర్ణయించినప్పుడు సువార్త ప్రకటించాలనే భారం శిష్యులపై/సంఘంపై ఎందుకు పెట్టాడనే సందేహాలు ఎన్నెన్నో కలగవచ్చు. మీకు ఆ సందేహాలు కలగడానికి కారణమైన వాక్యభాగాలు కూడా జ్ఞాపకం రావొచ్చు. ఇవన్నీ న్యాయమైన సందేహాలే. ఈ వ్యాసం పూర్తయ్యేసరికి వాటన్నిటికీ సమాధానం ఇస్తాను.

దానికి ముందు నేను ప్రస్తావించిన ప్రశ్నలకు మీరు కూడా సమాధానం ఆలోచించండి. దేవుడు అందరినీ రక్షించాలనే ఉద్దేశంతో ఉన్నాడు. కానీ అందరూ రక్షించబడడం లేదు కాబట్టి వారి విషయంలో ఆయన ఉద్దేశం నెరవేరకుండా పోయిందా? మరి పైన మనం చూసిన లేఖనాలలో అది అసాధ్యమని ఎందుకు రాయబడింది? యేసుక్రీస్తు పలికిన మాటల ప్రకారం ఆయన పైకెత్తబడడం ద్వారా అందరినీ తన దగ్గరకు ఆకర్షించుకోవాలి. కానీ అందరూ ఎందుకు ఆకర్షించబడడం లేదు? ఆయన మాట తప్పిపోయిందా? అంటే ఆయన బలియాగం నశించినవారి విషయంలో విఫలమైందా?

ఈ ప్రశ్నలకు కొందరు దేవుడు అందరినీ రక్షించాలి అనుకుని యేసుక్రీస్తు అందరికోసం ప్రాణం పెట్టినప్పటికీ మనుషుల్లో కొందరు కఠినమైన మనస్సుతో ఆయనను నమ్మడం లేదని, అందుకే వారు నశించిపోతున్నారని సమాధానం ఇస్తుంటారు. ఈ సమాధానం ప్రకారం; దేవుని ఉద్దేశం/చిత్తం కంటే మానవ స్వేచ్ఛయే గొప్పదని ఒప్పుకోవలసి వస్తుంది, ఎందుకంటే అక్కడ మానవుని స్వేచ్ఛ దేవుని ఆలోచనను/చిత్తాన్ని నెరవేరనీయకుండా చేస్తుందిగా? కానీ లేఖనం ఏం చెబుతుందో చూడండి.

రోమీయులకు 9: 19 అట్లయితే ఆయన చిత్తమును ఎదిరించిన వాడెవడు?

పోని వాదనకోసం ఆ సమాధానమే సరి అనుకున్నప్పటికీ అప్పుడు కూడా నశించినవారి విషయంలో దేవుని ఆలోచన మరియు యేసుక్రీస్తు బలియాగం విఫలమే ఔతున్నాయి కదా? కాబట్టి ఆ సమాధానం సరైనది కాదు. నేడు యేసుక్రీస్తును విశ్వసించి రక్షించబడేవారు అందరినీ దేవుడు ముందుగానే నిర్ణయించుకున్నాడని సాక్ష్యమిస్తున్న మరికొన్ని లేఖన భాగాలను కూడా చూద్దాం.

మత్తయి 15:12,13 అంతట ఆయన శిష్యులు వచ్చి పరిసయ్యులు ఆ మాట విని అభ్యంతరపడిరని నీకు తెలియునా అని ఆయనను అడుగగా ఆయన పరలోకమందున్న నా తండ్రి నాటని ప్రతి మొక్కయు పెల్లగింపబడును.

ఈ వాక్యభాగం ప్రకారం; పరలోకపు తండ్రి నాటిన (నిర్ణయించిన) వారే యేసుక్రీస్తును విశ్వసించి చివరివరకూ నిలబడతారు. యేసుక్రీస్తును వ్యతిరేకరిస్తున్న పరిసయ్యులు ఆయన నాటిన మొక్కలు కాదు కాబట్టి అభ్యంతరపడ్డారు (పెల్లగించబడ్డారు). గమనించండి. అక్కడ వారు పెల్లగించబడ్డారు కాబట్టి అవిశ్వాసులు కాలేదు, తండ్రి వారిని నాటలేదు కాబట్టే అవిశ్వాసులుగా మారి పెల్లగించబడ్డారు.

యోహాను 6:45,65 నన్ను పంపిన తండ్రి వానిని ఆకర్షించితేనే గాని యెవడును నా యొద్దకు రాలేడు; అంత్యదినమున నేను వానిని లేపుదును. మరియు ఆయన తండ్రిచేత వానికి కృప అనుగ్రహింపబడకుంటే ఎవడును నాయొద్దకు రాలేడని యీ హేతువును బట్టి మీతో చెప్పితిననెను.

ఈ వాక్యభాగంలో యేసుక్రీస్తును విశ్వసించేవారంతా వారిని తండ్రి ఆకర్షించబట్టే అనగా ఆయన వారికి ఆ కృపను అనుగ్రహించబట్టే ఆయన దగ్గరకు వస్తున్నారని రాయబడింది‌. దీనిప్రకారం; యేసుక్రీస్తు యొద్దకు ఎవ్వరూ తమంతట తాముగా రాలేరు. ఎందుకంటే ప్రతీమనిషీ పాపం కారణంగా ఆత్మీయంగా చనిపోయి ఉన్నాడు (ఎఫెసీ 2:1,4). దేవుడు ఆ వ్యక్తిని బ్రతికింపచేస్తేనే కానీ యేసుక్రీస్తు యొద్దకు రాలేడు. ఉదాహరణకు; లాజరు తనంతట తానుగా బ్రతికి సమాధినుండి రాలేడు కదా? యేసుక్రీస్తు అతన్ని బ్రతికించినప్పుడే అతనికి అది సాధ్యమైంది (దీనిగురించి ముందు ముందు వివరిస్తాను). అలా తండ్రి చేత ఆకర్షించబడి అనగా ఆయన కృపను బట్టి యేసుక్రీస్తు దగ్గరకు వచ్చినవారిలో (విశ్వాసించిన వారిలో) ఒక్కరు కూడా తప్పిపోకుండా అంత్యదినాన లేపబడతారు. అంటే వారు తమ రక్షణను కోల్పోవడం అసాధ్యం. అయితే ఇక్కడ ఒకటి గమనించాలి. నేటి సంఘాలలో క్రీస్తును నమ్ముకున్నామని చెబుతూ సంఘ సభ్యులుగా కొనసాగుతున్నవారంతా తండ్రి చేత ఆకర్షించబడే అనగా ఆయన కృపను పొందుకునే ఆయన దగ్గరకు వచ్చారని (రక్షించబడినవారే) మనం భావించకూడదు. ఆయన దగ్గరకు రొట్టెలకోసం (అవసరాల) కూడా కొంతమంది వస్తుంటారు (యోహాను 6:26). వీరు కొంతకాలం విశ్వాసులతో పాటు విశ్వాసుల్లానే కొనసాగినప్పటికీ తర్వాత లోకంలో కలసిపోతారు. ఇరుకు మార్గంలో ప్రవేశించడం వారివల్ల కాదు (లూకా 13: 24). ఇలాంటివారి గురించి రాయబడిన కొన్ని సందర్భాలను చూడండి.

1 తిమోతికి 6: 21 ఆ విషయములో ప్రవీణులమని కొందరనుకొని విశ్వాస విషయము తప్పిపోయిరి. కృప మీకు తోడైయుండునుగాక.

2 తిమోతికి 4:10 దేమా యిహలోకమును స్నేహించి నన్ను విడిచి థెస్సలొనీకకు వెళ్లెను.

హెబ్రీయులకు 10:26,27 మనము సత్యమునుగూర్చి అనుభవజ్ఞానము పొందిన (సువార్త వినడం) తరువాత బుద్ధిపూర్వకముగా పాపము చేసిన యెడల పాపములకు బలి యికను ఉండదు గాని న్యాయపు తీర్పునకు భయముతో ఎదురుచూచుటయు, విరోధులను దహింపబోవు తీక్షణమైన అగ్నియు నికను ఉండును.

పైనం మనం చూసిన లేఖన భాగాలలోనూ మరికొన్ని సందర్భాలలోనూ తప్పిపోయినవారిగా మనకు కనిపించేవారంతా దేవుని నిర్ణయంలో లేనివారే. అందుకే తండ్రి వారిని ఆకర్షించలేదు అనగా ఆ కృపను వారికి అనుగ్రహించలేదు. దీనికి మంచి ఉదాహరణగా ఇస్కరియోతు యూదా జీవితాన్ని మనం చూడవచ్చు. అతని గురించి రాయబడిన ఈ మాటలు చూడండి.

అపొ. కార్యములు 1:25 తన చోటికి పోవుటకు యూదా తప్పిపోయి పోగొట్టుకొనిన యీ పరిచర్యలోను అపొస్తలత్వములోను పాలుపొందుటకు వీరిద్దరిలో నీవు ఏర్పరచుకొనినవానిని కనబరచుమనిరి.

ఈ వాక్యభాగం ప్రకారం; ఆ యూదా మిగిలిన శిష్యులతో కలసి యేసుక్రీస్తు పరిశుద్ధాత్మ ద్వారా చేసినటువంటి పరిచర్యలో కొంతకాలం కొనసాగాడు. కానీ అతను తప్పిపోయాడు. అతను చేసిన పాపానికి చచ్చేంతగా సంతాపపడినప్పటికీ యూదుల దగ్గరకు వెళ్ళి తన తప్పును ఒప్పుకున్నప్పటికీ దేవునివైపుకు మాత్రం తిరగలేకపోయాడు. పేతురు కూడా తప్పుచేసాడు యేసుక్రీస్తును తాను ఎరుగనని చెప్పడం చిన్నతప్పేమీ కాదు (లూకా 12:9) కానీ అతను తప్పిపోలేదు పశ్చాత్తాపపడ్డాడు. దేవుడు దానిని అంగీకరించాడు.

దేమా కూడా పౌలుతో కలిసి కొంతకాలం పరిచర్య చేసాడు. తర్వాత లోకాన్ని స్నేహించి తప్పిపోయాడు. ఒకవేళ వీరు కనుక నిజంగా తండ్రి నిర్ణయం చొప్పున ఆకర్షించబడి అనగా ఆయన కృపను పొందుకుని యేసుక్రీస్తును విశ్వసించినవారైతే అలా తప్పిపోయేవారు కాదు. మారుమనస్సు పొందేవారు, అంత్యదినాన తప్పకుండా లేపబడేవారు.

యోహాను 6:45 అంత్యదినమున నేను వానిని లేపుదును.

ఈ వాక్యభాగం ప్రకారం; తండ్రి నిర్ణయం చొప్పున రక్షించబడిన వారంతా (ఆకర్షించబడిన వారంతా), అంత్యదినాన లేపబడేటట్టుగా తమ రక్షణను కొనసాగిస్తారు. ఎందుకంటే వారు అలా కొనసాగించేలా దేవుడే వారికి సహాయం చేస్తాడు.

ఫిలిప్పీయులకు 2:12,13 కాగా నా ప్రియులారా, మీరెల్లప్పుడును విధేయులైయున్న ప్రకారము, నాయెదుట ఉన్నప్పుడు మాత్రమే గాక మరి యెక్కువగా నేను మీతో లేని యీ కాలమందును, భయముతోను, వణకుతోను మీ సొంత రక్షణను కొనసాగించుకొనుడి. ఎందుకనగా మీరు ఇచ్ఛయించుటకును కార్యసిద్ధి కలుగజేసికొనుటకును, తన దయా సంకల్పము నెరవేరుటకై మీలో కార్యసిద్ధి కలుగజేయువాడు దేవుడే.

ఈ‌ వాక్యభాగాన్ని మనం జాగ్రత్తగా పరిశీలిస్తే పౌలు ప్రారంభంలో మీ రక్షణను‌ కొనసాగించమని అది‌ వారు చేసే పనిగా చెబుతూ అది వారు కొనసాగించేలా దేవుడే కార్యసిధ్ధి కలుగచేస్తాడని కూడా చెబుతున్నాడు. అప్పటికే వారు విధేయులు. దీనిగురించి రాయబడిన మరికొన్ని మాటలు కూడా చూడండి.

ఫిలిప్పీయులకు 1:4 మీలో ఈ సత్‌క్రియ నారంభించినవాడు యేసుక్రీస్తు దినము వరకు దానిని కొనసాగించునని రూఢిగా నమ్ముచున్నాను.

1 పేతురు 5:10 తన నిత్యమహిమకు క్రీస్తునందు మిమ్మును పిలిచిన సర్వకృపాధియగు దేవుడు, కొంచెము కాలము మీరు శ్రమపడిన పిమ్మట, తానే మిమ్మును పూర్ణులనుగా చేసి స్థిరపరచి బలపరచును.

1 కొరింథీయులకు 1:8,9 మన ప్రభువైన యేసుక్రీస్తు దినమందు మీరు నిరపరాధులైయుండునట్లు అంతమువరకు ఆయన మిమ్మును స్థిరపరచును. మన ప్రభువైన యేసుక్రీస్తు అను తన కుమారుని సహవాసమునకు మిమ్మును పిలిచిన దేవుడు నమ్మతగినవాడు.

ఈ వాక్యభాగాల ప్రకారం దేవుని నిర్ణయం చొప్పున రక్షించబడినవారు, తమ రక్షణను కొనసాగించేలా దేవుడే వారికి సహాయం చేస్తాడు. ఆయనే వారిని సంపూర్ణులుగా తీర్చిదిద్దుతాడు. వారు ఆ రక్షణనుండి తప్పిపోయే అవకాశం‌ ఎంతమాత్రమూ ఉండదు. ఎందుకంటే యేసుక్రీస్తు బలియాగం వారిని సదాకాలానికి సంపూర్ణులుగా చేసింది.

హెబ్రీయులకు 10: 14 ఒక్క అర్పణచేత ఈయన పరిశుద్ధపరచబడు వారిని సదాకాలమునకు సంపూర్ణులనుగా చేసియున్నాడు.

ఆ సంపూర్ణత నుండి వారు శాశ్వతంగా తప్పిపోయి నరకానికి పోలేరు.

1 థెస్సలొనికయులకు 5: 9 ఎందుకనగా మన ప్రభువైన యేసు క్రీస్తుద్వారా రక్షణ పొందుటకే దేవుడు మనలను నియమించెను గాని ఉగ్రతపాలగుటకు నియమింపలేదు.

దేవుని నిర్ణయం చొప్పున రక్షించబడినవారి రక్షణ నిశ్చయత గురించి యేసుక్రీస్తు పలికిన ఈ మాటలు కూడా చూడండి.

మత్తయి 24:24 అబద్ధపు క్రీస్తులును అబద్ధపు ప్రవక్తలును వచ్చి, సాధ్యమైతే ఏర్పరచబడిన వారిని సహితము మోసపరచుటకై గొప్ప సూచక క్రియలను మహత్కార్యములను కనబరచెదరు.

ఈ వాక్యభాగంలో యేసుక్రీస్తు అబద్ధ క్రీస్తులూ అబద్ధ ప్రవక్తలూ చేసేటటువంటి సూచకక్రియలూ మహత్కార్యాలూ "సాధ్యమైతే" ఏర్పరచబడినవారిని కూడా మోసం చేసేంత గొప్పవిగా ఉంటాయని చెబుతున్నాడు. అది ఏర్పరచబడినవారి విషయంలో అసాధ్యం కనుకనే ఆయన "సాధ్యమైతే" అనే పదప్రయోగం ఉపయోగించాడు. అలాగే పౌలు కూడా "సాధ్యమైనయెడల, దేహసంబంధులైన నా సహోదరుల కొరకు నేను క్రీస్తునుండి వేరై శాపగ్రస్తుడనై యుండగోరుదును" (రోమీయులకు 9:3) అని అంటున్నాడు. కానీ అది అసాధ్యం.

సాధారణంగా చాలామంది బోధకులు, దేవునికీ విశ్వాసికీ ఉన్నటువంటి సంబంధాన్ని తండ్రి కొడుకుల సంబంధంతో పోలుస్తారు. ఇది తప్పేమీకాదు దేవుని వాక్యంలో కూడా ఇలాంటి పోలికలు రాయబడ్డాయి. అయితే ఈ బోధకులు అక్కడ‌‌ పిల్లాడు తన తండ్రి చెయ్యి పట్టుకుని నడుస్తూ కొన్నిసార్లు దానిని విడిచిపెట్టేటట్టుగా విశ్వాసి కూడా దేవుని చేతిని విడిచిపెట్టడం (రక్షణనుండి తప్పిపోవడం) సాధ్యమని బోధిస్తుంటారు. కానీ ఇది సాధ్యం కాదని ఇప్పటికే మనం స్పష్టంగా చూసాము. గమనించండి. ఈ బోధకులు చెబుతున్నట్టుగా రక్షణలో ఉన్నవ్యక్తి తాను అనుకున్నప్పుడు దేవుని చేతిని విడిచిపెట్టడానికి, దేవుని చేతిని అతను పట్టుకోలేదు, దేవుడే అతని చెయ్యి పట్టుకుని నడిపిస్తున్నాడు, నిత్యజీవం చేరేదాకా ఆయన ఆ వ్యక్తి చెయ్యిని విడిచిపెట్టడు.

యోహాను 10:28,29 నేను వాటికి నిత్యజీవమునిచ్చుచున్నాను గనుక అవి ఎన్నటికిని నశింపవు, ఎవడును వాటిని నా చేతిలో నుండి అపహరింపడు. వాటిని నాకిచ్చిన నా తండ్రి అందరికంటె గొప్పవాడు గనుక నా తండ్రి చేతిలో నుండి యెవడును వాటిని అపహరింపలేడు.

ఈ వాక్యభాగంలో యేసుక్రీస్తు చెబుతున్నదాని ప్రకారం;

1. విశ్వాసులు ఆయన చేతిని పట్టుకుని నడవడం లేదు, ఆయనే తన చేతిలో వారిని ఉంచుకుని కాపాడుతున్నాడు. ఆయన గొప్పవాడు కనుక నిత్యజీవం వరకూ వారిని భద్రపరుస్తాడు.

2. ఒక విశ్వాసి తనకు తానుగా ఆ తండ్రి చేతినుండి విడిపించుకోగలిగినా లేక మరొకరు అతన్ని ఆ తండ్రి చేతినుండి అపహరించగలిగినా వారు తండ్రి కంటే గొప్పవారైయుండాలి. అది అసాధ్యం.

పరిశుద్ధాత్ముడు మనకు సంచకరువుగా అనుగ్రహించబడ్డాడనీ మనం ఆయనయందు విమోచన దినం వరకూ ముద్రించబడి యున్నామని వాక్యం చెబుతుంది (2 కొరింథీ 1:22, ఎఫెసీ 1:14). కాబట్టి విశ్వాసి తన రక్షణను కోల్పోవడం సాధ్యం కాదు.

"అంటే మనం పాపం చేసినప్పటికీ మన రక్షణను కోల్పోమా?" ఇప్పుడు ఈ ప్రశ్న మీ అందరి మనస్సుల్లోనూ మెదులుతుందని‌ నాకు తెలుసు. దానికి వాక్యం ఏం చెబుతుందో చూడండి.

ఎఫెసీయులకు 4: 30 దేవుని పరిశుద్ధాత్మను దుఃఖపరచకుడి; విమోచన దినమువరకు ఆయనయందు మీరు ముద్రింపబడియున్నారు.

ఈ వాక్యభాగం ప్రకారం; ఒక విశ్వాసి పాపం చేసినప్పుడు అతనిలో ఉన్నటువంటి పరిశుద్ధాత్ముడు దుఃఖపడుతున్నాడే తప్ప ఆ వ్యక్తిని విడిచిపోవడం లేదు. ఎందుకంటే విమోచన దినం వరకూ ఆయన మనలోనే ఉంటాడు. పాతనిబంధనలో సౌలును విడిచిపెట్టి వెళ్ళినట్టుగా నేటి విశ్వాసులను విడిచిపెట్టి వెళ్ళడు‌ (యోహాను 14: 17, 1కోరింథీ 3: 16). ఎందుకంటే ఆయన పాతనిబంధనలో ఒక వ్యక్తిపైకి దిగిరావడం వేరు క్రొత్తనిబంధనలో దిగిరావడం వేరు. అది కొన్ని ప్రత్యేకమైన కార్యాలకు సంబంధించింది, ఉదాహరణకు; ఆయన సంసోను, యోప్తా, సౌలు ఇలాంటివారిపైకి దిగివచ్చి వారితో యుద్దాలు చేయించేవాడు. కానీ క్రొత్తనిబంధనలో ఆయన దిగిరావడం రక్షణకు సంబంధించింది. ఈ తారతమ్యాన్ని మనం బాగా గుర్తుంచుకోవాలి. అందుకే నూతననిబంధనలో ఆయన దిగిరావడం గురించి "తనయందు విశ్వాసముంచువారు పొందబోవు ఆత్మను గూర్చి ఆయన ఈ మాట చెప్పెను. యేసు ఇంకను మహిమ పరచబడలేదు గనుక ఆత్మ ఇంకను అనుగ్రహింపబడియుండలేదు" (యోహాను 7:39) అని రాయబడింది.

మరో వాక్యభాగం కూడా చూడండి.

యూదా 1:24,25 తొట్రిల్లకుండ మిమ్మును కాపాడుటకును, తన మహిమ యెదుట ఆనందముతో మిమ్మును నిర్దోషులనుగా నిలువబెట్టుటకును, శక్తిగల మన రక్షకుడైన అద్వితీయ దేవునికి, మన ప్రభువైన యేసు క్రీస్తుద్వారా, మహిమయు మహాత్మ్యమును ఆధిపత్యమును అధికారమును యుగములకు పూర్వమును ఇప్పుడును సర్వయుగములును కలుగును గాక.

ఈ వాక్యభాగం ప్రకారం; మనం తొట్రిల్లకుండా దేవుడే మనల్ని కాపాడుతూ ఆయనముందు నిర్దోషులుగా నిలువబెట్టుకుంటాడు. అలా అని దేవుని నిర్ణయం చొప్పున రక్షించబడినవారు ఎలాంటి పాపమూ చెయ్యరని నేను చెప్పడం లేదు. పై వాక్యభాగంలో మనం పాపం చేసినప్పుడు మనలోని పరిశుద్ధాత్ముడు దుఃఖపడతాడని రాయబడింది‌ కదా!.

అదేవిధంగా "మనము పాపము లేనివారమని చెప్పుకొనిన యెడల, మనలను మనమే మోసపుచ్చుకొందుము; మరియు మనలో సత్యముండదు. మన పాపములను మనము ఒప్పుకొనిన యెడల, ఆయన నమ్మదగినవాడును నీతిమంతుడును గనుక ఆయన మన పాపములను క్షమించి సమస్త దుర్నీతినుండి మనలను పవిత్రులనుగా చేయును. మనము పాపము చేయలేదని చెప్పుకొనినయెడల, ఆయనను అబద్ధికునిగా చేయువారమగుదుము; మరియు ఆయన వాక్యము మనలో ఉండదు" (1 యోహాను 1:8-10) అనీ రాయబడింది. దీనిప్రకారం; విశ్వాసుల్లో కూడా పాపం‌ ఉంటుంది కానీ వారు దానిని ఒప్పుకుని విడిచిపెడతారు. ఒకప్పటిలా తాము చేసేది పాపమని తెలిసినా అలవాటుగా దానిని చెయ్యలేరు. అందుకే అదే యోహాను "దేవుని మూలముగా పుట్టిన ప్రతివానిలో ఆయన బీజము నిలుచును గనుక వాడు పాపము చేయడు; వాడు దేవుని మూలముగా పుట్టినవాడు గనుక పాపము చేయజాలడు" (1యోహాను 3:9) అని అంటున్నాడు (ఇది మరణకరమైన పాపం విషయంలో చెప్పబడుతున్నప్పటికీ వాక్యపుసారాంశం ప్రకారం; అలవాటుగా పాపంలో కొనసాగడం విషయంలో కూడా ఈ నియమం వర్తిస్తుంది, అది ముందు ముందు మీకే అర్థమౌతుంది). దేవుని మూలంగా పుట్టినవాడిలో అనగా తిరిగి జన్మించబడిన వ్యక్తిలో (యోహాను 3:3-8, 1 పేతురు 1:4) ఆయన బీజం ఉంటుంది కాబట్టి వాడు పాపం చెయ్యజాలడు. కానీ ఈ మాటలకు విశ్వాసి అసలు పాపమే చెయ్యడని అర్థం కాదు. ఎందుకంటే యోహాను మనం‌ పైన చూసిన వాక్యభాగంలో మనలో పాపం‌ ఉందని చెబుతున్నాడు. అంతేకాకుండా "నా చిన్నపిల్లలారా, మీరు పాపము చేయకుండుటకై యీ సంగతులను మీకు వ్రాయుచున్నాను. ఎవడైనను పాపము చేసినయెడల నీతిమంతుడైన యేసుక్రీస్తు అను ఉత్తరవాది తండ్రియొద్ద మనకున్నాడు" (1 యోహాను 2:1,2) అని కూడా చెబుతున్నాడు. కాబట్టి దేవునిమూలంగా పుట్టినవాడు పాపం చెయ్యజాలడు అంటే ఆ పాపంలో‌ కొనసాగుతూ ఉండడని అర్థం. బైబిల్ లో చాలామంది భక్తులు పాపం చేసారు (దావీదు, సొలొమోను, సంసోను, పేతురు). కానీ వారు ఆ పాపంలో కొనసాగలేదు. దేవునివైపు తిరిగి పశ్చాత్తపపడ్డారు, మారుమనస్సు పొందారు.

ఉదాహరణకు; కొరింథీ సంఘానికి పౌలు మొదటిసారి పత్రికను రాసినప్పుడు వారిలో ఉన్న‌ పాపాల గురించి హెచ్చరించడం మనకు కనిపిస్తుంది. అదే కొరింథీయులకు ఆయన రెండవసారి పత్రికను రాసేటప్పుడు వారు తాము చేసిన పాపాల నిమిత్తం పశ్చాత్తాపపడినట్టుగా ఆయన పేర్కొన్నాడు (2 కొరింథీ 7:8-10). ఈవిధంగా వారు ఎందుకు పశ్చాత్తాపపడి మారుమనస్సు పొందారంటే వారిని రక్షించుకున్న దేవుడు ‌నమ్మదగినవాడు. వారు ఆవిధంగా పశ్చాత్తాపపడి నిరపరాధులుగా ఉండేలా ఆయనే సహాయం చేస్తాడు.

1 కొరింథీయులకు 1:8,9 మన ప్రభువైన యేసుక్రీస్తు దినమందు మీరు నిరపరాధులైయుండునట్లు అంతమువరకు ఆయన మిమ్మును స్థిరపరచును. మన ప్రభువైన యేసుక్రీస్తు అను తన కుమారుని సహవాసమునకు మిమ్మును పిలిచిన దేవుడు నమ్మతగినవాడు.

2 తిమోతికి 2:13 మనము నమ్మదగని వారమైనను, ఆయన నమ్మదగినవాడుగా ఉండును; ఆయన తన స్వభావమునకు విరోధముగా ఏదియు చేయలేడు.

మరోసారి ఈ మాటలను జ్ఞాపకం చెయ్యదలిచాను. విశ్వాసి కూడా కొన్నిసార్లు పాపం చేస్తాడు, కానీ ఆ పాపంలో కొనసాగడు. ఆ పాపం విషయంలో పశ్చాత్తాపపడి దేవునియొద్దకు వస్తాడు, గుండెలు పగిలేలా దేవునిముందు రోదిస్తాడు (భక్తుల జీవితాల్లో మనం ఇదే చూస్తాం). దేవుడు ఆ పాపాలను క్షమిస్తాడు. కాబట్టి విశ్వాసి పాపం చేసినప్పటికీ తన రక్షణను ఎప్పటికీ కోల్పోడు. అందుకే "నేను వారి దోషములను క్షమించి వారి పాప ములను ఇక నెన్నడును జ్ఞాపకము చేసికొనను" (యిర్మీయా 31:34). "నేను వారి దోషముల విషయమై దయగలిగి వారి పాపములను ఇకను ఎన్నడును జ్ఞాపకము చేసికొననని ప్రభువు సెలవిచ్చుచున్నాడు" (హెబ్రీ 8:12) అని రాయబడింది. కానీ ఈ విషయం గమనించండి. ఎవరైతే నేను పాపం చేసినప్పటికీ నా రక్షణను కోల్పోను కాబట్టి, పాపమే చేస్తానని తెగింపుగా అలా ప్రవర్తిస్తారో (కృపను పాపానికి అనుమతిగా భావిస్తారో), లేక ఒప్పుకున్న పాపాన్నే మరలా మరలా అలవాటుగా చేస్తారో నిజానికి వారసలు రక్షించబడనే లేదు. ఇలాంటివారిని చాలామందినే మనం చూస్తుంటాం. యేసుక్రీస్తు గురించి "తన ప్రజలను వారి పాపములనుండి ఆయనే రక్షించును గనుక ఆయనకు యేసు అను పేరు పెట్టుదువనెను" (మత్తయి 1:21) అని రాయబడింది. ఈ మాటలు బాగా గమనించండి; ఆయన "తన ప్రజలను" నరకం నుండి మాత్రమే కాదు మొదట వారి పాపాల నుండి రక్షిస్తాడు.‌ వాటిలో అలానే కొనసాగనివ్వడు. అందుకే "దేవుడు తన సేవకుని పుట్టించి, (లేక, లేపి) మీలో ప్రతివానిని వాని దుష్టత్వమునుండి మళ్లించుటవలన మిమ్ము నాశీర్వదించుటకు ఆయనను మొదట మీయొద్దకు పంపెను" (అపో.కార్యములు 3:26) అని సువార్త ప్రకటించబడింది. కాబట్టి యేసుక్రీస్తు బలియాగాన్ని బట్టి రక్షించబడిన అందరిలోనూ పరిశుద్ధత అనే ఫలం లేక ఆపై నీతికి దాసులుగా జీవించడం స్పష్టంగా కనిపిస్తుంది.

రోమీయులకు 6:18, 22 పాపమునుండి విమోచింపబడి నీతికి దాసులైతిరి; ఇందుకు దేవునికి స్తోత్రము. అయినను ఇప్పుడు పాపము నుండి విమోచింపబడి దేవునికి దాసులైనందున పరిశుద్ధత కలుగుటయే మీకు ఫలము; దాని అంతము నిత్యజీవము.

ఎందుకంటే వారు ఆయన బలియాగాన్ని బట్టి కేవలం నరకం నుండి మాత్రమే కాదు తమ పాపాల నుండి లేక దుష్టత్వం నుండి కూడా రక్షించబడ్డారు. ఆ పరిశుద్ధత అనే ఫలం లేకుండా ఇంకా తమ గతకాలపు పాపాల్లోనే లేక దుష్టత్వంలోనే కొనసాగుతున్నవారెవరూ ఆయన బలియాగాన్ని బట్టి రక్షించబడినవారు కారు. రక్షించబడినవారిలో పాపభీతి ఉంటుంది. వారు పాపాన్ని తీవ్రంగా ద్వేషిస్తారే తప్ప కనీసం ప్రేమించలేరు. ఈ వాక్యభాగం చూడండి.

1 యోహాను 3:8-10 అపవాది మొదట నుండి పాపము చేయుచున్నాడు గనుక పాపము చేయువాడు అపవాది సంబంధి; అపవాది యొక్క క్రియలను లయపరచుటకే దేవుని కుమారుడు ప్రత్యక్షమాయెను. దేవుని మూలముగా పుట్టిన ప్రతివానిలో (రక్షించబడిన వానిలో) ఆయన బీజము నిలుచును గనుక వాడు పాపముచేయడు (గతంలో వలే పాపంలో అలవాటుగా కొనసాగడు). వాడు దేవుని మూలముగా పుట్టినవాడు గనుక పాపము చేయజాలడు. దీనినిబట్టి దేవుని పిల్లలెవరో (రక్షించబడినవారెవరో) అపవాది పిల్లలెవరో (రక్షించబడనివారెవరో) తేటపడును.

నిజంగా రక్షించబడిన వ్యక్తిలో పరిశుద్ధాత్ముడు నివాసం ఉంటూ దిన దినమూ‌ వారిని పరిశుద్ధపరుస్తుంటాడు కాబట్టి వారిలో పరిశుద్ధత అనే ఫలం కనిపిస్తుంది తప్ప వారు మరలా పాపంలో కూరుకుపోలేరు. దీని గురించి మరింత వివరంగా తెలుసుకోవడానికి ఈ వ్యాసం చదవండి.

పరిశుద్ధపరచబడుటను గురించిన సిద్ధాంతం

ఇక్కడ మరో విషయాన్ని ప్రస్తావించదలిచాను. ఒక విశ్వాసి పాపం చేసినా (అలవాటుగా కాదు) అతను తన రక్షణను కోల్పోడు అనేది వాస్తవం అయినప్పటికీ కొన్నిసార్లు అతను చేసిన పాపాలను బట్టి క్రమశిక్షణ చెయ్యబడడాన్ని మాత్రం తప్పించుకోలేడు. ఉదాహరణకు; దావీదు పాపం చేసాడు, ఆ పాపాన్ని బట్టి దేవుడేమీ అతణ్ణి నాశనం చెయ్యలేదు, తన సన్నిధినుండి‌ వెలివెయ్యనూ లేదు. అయితే అతను ఆ పాపాన్ని బట్టి మరణంకంటే ఎక్కువబాధను అనుభవించేలా క్రమశిక్షణ చేసాడు. దావీదు జీవిత‌ చరిత్రలో మనమదే చూస్తాం. విశ్వాసుల జీవితంలో కూడా అదే జరుగుతుంది. వారు చేసే పాపాలను బట్టి (అలవాటుగా కాదు) రక్షణను కోల్పోయి నరకానికైతే పోరు. ఎందుకంటే "క్రీస్తు యేసునందున్న వారికి ఏ శిక్షావిధియూ లేదు" (1 కొరింథీ 12:1). అయినప్పటికీ కొన్నిసార్లు తమ పాపాలకు క్రమశిక్షణ చెయ్యబడడాన్ని మాత్రం తప్పించుకోలేరు. ఆ క్రమశిక్షణ కొన్నిసార్లు మరణంకంటే ఎక్కువబాధను కలిగిస్తుంది. అందుకే‌ విశ్వాసులు పాపం విషయంలో జాగ్రత్తగా ఉండాలి. దీనిని సొలోమోను విషయంలో చెప్పబడిన "అతడు పాపముచేసిన యెడల నరుల దండముతోను మనుష్యులకు తగులు దెబ్బలతోను అతని శిక్షింతును గాని నిన్ను స్థాపించుటకై నేను కొట్టి వేసిన సౌలునకు నా కృప దూరమైనట్లు అతనికి నా కృప దూరము చేయను" (2 సమూయేలు 7:14,15) ఈ మాటలతో పోల్చి అర్థం చేసుకోండి. ఎందుకంటే మన రక్షణ విషయంలో చెయ్యబడింది కూడా ఇలాంటి కృపగల నిబంధనే (యోహాను 1:17, ఎఫెసీ 2:8). అందుకే మనం పాపం చేసినప్పటికీ క్రమశిక్షణ చెయ్యబడతాము కానీ రక్షణను కోల్పోయి నరకానికి పోమని కచ్చితంగా చెబుతున్నాను.

ఇప్పుడు ఈ అంశంపై ఉత్పన్నమయ్యే కొన్ని ప్రశ్నలకు సమాధానాలు చూద్దాం.

1. యోహాను 3:16 లో దేవుడు లోకాన్ని ఎంతో ప్రేమించి తన కుమారుడిని పంపాడని రాయబడింది కదా! మరి యేసుక్రీస్తు లోకమంతటి కొరకూ ప్రాణం పెట్టలేదా?

A. యేసుక్రీస్తు మనం ఆలోచిస్తున్న లోకమంతటి కొరకూ ప్రాణం పెడితే వచ్చే సమస్య ఏంటో ఇప్పటికే వివరించాను. కాబట్టి "దేవుడు లోకాన్ని ఎంతగానో ప్రేమించె‌ను" అన్నప్పుడు మనం ఆలోచిస్తున్నట్టుగా అది ఈ లోకమంతటికోసమూ చెప్పబడుతుందని కాకుండా ఒక పరిథిలో చెప్పబడిన మాటగా అర్థం చేసుకోవాలి. "దేవుడు ప్రేమించిన లోకం" వేరే ఉంది. ఆయన నిర్ణయంలో ఉన్నవారే ఆ లోకం "యేసుక్రీస్తు ఆ లోకం కోసమే తన ప్రాణం పెట్టాడు" (దీనిగురించిన మరింత స్పష్టంగా తదుపరి ప్రశ్నలో వివరిస్తాను). ఒకవేళ మనం ఆలోచిస్తున్నట్టుగా ఆ సందర్భంలో లోకం అనగానే మొత్తం ప్రపంచం గురించి మాట్లాడుతుండి, యేసుక్రీస్తు ఆ లోకమంతటికోసమూ ప్రాణం పెడితే యేసుక్రీస్తు తండ్రికి ప్రార్థన చేస్తూ ఏమంటున్నాడో ఒకసారి చూడండి.

యోహాను 17:9 నేను వారికొరకు ప్రార్థన చేయుచున్నాను; "లోకము కొరకు ప్రార్థన చేయుటలేదు", నీవు నాకు అనుగ్రహించియున్నవారు నీవారైనందున వారికొరకే ప్రార్థన చేయుచున్నాను.

ఈ సందర్భంలో యేసుక్రీస్తు "నేను లోకం కొరకు ప్రార్థన చెయ్యడం లేదు" అంటున్నాడు. అంటే ఆయన తండ్రి ప్రేమించిన లోకం కోసం ప్రార్థన చెయ్యకుండా తండ్రి ప్రేమకు విరుద్ధంగా ప్రవర్తిస్తున్నాడా? లేదు. ఆయన ఎవరికోసమైతే ప్రార్థన చేస్తున్నాడో వారే దేవుడు ప్రేమించిన లోకం (ఆయన నిర్ణయంలో ఉన్నవారు). అయితే దీనికి కొందరు, అప్పటికి లోకంలో ఇంకా చాలామంది మారుమనస్సు పొందలేదు, అందుకే యేసుక్రీస్తు వారికోసం కాకుండా మారుమనస్సు పొందినవారికోసమే ప్రార్థన చేస్తున్నాడని వాదించవచ్చు. కానీ యేసుక్రీస్తు అక్కడ ప్రార్థన చేస్తుంది కేవలం అప్పటికి ఆయనను విశ్వసించినవారికోసమే కాదు. భవిష్యత్తులో ఆయనను విశ్వసించబోయే అందరికోసమూ అక్కడ ప్రార్థన చేసాడు. అందులో నేటి విశ్వాసులమైన మనం‌ కూడా ఉన్నాము.

యోహాను 17:21 వారును మనయందు ఏకమైయుండవలెనని వారికొరకు మాత్రము నేను ప్రార్థించుటలేదు; "వారి వాక్యమువలన నాయందు విశ్వాసముంచువారందరును ఏకమైయుండవలెనని వారికొరకును ప్రార్థించుచున్నాను".

ఈ మాటల ప్రకారం; యేసుక్రీస్తు అప్పటికి తనను విశ్వసించినవారికోసం మాత్రమే కాదు, అపోస్తలుల బోధను బట్టి భవిష్యత్తులో విశ్వసించబోయే అందరికోసమూ ప్రార్థన చేసాడు. వారే తండ్రి ప్రేమించిన లోకం, ఆ లోకం‌ కోసమే ఆయన ప్రాణం పెట్టాడు. ఆయన ప్రార్థించకుండా విడిచిపెట్టిన లోకం వేరే ఉంది, వారే తండ్రి నిర్ణయంలో లేనివారు. తండ్రి వారిని ప్రేమించలేదు, యేసుక్రీస్తు వారికోసం ప్రాణం పెట్టనూ లేదు. "దేవుడు లోకమును ఎంతో ప్రేమించె‌ను" అని‌ తన సువార్తలో ప్రస్తావించిన యోహాను, తండ్రి ప్రేమించిన అదేలోకం కోసం తన పత్రికలో కూడా జ్ఞాపకం చేస్తాడు.

1 యోహాను 2: 2 ఆయనే మన పాపములకు శాంతికరమైయున్నాడు మన పాపములకు మాత్రమేకాదు. సర్వలోకమునకును శాంతికరమై యున్నాడు.

ఇక్కడ యోహాను తండ్రి ప్రేమించిన లోకాన్ని ప్రస్తావిస్తూ యేసుక్రీస్తు ఆ సర్వలోకానికి శాంతికరంగా ఉన్నాడు అంటున్నాడు. అంటే యూదులకు మాత్రమే కాదు‌కానీ తండ్రి నిర్ణయం చొప్పున యేసుక్రీస్తు ఎవరికోసమైతే ప్రాణం పెట్టాడో వారందరి పాపాలకూ (అన్యజనులకు సహా) ఆయన శాంతికరంగా ఉన్నాడని ఈ మాటలభావం. ఇప్పుడు చెప్పండి, ఈలోకంలో ఎంతోమంది నశించిపోయి, నరకానికి పోతున్నారు. వారందరి పాపాలకూ యేసుక్రీస్తు శాంతికరంగా ఉన్నాడా? ఉంటే వారి పాపాలను బట్టి నశించిపోగలరా? యేసుక్రీస్తు ఎవరి పాపాలకైతే శాంతికరంగా ఉన్నాడో వారు నశించిపోవడం అసాధ్యం. ఈ మాటలు కూడా "దేవుడు లోకాన్ని ఎంతో ప్రేమించెను" అని రాయబడిన వాక్యభాగంలోనే ఉన్నాయి. "దేవుడు లోకమును ఎంతో ప్రేమించెను. కాగా ఆయన తన అద్వితీయకుమారునిగా పుట్టిన వానియందు విశ్వాసముంచు ప్రతివాడును నశింపక నిత్యజీవము పొందునట్లు ఆయనను అనుగ్రహించెను" (యోహాను 3:16).  కాబట్టి యోహాను మాటల్లో లోకం, సర్వలోకం (1 యోహాను 2:2) అన్నప్పుడు "తండ్రి నిర్ణయంలో ఉన్నవారికోసమే" "యేసుక్రీస్తు ప్రార్థన చేసినవారికోసమే" "ఆయన ప్రాణం పెట్టినవారికోసమే" అని అర్థం.

"లోకం" అనేమాటను యూదులు పరిథులతో (ఒక సమూహాన్ని సూచించడానికి) కూడా ఉపయోగిస్తారని అర్థమయ్యేందుకు ఒక స్పష్టమైన ఆధారం పెడుతున్నాను చూడండి.

యోహాను 12:19 కావున పరిసయ్యులు ఒకరితో ఒకరు మన ప్రయత్నములెట్లు నిష్‌ప్రయోజనమై పోయినవో చూడుడి. "ఇదిగో లోకము ఆయన వెంట పోయినదని" చెప్పుకొనిరి.

ఇక్కడ యూదులలో పరిసయ్యులు అనబడే ఒక గుంపు, యేసుక్రీస్తును‌ వెంబడిస్తున్న సమూహాన్ని ఉద్దేశించి వారిని "లోకం" అని ప్రస్తావించింది. లోకం అని రాయబడినప్పుడల్లా అది ప్రపంచం మొత్తం కోసమూ అనుకుంటే ప్రపంచం‌ మొత్తంలో అప్పుడు ఆయనను వెంబడించింది యూదయ మరియు ఆ చుట్టుప్రక్కల ప్రాంతాల్లో ఉన్న‌ కొంతమందే కదా! చివరికి ఆ మాటలు పలుకుతున్న పరిసయ్యులు కూడా ఆయనను వెంబడించలేదు.

2. యేసుక్రీస్తు అందరికొరకూ మనుష్యులందరికొరకూ ప్రాణం పెట్టాడని ఎన్నో లేఖనాలు సాక్ష్యమిస్తున్నాయి. ఉదాహరణకు; "ఈయన అందరికొరకు విమోచన క్రయధనముగా తన్నుతానే సమర్పించుకొనెను" (1 తిమోతికి 2:6), "తన సొంతకుమారుని అనుగ్ర హించుటకు వెనుకతీయక మన అందరికొరకు ఆయనను అప్పగించినవాడు ఆయనతో పాటు సమస్తమును మనకెందుకు అనుగ్రహింపడు?" (రోమీయులకు 8:32). అలాంటప్పుడు యేసుక్రీస్తు అందరికోసమూ కాదు కొందరికోసమే ప్రాణం పెట్టాడని ఎలా చెబుతారు?

A. యేసుక్రీస్తు ఏ మినహాయింపూ లేకుండా అందరికొరకూ ప్రాణం పెడితే వచ్చే సమస్య ఏంటో ఇప్పటికే వివరించాను. మరి లేఖనాలలో ఆయన అందరికొరకూ ప్రాణం పెట్టాడని ఎందుకు రాయబడిందంటే ఇది మనం యూదా నేపధ్యం నుండి ఆలోచించాలి. అప్పటి యూదులు దేవుడు తమకు మాత్రమే దేవుడు అన్నట్టుగా ఆయన ఆశీర్వాదాలు అన్నీ వారికే స్వంతం అన్నట్టుగా అతిశయించేవారు. కానీ యేసుక్రీస్తు సిలువ మరణం ద్వారా కలుగబోయే రక్షణ కేవలం యూదులకు మాత్రమే పరిమితం కాదని, అది అన్యజనులకు కూడా వర్తిస్తుందని చెప్పడానికే అపోస్తలులు తమ రచనల్లో యూదులనూ అన్యజనులనూ కలిపి "అందరూ" అనే పదప్రయోగం చేసారు. అందరూ అంటే ఏ మినహాయింపూ లేకుండా అందరూ అని కాదు, ఏ‌ బేధమూ లేకుండా అందరూ అని అర్థం. ఈ భావం పౌలు మాటల్లోనే స్పష్టంగా చూడండి.

గలతీయులకు 3:27,28 క్రీస్తులోనికి బాప్తిస్మము పొందిన మీరందరు క్రీస్తును ధరించుకొనియున్నారు. ఇందులో యూదుడని గ్రీసుదేశస్థుడని లేదు, దాసుడని స్వతంత్రుడని లేదు, పురుషుడని స్త్రీ అని లేదు; యేసుక్రీస్తునందు మీరందరును ఏకముగా ఉన్నారు.

రోమీయులకు 10:12 యూదుడని గ్రీసు దేశస్థుడని భేదము లేదు; ఒక్క ప్రభువే అందరికి ప్రభువై యుండి, తనకు ప్రార్థనచేయువారందరియెడల కృప చూపుటకు ఐశ్వర్యవంతుడై యున్నాడు.

దీనిగురించి మరింత స్పష్టతకోసం యేసుక్రీస్తు పలికిన మాటలను పరిశీలిద్దాం.

మార్కు 10:45 మనుష్యకుమారుడు పరిచారము చేయించుకొనుటకు రాలేదు గాని పరిచారము చేయుటకును, "అనేకులకు" ప్రతిగా విమోచన క్రయధనముగా తన ప్రాణము ఇచ్చుటకును వచ్చెననెను.

ఈ సందర్భంలో‌ యేసుక్రీస్తు "అనేకులకు ప్రతిగా" తన ప్రాణం పెట్టబోతున్నాను‌ అంటున్నారు. అందరూ అన్నప్పుడు ఏ మినహాయింపూ లేకుండా అందరూ అనుకోవడానికీ యేసుక్రీస్తు "అనేకులకు ప్రతిగా" అనడానికి మధ్య ఉన్న వ్యత్యాసాన్ని గమనించండి. "అనేకులు" అన్నప్పుడు ఏ మినహాయింపూ‌ లేకుండా అందరూ అనే భావం రాదు. ఏ బేధం లేకుండా అందరూ (గొప్ప సమూహం) అనే భావం వస్తుంది. యెషయా ప్రవచనంలో కూడా మనమిదే చూస్తాం "అతడు తనకు కలిగిన వేదనను చూచి తృప్తినొందును. నీతిమంతుడైన నా సేవకుడు జనుల దోషములను భరించి తనకున్న అనుభవజ్ఞానము చేత అనేకులను నిర్దోషులుగా చేయును" (యెషయా 53:11). ఇలా ఆయన ప్రాణం పెట్టిన అనేకులనే మనం ప్రకటన గ్రంథంలో చూస్తాం.

ప్రకటన 7:9,10 అటు తరువాత నేను చూడగా, ఇదిగో, ప్రతి జనములోనుండియు ప్రతి వంశములోనుండియు ప్రజలలోనుండియు, ఆయా భాషలు మాటలాడువారిలో నుండియు వచ్చి, యెవడును లెక్కింపజాలని యొక గొప్ప సమూహము కనబడెను. వారు తెల్లని వస్తృములు ధరించు కొన్నవారై, ఖర్జూరపుమట్టలు చేత పట్టుకొని సింహాసనము ఎదుటను గొఱ్ఱెెపిల్లయెదుటను నిలువబడి, సింహాసనాసీనుడైన మా దేవునికిని గొఱ్ఱెపిల్లకును మా రక్షణకై స్తోత్రమని మహాశబ్దముతో ఎలుగెత్తి చెప్పిరి.

యేసుక్రీస్తు తాను ఎవరికోసం ప్రాణం పెట్టబోతున్నాడో వివరించిన మరో ప్రాముఖ్యమైన సందర్భాన్ని చూడండి.

యోహాను 10:11,15,26-28 నేను గొఱ్ఱెలకు మంచి కాపరిని; మంచి కాపరి గొఱ్ఱెలకొరకు తన ప్రాణము పెట్టును. తండ్రి నన్ను ఏలాగున ఎరుగునో నేను తండ్రిని ఏలాగు ఎరుగుదునో ఆలాగే నేను నా గొఱ్ఱెలను ఎరుగుదును, నా గొఱ్ఱెలు నన్ను ఎరుగును. మరియు "గొఱ్ఱెలకొరకు నా ప్రాణము పెట్టుచున్నాను". అయితే మీరు నా గొఱ్ఱెలలో చేరినవారు కారు గనుక మీరు నమ్మరు. నా గొఱ్ఱెలు నా స్వరము వినును, నేను వాటి నెరుగుదును, అవి నన్ను వెంబడించును. నేను వాటికి నిత్యజీవమునిచ్చుచున్నాను గనుక అవి ఎన్నటికిని నశింపవు, ఎవడును వాటిని నా చేతిలో నుండి అపహరింపడు.

ఈ సందర్భంలో యేసుక్రీస్తు ఆయన గొఱ్ఱెల గురించి మాట్లాడుతూ వాటికోసం‌ తన ప్రాణం పెట్టబోతున్నానని ప్రకటిస్తున్నాడు. మరలా ఆయనను తృణీకరిస్తున్న కొందరు యూదులను ఉద్దేశించి మీరు నా గొఱ్ఱెలు కాదని కూడా చెబుతున్నాడు. దీనిప్రకారం ఆయన ఎవరికోసమైతే ప్రాణం పెట్టాడో ఆ గొఱ్ఱెలలో అప్పటి యూదులు కొందరు మినహాయించబడ్డారు. అందుకే వారు ఆయన స్వరం వినలేదు. అయితే ఆయన ప్రాణం పెట్టిన గొఱ్ఱెల జాబితాలో ఎందరైతే ఉన్నారో వారందరూ ఆయన స్వరం విని ఆయనను విశ్వసిస్తారు. వారంతా తండ్రి నిర్ణయంలో ఉన్నవారే.

అక్కడ యేసుక్రీస్తు పలికిన మాటలను జాగ్రతగా పరిశీలించండి, వారు (యూదులు) ఆయనను నమ్మలేదు కాబట్టి మీరు నా గొఱ్ఱెలు కాదని చెప్పడం లేదు. మీరు నా గొఱ్ఱెలు కాదు‌ కాబట్టే నన్ను నమ్మరని చెబుతున్నాడు. దీనిప్రకారం ఆయన ప్రాణం పెట్టిన గొఱ్ఱెలన్నీ ఆయనను నమ్ముతాయి.

యోహాను 10:26,27 అయితే మీరు "నా గొఱ్ఱెలలో చేరినవారు కారు గనుక మీరు నమ్మరు". "నా గొఱ్ఱెలు నా స్వరము వినును, నేను వాటి నెరుగుదును, అవి నన్ను వెంబడించును".

"అందరూ అన్నప్పుడు ఏ బేధం లేకుండా అందరూనే తప్ప, ఏ మినహాయింపూ లేకుండా అందరూ కాదని" చెప్పడానికి లేఖనాలు ఇస్తున్న మరో స్పష్టమైన ఆధారం చూడండి.

యోవేలు 2:28 తరువాత నేను "సర్వజనుల మీద" నా ఆత్మను కుమ్మ రింతును; మీ కుమారులును మీ కుమార్తెలును ప్రవచన ములు చెప్పుదురు; మీ ముసలివారు కలలుకందురు, మీ యౌవనులు దర్శనములు చూతురు.

అపొ. కార్యములు 2:17 అంత్యదినములయందు నేను "మనుష్యులందరి మీద" నా ఆత్మను కుమ్మరించెదను మీ కుమారులును మీ కుమార్తెలును ప్రవచించెదరు మీ యౌవనులకు దర్శనములు కలుగును మీ వృద్ధులు కలలు కందురు.

ఈ వాక్యభాగాలలో ఆయన ఆత్మ సర్వజనుల‌/మనుష్యులందరి మీదా కుమ్మరించబడుతుందని రాయబడింది. అంటే భూమిపై ఉన్న అందరిపైనా ఆత్మ‌ కుమ్మరించబడిందా? పోని భవిష్యత్తులోనైనా అలా జరుగుతుందా? లేదు. ఈమాటలు కేవలం యేసుక్రీస్తు సిలువ మరణాన్ని విశ్వసించి, ఆయన వాగ్దానంచేసిన ఆత్మను పొందుకునే వారికోసమే రాయబడ్డాయి. కాబట్టి ఇక్కడ సర్వశరీరులూ మనుష్యులందరూ అంటే పరిశుద్ధాత్మను పొందుకునే విశ్వాసులు మాత్రమే. యేసుక్రీస్తు ప్రాణం పెట్టింది వారికొరకు మాత్రమే. ఎందుకంటే వారు మాత్రమే తండ్రి నిర్ణయంలో ఉన్నవారు

3. యేసుక్రీస్తు కొందరికోసమే ప్రాణం పెట్టాడని బోధించడం ఆయన బలియాగాన్ని చులకన చెయ్యడం కాదా?

A: లేఖనాలు ఏం చెబుతున్నాయో దానిని ఉన్నది ఉన్నట్టుగా ప్రకటించడం యేసుక్రీస్తు బలియాగాన్ని చులకన చెయ్యడం ఎలా ఔతుంది? ఇలాంటి లేనిపోని సందేహాలతో లేఖనాలలో లేనిదానిని చెబితే మాత్రం అది కచ్చితంగా దుర్బోధే ఔతుంది. ఇంతకూ యేసుక్రీస్తు బలియాగాన్ని చులకనగా చేస్తుంది ఎవరు? ఆయన ఎందరికోసమైతే తన ప్రాణం పెట్టాడో వారిలో ఒకరు కూడా నశించిపోకుండా రక్షించుకుంటాడని బోధించేవారా? లేక ఆయన లోకంలో ఉన్న అందరికోసమూ ప్రాణం పెట్టాడు కానీ అందరినీ రక్షించుకోలేకపోతున్నాడని బోధించేవారా? మేము యేసుక్రీస్తు బలియాగం విషయంలో సంఖ్యను తగ్గిస్తున్నాము కానీ శక్తిని కాదు. కానీ ఆయన లోకంలో ఉన్న అందరి కోసమూ ప్రాణం పెట్టాడని చెప్పేవారు మాత్రం ఆ బలియాగపు శక్తినే తగ్గించి చూపిస్తున్నారు.

4: విశ్వాసులను దేవుడే రక్షించుకుని ఆయనే వారిలో కార్యసిద్ది కలుగచేస్తున్నప్పుడు వారు ఏం చెయ్యాలో ఏం చెయ్యకూడదో బైబిల్ లో ఎందుకు ఆజ్ఞాపించబడింది.

A: పైన మనం చూసిన లేఖనాలలో ఆయనే మనలో కార్యసిద్ధి కలుగచేస్తాడనీ పరిపూర్ణులుగా చేస్తాడని రాయబడింది. ఆయన ఆ కార్యసిద్ధిని మనలో తన వాక్యాన్ని సాధనంగా వాడుకుని జరిగిస్తాడు. నిజంగా రక్షించబడిన విశ్వాసి పరిశుద్ధాత్ముడి సహాయం ద్వారా లేఖనాలను ధ్యానిస్తూ అందులో దేవుడు తనకు బోధించిన విధులను గైకొనడానికి‌ ఆసక్తి చూపిస్తుంటాడు. ఆయన ఆజ్ఞాపించిన నీతిక్రియలను గైకొంటూ కార్యసిద్ధి పొందుతుంటాడు. పరిశుద్ధాత్ముడు ఆ లేఖనాలను ఆ వ్యక్తికి జ్ఞాపకం చేస్తూ పరిశుద్ధపరుస్తుంటాడు. అందుకే "ఆయన వాక్యము ఎవడు గైకొనునో వానిలో దేవుని ప్రేమ నిజముగా పరిపూర్ణమాయెను" (1యోహాను 2: 5), "ఏలయనగా ఓర్పువలనను, లేఖనములవలని ఆదరణవలనను మనకు నిరీక్షణ కలుగుటకై పూర్వమందు వ్రాయబడిన వన్నియు మనకు బోధ కలుగు నిమిత్తము వ్రాయబడి యున్నవి" (రోమీయులకు 15: 4), "యౌవనస్థులు దేనిచేత తమ నడత శుద్ధిపరచు కొందురు? నీ వాక్యమును బట్టి దానిని జాగ్రత్తగా చూచుకొనుట చేతనే గదా?" (కీర్తనలు 119: 9), "క్రీస్తు యేసునందుంచవలసిన విశ్వాసము ద్వారా రక్షణార్థమైన జ్ఞానము నీకు కలిగించుటకు శక్తిగల పరిశుద్ధ లేఖనములను బాల్యము నుండి నీ వెరుగుదువు గనుక, నీవు నేర్చుకొని రూఢియని తెలిసికొన్నవి యెవరి వలన నేర్చుకొంటివో ఆ సంగతి తెలిసికొని, వాటియందు నిలుకడగా ఉండుము" (2తిమోతికి 3: 14,15) అని రాయబడింది. ఎందుకంటే "ఆ వాక్యమే విశ్వాసులైన మీలో కార్యసిద్ధి కలుగజేయుచున్నది" (1థెస్సలొనీక 2:13).

5: దేవుడు ముందుగానే కొందర్ని రక్షణకోసం నిర్ణయించుకున్నప్పుడు మనం అందరికీ ఎందుకు సువార్తను ప్రకటించాలి?

A: తన నిర్ణయంలో ఉన్నవారిని తన దగ్గరకు తెచ్చుకునే సాధనంగా ఆయన సువార్తను నియమించాడు కాబట్టి, సంఘం సువార్తను ప్రకటించాలి. ఆయన నిర్ణయంలో ఉన్నవారు ఎవరో మనకు తెలియదు కాబట్టి అందరికీ దానిని ప్రకటించాలి. ఆ సమయంలో దేవుని నిర్ణయంలో ఉన్నవారంతా సువార్తకు ప్రతిస్పందించి ఆయనను విశ్వసిస్తారు (యేసుక్రీస్తు తన గొర్రెలకోసం చెప్పినట్టుగా అయన స్వరాన్ని వింటారు). ఒక వ్యక్తి చనిపోయేవరకూ ఆ వ్యక్తి దేవుని నిర్ణయంలో ఉన్నాడా లేదా అనేదానిని మనం చెప్పలేము ఆ వ్యక్తి కూడా చెప్పలేడు. కాబట్టి దేవుడు మనపై పెట్టిన బాధ్యత ప్రకారం భారంతో ప్రతీవారికీ సువార్తను ప్రకటిస్తూ ఉండాలి.

అపొ. కార్యములు 18:9-11 రాత్రివేళ దర్శనమందు ప్రభువు నీవు భయపడక మాటలాడుము, మౌనముగా ఉండకుము. నేను నీకు తోడైయున్నాను, నీకు హాని చేయుటకు నీమీదికి ఎవడును రాడు; ఈ పట్టణములో నాకు బహు జనమున్నదని పౌలుతో చెప్పగా అతడు వారిమధ్య దేవుని వాక్యము బోధించుచు, ఒక సంవత్సరము మీద ఆరునెలలు అక్కడ నివసించెను.

ఇంతకూ మనం సువార్త ప్రకటించినప్పుడు ఒక మనిషి దానిని ఎలా విశ్వసిస్తాడు? తనంతట తానుగా విశ్వసించగలడా? లేదు. అది అసాధ్యమని వాక్యం చెబుతుంది. ఎందుకంటే ప్రతీమనిషీ తన‌పాపం కారణంగా ఆత్మీయంగా చనిపోయాడు.

ఎఫెసీయులకు 2:1 మీ అపరాధముల చేతను పాపముల చేతను మీరు చచ్చినవారైయుండగా, ఆయన మిమ్మును క్రీస్తుతో కూడ బ్రదికించెను.

ఈ వాక్యభాగం ప్రకారం ప్రతీమనిషీ ఆత్మీయంగా చనిపోయాడు కాబట్టి, ఆత్మసంబంధమైన సువార్తను తనంతట తానుగా అంగీకరించలేడు. అందుకే యేసుక్రీస్తు చెప్పినట్టుగా తండ్రి ఆకర్షించకుండా అనగా ఆయన కృపను అనుగ్రహించకుండా ఆయన దగ్గరకు రాలేరు.

1 కొరింథీయులకు 2:14 ప్రకృతి సంబంధియైన మనుష్యుడు దేవుని ఆత్మ విషయములను అంగీకరింపడు, అవి అతనికి వెఱ్ఱితనముగా ఉన్నవి, అవి ఆత్మానుభవము చేతనే వివేచింపదగును గనుక అతడు వాటిని గ్రహింపజాలడు.

కాబట్టి, ముందుగా దేవుడు అతణ్ణి ఆత్మీయంగా బ్రతికించిప్పుడే (తిరిగి జన్మింపచేసినప్పుడే) అతను సువార్తను అంగీకరిస్తాడు.

ఎఫెసీయులకు 2:4,5 అయినను దేవుడు కరుణా సంపన్నుడైయుండి, మనము మన అపరాధముల చేత చచ్చినవారమై యుండినప్పుడు సయితము మనయెడల చూపిన తన మహా ప్రేమచేత మనలను క్రీసుతో కూడ బ్రదికించెను. కృపచేత మీరు రక్షింపబడియున్నారు.

యెహెజ్కేలు 36:26,27 నూతన హృదయము మీ కిచ్చెదను, నూతన స్వభావము మీకు కలుగజేసెదను, రాతిగుండె మీలోనుండి తీసివేసి మాంసపు గుండెను మీకిచ్చెదను. నా ఆత్మను మీయందుంచి, నా కట్టడల ననుసరించువారినిగాను నా విధులను గైకొను వారినిగాను మిమ్మును చేసెదను

అపో. కార్యములు 16: 14 అప్పుడు లూదియయను దైవభక్తిగల యొక స్త్రీ వినుచుండెను. ఆమె ఊదారంగు పొడిని అమ్ము తుయతైర పట్టణస్థురాలు. ప్రభువు ఆమె హృదయము తెరచెను గనుక పౌలు చెప్పినమాటలయందు లక్ష్య ముంచెను.

దీనిగురించి మరింత స్పష్టత కోసం యేసుక్రీస్తు నికోదేముతో చెప్పిన మాటలు మనం చూడవచ్చు.

యోహాను 3:3 అందుకు యేసు అతనితో ఒకడు క్రొత్తగా (లేక,పైనుండి) జన్మించితేనే కాని అతడు దేవుని రాజ్యమును చూడలేడని నీతో నిశ్చయముగా చెప్పుచున్నాననెను.

ఈ సందర్భంలో యేసుక్రీస్తు నికోదేముతో మాట్లాడుతూ ఒకడు కొత్తగా జన్మించితేనే కానీ దేవుని రాజ్యాన్ని చూడలేడని చెబుతున్నాడు. ఎవరూ తమకు తాముగా జన్మించలేరు. దేవుడే పైనుండి (తన ఆత్మను పంపి) వారిని జన్మింపచెయ్యాలి. అందుకే అక్కడ పుట్ నోట్ లో "పైనుండి" అనేపదం మనకు కనిపిస్తుంది (గ్రీకులో వాడిన పదానికి ఇదే అర్థం) విశ్వాసులు అంటేనే దేవుని మూలంగా పుట్టినవారు‌ (తిరిగి జన్మించినవారు).

1 పేతురు 1:4 మృతులలో నుండి యేసుక్రీస్తు తిరిగి లేచుట వలన జీవముతో కూడిన నిరీక్షణ మనకు కలుగునట్లు, అనగా అక్షయమైనదియు, నిర్మలమైనదియు, వాడ బారనిదియునైన స్వాస్యము మనకు కలుగునట్లు, ఆయన తన విశేష కనికరము చొప్పున మనలను మరల జన్మింపజేసెను.

1యోహాను 3: 9 దేవుని మూలముగా పుట్టిన ప్రతివానిలో ఆయన బీజము నిలుచును గనుక వాడు పాపముచేయడు; వాడు దేవుని మూలముగా పుట్టినవాడు గనుక పాపము చేయజాలడు.

1యోహాను 5: 4 దేవుని మూలముగా పుట్టిన వారందరును లోకమును జయించుదురు; లోకమును జయించిన విజయము మన విశ్వాసమే.

యోహాను 1:13 వారు దేవునివలన పుట్టినవారే గాని, రక్తమువలననైనను శరీరేచ్ఛవలననైనను మానుషేచ్ఛవలననైనను పుట్టినవారు కారు.

కాబట్టి రక్షణలో మొదటి అడుగు దేవుడే వేస్తూ చచ్చిన స్థితిలో ఉన్న వారిని తన పరిశుద్ధాత్మ ద్వారా బ్రతికింపచేస్తూ (తిరిగి జన్మింపచేస్తూ) వారు విశ్వసించేలా చేస్తున్నాడు.

యోహాను 3:6 శరీర మూలముగా జన్మించినది శరీరమును ఆత్మమూలముగా జన్మించినది ఆత్మయునైయున్నది.

తీతుకు 3:5 మనము నీతిని అనుసరించి చేసిన క్రియల మూలముగా కాక, తన కనికరము చొప్పుననే పునర్జన్మ సంబంధమైన స్నానము ద్వారాను, పరిశుద్ధాత్మ మనకు నూతన స్వభావము కలుగజేయుట ద్వారాను మనలను రక్షించెను.

జెకర్యా 12: 10 దావీదు సంతతివారిమీదను యెరూషలేము నివాసులమీదను కరుణ నొందించు ఆత్మను విజ్ఞాపనచేయు ఆత్మను నేను కుమ్మరింపగా వారు తాము పొడిచిన నామీద దృష్టియుంచి, యొకడు తన యేక కుమారుని విషయమై దుఃఖించునట్లు,తన జ్యేష్ఠపుత్రుని విషయమై యొకడు ప్రలా పించునట్లు అతని విషయమై దుఃఖించుచు ప్రలాపింతురు.

దీనిప్రకారం దేవుని నిర్ణయంలో ఉన్నవారంతా ఆయన ద్వారా (పరిశుద్ధాత్మ ద్వారా) తిరిగి జన్మింపబడి/ఆకర్షించబడి/హృదయం తెరువబడి సువార్తను విశ్వసిస్తారు.

అపో. కార్యములు 13: 48 అన్యజనులు ఆమాటవిని సంతోషించి దేవుని వాక్యమును మహిమపరచిరి; మరియు "నిత్యజీవమునకు నిర్ణయింపబడిన వారందరు విశ్వసించిరి".

మిగిలినవారు యుగసంబంధమైన దేవత చేత నేత్రాలు మూయబడినవారిగా నాశనమౌతారు.

2 కొరింథీయులకు 4:3,4 మా సువార్త మరుగుచేయబడిన యెడల నశించుచున్నవారి విషయములోనే మరుగు చేయబడియున్నది. దేవుని స్వరూపియైయున్న క్రీస్తు మహిమను కనుపరచు సువార్త ప్రకాశము వారికి ప్రకాశింపకుండు నిమిత్తము, ఈ యుగ సంబంధమైన దేవత అవిశ్వాసులైనవారి మనో నేత్రములకు గ్రుడ్డితనము కలుగజేసెను.

యోహాను 8: 21 మరియొకప్పుడు ఆయన నేను వెళ్లిపోవుచున్నాను; మీరు నన్ను వెదకుదురు గాని మీ పాపములోనే యుండి చనిపోవుదురు; నేను వెళ్లుచోటికి మీరు రాలేరని వారితో చెప్పెను.

2 థెస్సలొనీకయులకు 2:10-12 దుర్నీతిని పుట్టించు సమస్త మోసముతోను, నశించుచున్న వారిలో సాతాను కనుపరచు బలమును అనుసరించియుండును ఇందుచేత సత్యమును నమ్మక దుర్నీతియందు అభిలాషగల వారందరును శిక్షావిధి పొందుటకై, అబద్ధమును నమ్మునట్లు మోసముచేయు శక్తిని దేవుడు వారికి పంపుచున్నాడు.

ఇప్పటివరకూ నేను చెప్పినదాని ప్రకారం, దేవుడు తన పరిశుద్ధాత్మ ద్వారా ఒకరిని బ్రతికించిప్పుడే (తిరిగి జన్మింపచేసి/హృదయం తెరచి) ఒక వ్యక్తి సువార్తను విశ్వసిస్తాడు. కానీ అపోస్తలుల కార్యములు 2:38లో పేతురు మీరు మారుమనస్సు‌ పొంది బాప్తీస్మం తీసుకోవాలనీ తరువాత పరిశుద్ధాత్మ వరాన్ని పొందుకుంటారనీ చెబుతున్నాడు.

అదేవిధంగా,

అపొ. కార్యములు 8:14-17 సమరయవారు దేవుని వాక్యము అంగీకరించిరని యెరూషలేములోని అపొస్తలులు విని, పేతురును యోహానును వారియొద్దకు పంపిరి. వీరు వచ్చి వారు పరిశుద్ధాత్మను పొందవలెనని వారికొరకు ప్రార్థనచేసిరి. అంతకు ముందు వారిలో ఎవనిమీదను ఆయన దిగియుండలేదు, వారు ప్రభువైన యేసు నామమున బాప్తిస్మము మాత్రము పొందియుండిరి. అప్పుడు పేతురును యోహానును వారిమీద చేతులుంచగా వారు పరిశుద్ధాత్మను పొందిరి.

అపొ. కార్యములు 19:5,6 వారు ఆ మాటలు విని ప్రభువైన యేసు నామమున బాప్తిస్మము పొందిరి. తరువాత పౌలు వారిమీద చేతులుంచగా పరిశుద్ధాత్మ వారిమీదికి వచ్చెను. అప్పుడు వారు భాషలతో మాటలాడుటకును ప్రవచించుటకును మొదలుపెట్టిరి.

ఈ రెండు సందర్భాలలో కూడా కొందరు ప్రజలు యేసుక్రీస్తును విశ్వసించి బాప్తీస్మం పొందిన తరువాతే పరిశుద్ధాత్మను పొందుకు‌న్నారనీ అంతకు ముందు ఆయన వారిపై దిగలేదనీ రాయబడింది‌. కాబట్టి మీరు ఈ సందర్భాలు చదువుతున్నప్పుడు అక్కడ వారు పరిశుద్ధాత్మతో పనిలేకుండానే యేసుక్రీస్తును విశ్వసించారు కదా అనే సందేహం కలగవచ్చు. ఆ సందేహానికి వివరణ చూసేముందు మనం యేసుక్రీస్తును విశ్వసించడానికి కారణం పరిశుద్ధాత్ముడే అని చెప్పే మరో మాటను చూడండి.

1 కోరింథీయులకు 12: 3 పరిశుద్ధాత్మ వలన తప్ప ఎవడును యేసు ప్రభువని చెప్పలేడనియు నేను మీకు తెలియజేయుచున్నాను.

ఈ సందర్భంలో పరిశుద్ధాత్మ ద్వారానే ఒకవ్యక్తి యేసుక్రీస్తు ప్రభువని చెబుతాడని రాయబడింది. దీనర్థం నోటితో ఊరికే ఆయన ప్రభువని చెప్పడం కాదు అలా చాలామంది చెబుతారు. కానీ యూదులలో ఒక వ్యక్తి మరొకర్ని ప్రభువు అని ఒప్పుకోవడమంటే ఇకపై తనకంటూ వేరే చిత్తం లేకుండా ఆ వ్యక్తి చిత్తానికే అప్పగించుకోవడం. రక్షణలో మనమంతా యేసుక్రీస్తు చిత్తానికి మనల్ని అప్పగించుకుంటూ ఆయన‌ మనకు ప్రభువని ఒప్పుకుంటాం.

రోమీయులకు 10: 9 అదేమనగా యేసు ప్రభువని నీ నోటితో ఒప్పుకొని, దేవుడు మృతులలో నుండి ఆయనను లేపెనని నీ హృదయ మందు విశ్వసించినయెడల, నీవు రక్షింపబడుదువు.

దీనిప్రకారం, మనం యేసుక్రీస్తు మనకు ప్రభువని ఒప్పుకోవడానికి (రక్షించబడడానికి) పరిశుద్ధాత్ముడే కారణం. మరి మనం పైన చూసిన సందర్భాలలో వారు విశ్వసించి బాప్తీస్మం పొందిన తర్వాతనే ఆయన వారిపైన ఎందుకు కుమ్మరించబడ్డాడు, పేతురు కూడా అలా‌ ఎందుకు చెప్పాడంటే.

1. ఒకసారి అదే పేతురు కళ్ళముందు జరిగిన ఒక సంఘటనను చూడండి.

అపో. కార్యములు 10:44-48 పేతురు ఈ మాటలు ఇంక చెప్పుచుండగా అతని బోధ విన్నవారందరిమీదికి పరిశుద్ధాత్మ దిగెను. సున్నతి పొందినవారిలో పేతురుతోకూడ వచ్చిన విశ్వాసులందరు, పరిశుద్ధాత్మ వరము అన్యజనులమీద సయితము కుమ్మరింపబడుట చూచి విభ్రాంతినొందిరి. ఏలయనగా వారు భాషలతో మాటలాడుచు దేవుని ఘనపరచుచుండగా వినిరి. అందుకు పేతురు మనవలె పరిశుద్ధాత్మను పొందిన వీరు బాప్తిస్మము పొందకుండ ఎవడైనను నీళ్ళకు ఆటంకము చేయగలడా అని చెప్పి యేసు క్రీస్తు నామమందు వారు బాప్తిస్మము పొందవలెనని ఆజ్ఞాపించెను.

ఈ సందర్భంలో పేతురు కొర్నేలీ ఇంటిదగ్గర అ‌న్యులకు బోధిస్తుండగా వారు ఇంకా బాప్తీస్మం పొందకముందే వారిపై పరిశుద్ధాత్ముడు దిగాడు. ఒకవేళ అపోస్తలుల కార్యములు 2:38 లో పేతురు చెప్పిన మాటలు (1. మారుమనస్సు పొంది బాప్తీస్మం తీసుకోవాలి 2. ఆ తరువాత పరిశుద్ధాత్ముడు వారిపైకి వస్తాడు) వరుస క్రమంలో జరిగేవే ఐతే ఇక్కడ వారు బాప్తీస్మం తీసుకోకుండానే ఆయన వారిపైకి ఎలా వచ్చాడు?

కాబట్టి పేతురు అక్కడ వరుస క్రమంలో జరిగేవాటి గురించి చెప్పడం లేదు కానీ పెంతుకోస్తు పండుగ దినాన ఆత్మ కుమ్మరింపును (బాషలు మాట్లాడడాన్ని) చూసి విభ్రాంతి పొందుతున్న ప్రజలకు అదంతా పరిశుద్ధాత్ముడి‌ మూలంగానే జరిగిందని దేవుడు మీకు కూడా ఆ వరాన్ని అనుగ్రహిస్తాడని తెలియచెయ్యడానికే అదంతా చెప్పాడు. వాస్తవానికి ఒక వ్యక్తి పరిశుద్ధాత్ముడి శక్తి కారణంగానే మారుమనస్సు పొందుతాడు. ఆ వెంటనే పరిశుద్ధాత్ముడు ఆ వ్యక్తిలో నివసిస్తాడు తరువాత అతను దానికి బహిరంగ ఒప్పుకోలుగా బాప్తీస్మం తీసుకుంటాడు.

కొందరు యేసుక్రీస్తు ప్రభువు ఒకడు నీటిమూలంగానూ ఆత్మమూలంగానూ జన్మించితేనే కానీ దేవుని రాజ్యముము చూడనేరడని పలికిన మాటలలో నీటిమూలంగా అనేది బాప్తీస్మం గురించి చెప్పబడిందని అపార్థం వేసుకుంటారు. కానీ అక్కడ నీటిమూలంగా అంటే బాప్తీస్మం గురించి కాదు బాప్తీస్మం పొందినవారంతా తిరిగి జన్మించినట్టు కాదు. కాబట్టి ఒక వ్యక్తిని రక్షించడానికి దేవుడు సాధనంగా వాడుకునే వాక్యానికి సాదృష్యంగానే ఆమాట (నీటిమూలంగా) వాడబడిందని మనం అర్థం చేసుకోవాలి.

యెహేజ్కేలు 36:25,26 మీ అపవిత్రత యావత్తు పోవునట్లు నేను మీ మీద శుద్ధజలము చల్లుదును, మీ విగ్రహములవలన మీకు కలిగిన అపవిత్రత అంతయు తీసివేసెదను. నూతన హృదయము మీ కిచ్చెదను, నూతన స్వభావము మీకు కలుగజేసెదను, రాతిగుండె మీలోనుండి తీసివేసి మాంసపు గుండెను మీకిచ్చెదను.

ఎఫెసీయులకు 5: 27 నిర్దోషమైనదిగాను మహిమగల సంఘముగాను ఆయన తనయెదుట దానిని నిలువబెట్టుకొనవలెనని, "వాక్యముతో ఉదక స్నానముచేత" దానిని పవిత్రపరచి, పరిశుద్ధపరచుటకై దానికొరకు తన్నుతాను అప్పగించుకొనెను.

రక్షణ క్రియలమూలంగా కాదని వాక్యం చెబుతుంది (తీతుకు 3:5, ఎఫెసీ 2:9) బాప్తీస్మం అనేది క్రియ. దీనిగురించి మరింత వివరంగా తెలుసుకోడానికి ఈ వ్యాసాలు చదవండి.

బాప్తిస్మం ద్వారా రక్షణ వస్తుందా?

నీటి మూలముగాను ఆత్మ మూలముగాను జన్మించుట

2. మరి; అపో.కార్యములు 8:14-7, 19:1-6 వచనాలలో సమరయులు మారుమనస్సు పొంది‌ బాప్తీస్మం తీసుకున్న చాలాకాలం వరకూ పరిశుద్ధాత్ముడు వారిపైకి రాలేదు కదా? ఎఫెసులో ఉన్న శిష్యులకు కూడా పౌలు మరలా బాప్తీస్మం ఇచ్చాకే ఆయన వారిపైకి దిగాడుగా? వీటి సంగతేంటంటే.

మనం అపోస్తలుల కార్యాలు చదువుతున్నప్పుడు అందులో చాలా విషయాలు సంఘప్రారంభ దశలో జరుగుతున్నాయని గుర్తుంచుకోవాలి. ఆ దశలో‌ భాగంగా అపోస్తలుల కార్యాలు 2వ అధ్యాయంలో పేతురు ద్వారా యూదులకు సువార్త ప్రకటించబడింది. వారు మొదటిగా రక్షణపొంది సంఘంలో చేర్చబడ్డారు. 8వ అధ్యాయంలో యూదులకూ అష్షూరీయులకూ పుట్టిన సమరయులకు (సంకరజాతి) ఫిలిప్పు ద్వారా సువార్త ప్రకటించబడింది. వారు రెండవదిగా రక్షణపొంది సంఘంలోకి చేర్చబడ్డారు. 10వ అధ్యాయం ప్రకారం అన్యులలో దేవుని భయం కలిగిన వారికి పేతురు ద్వారా సువార్త ప్రకటించబడింది. మూడవదిగా వారు కూడా రక్షణపొంది సంఘంలో చేర్చబడ్డారు. ఈవిధంగా సంఘం ఏ బేధం లేకుండా నింపబడింది. ఈ క్రమంలో జరిగిన కొన్ని విషయాలు ఇప్పటికీ సంఘంలో జరుగుతాయని భావించకూడదు.

ఉదాహరణకు; 

అపొ. కార్యములు 1:26 అంతట వారు వీరిని గూర్చి చీట్లువేయగా మత్తీయ పేరట చీటి వచ్చెను గనుక అతడు పదునొకండుమంది అపొస్తలులతో కూడ లెక్కింపబడెను.

ఈ సందర్భంలో అపోస్తలులు చీట్లువేసి 12వ అపోస్తలుడిని ఎన్నుకున్నట్టు మనం చూడగలం. ప్రస్తుతం మనం చీట్లు వేసి ఎవరినీ సంఘపెద్దగా‌ నియమించకూడదు. వాక్య నియమాలను బట్టే నియమించాలి (1 తిమోతీ 3, తీతుకు 1). ఇక విషయానికి వస్తే సంఘం‌ అపోస్తలుల బోధక్రింద కొనసాగాలని ప్రభువు నియమించాడు.

మత్తయి 28:20 నేను మీకు ఏ యే సంగతులను ఆజ్ఞాపించితినో వాటినన్నిటిని గైకొన వలెనని వారికి బోధించుడి.

అపొ. కార్యములు 2:42 వీరు అపొస్తలుల బోధయందును సహవాసమందును, రొట్టె విరుచుటయందును ప్రార్థన చేయుటయందును ఎడతెగక యుండిరి.

దీని ప్రకారం అపోస్తలులు కానివారు సువార్తను ప్రకటించినప్పటికీ అక్కడి ప్రజలు పొందుకున్న రక్షణను అపోస్తలులు ధృవీకరించి, యూదులకూ అన్యజనులకూ ఏ బేధంలేకుండా ఆత్మ అనుగ్రహించబడిందని‌ సాక్ష్యమివ్వాలి, సంఘంలోకి ఆహ్వానించాలి.

అపొ. కార్యములు 11:15-18 నేను మాటలాడనారంభించినప్పుడు పరిశుద్ధాత్మ మొదట మన మీదికి దిగిన ప్రకారము వారి మీదికిని దిగెను. అప్పుడుయోహాను నీళ్లతో బాప్తిస్మమిచ్చెను గాని మీరు పరిశుద్ధాత్మలో (లేక, పరిశుద్ధాత్మతో) బాప్తిస్మము పొందుదురని ప్రభువు చెప్పినమాట నేను జ్ఞాపకము చేసికొంటిని. కాబట్టి ప్రభువైన యేసు క్రీస్తునందు విశ్వాసముంచిన మనకు అనుగ్రహించినట్టు దేవుడు వారికి కూడ సమానవరము అనుగ్రహించి యుండగా, దేవుని అడ్డగించుటకు నేను ఏపాటివాడనని చెప్పెను. వారు ఈ మాటలు విని మరేమి అడ్డము చెప్పక అట్లయితే అన్యజనులకును దేవుడు జీవార్థమైన మారుమనస్సు దయచేసి యున్నాడని చెప్పుకొనుచు దేవుని మహిమ పరచిరి.

ఈ కారణం చేతే మనం చూసిన సమరయుల సందర్భంలో పేతురు యోహానులు వచ్చి ప్రార్థన చేసేవరకూ పరిశుద్ధాత్ముడు వారిలో‌ నివసించడానికి దిగలేదు. కానీ వారు మారుమనస్సు పొందింది మాత్రం పరిశుద్ధాత్ముడి మూలంగానే.